ଭୋପାଳ: ମଧ୍ୟପ୍ରଦେଶରେ ବିଧାନସଭା ନିର୍ବାଚନ ପାଇଁ ଶୁକ୍ରବାର ମତଦାନ ଅନୁଷ୍ଠିତ ହୋଇଯାଇଛି। ମଧ୍ୟପ୍ରଦେଶର ସମସ୍ତ ୨୩୦ଟି ଆସନ ପାଇଁ ଆଜି ଗୋଟିଏ ପର୍ଯ୍ୟାୟ ଭୋଟ୍ ଗ୍ରହଣ ଚାଲୁଛି। ଅପରାହ୍ମ ୧ଟା ସୁଦ୍ଧା ୪୫.୪୦% ଭୋଟିଂ ହୋଇଛି। ଭୋଟରମାନେ ଭୋଟ୍ ଦେବା ପାଇଁ ୬୪ ହଜାରରୁ ଅଧିକ ମତଦାନ ବୁଥରେ ପହଞ୍ଚିଛନ୍ତି। ବରିଷ୍ଠ ନେତା, ପ୍ରାର୍ଥୀ, ସମର୍ଥକ ଏବଂ ରାଜନୈତିକ ଦଳର କର୍ମକର୍ତ୍ତାମାନେ ମଧ୍ୟ ଭୋଟ୍ ଦେଇଛନ୍ତି। ଏହି କ୍ରମରେ କ୍ୟାବିନେଟ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ଭୋଟ ଦେବା ପାଇଁ ଗ୍ବାଲିଅରରେ ପହଞ୍ଚିଥିଲେ। ଏହି ସମୟରେ ସେ ଗଣମାଧ୍ୟମ ସହ କଥା ହୋଇଥିଲେ ଏବଂ ତାଙ୍କ ମୁଖ୍ୟମନ୍ତ୍ରୀ ପଦ ପାଇଁ ପ୍ରତିଦ୍ୱନ୍ଦ୍ୱୀ ହେବା ବିଷୟରେ ପ୍ରଶ୍ନ କରିଥିଲେ।
ଆଉ ସମସ୍ତଙ୍କ ମନରେ ଚାଲିଥିବା କଳ୍ପନାଜଳ୍ପନାକୁ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରିଥିଲେ ଜ୍ୟୋତିରାଦିତ୍ୟ। ସେ କହିଛନ୍ତି, ମୁଁ ପୂର୍ବରୁ କହିସାରିଛି ଯେ ମୁଁ ମୁଖ୍ୟମନ୍ତ୍ରୀ ପଦ ପାଇଁ ଦୌଡ଼ରେ ନାହିଁ। ମୁଁ ଏହି ଦୌଡ଼ରେ କେବେବି ନ ଥିଲି, କିମ୍ବା ମୁଁ ଆଜି ବି ସାମିଲ ନୁହେଁ। ମୋତେ ତିନିଥର, ୨୦୧୩ ରେ, ୨୦୧୮ରେ ଏବଂ ଆଜି ମଧ୍ୟ ପଚରାଗଲା। ତିନିଥର ମୁଁ କହିଛି ଯେ ମୁଁ ମୁଖ୍ୟମନ୍ତ୍ରୀ ପଦ ଦୌଡରେ ନାହିଁ।
ମୁଖ୍ୟମନ୍ତ୍ରୀ ପଦ ପାଇଁ ଦୌଡ ଉପରେ ମନ୍ତବ୍ୟ ଦେଇ ଜ୍ୟୋତିରାଦିତ୍ୟ ସିନ୍ଧିଆ ଆହୁରି କହିଛନ୍ତି ଯେ ଏହା ଚେୟାର ପାଇଁ ରେସ ନୁହେଁ। ଏହି ରେସ ବିକାଶ, ପ୍ରଗତି ଏବଂ ଜନସାଧାରଣଙ୍କ ବିଶ୍ୱାସକୁ ସୁନିଶ୍ଚିତ କରିବା ପାଇଁ। ଏହି ସମୟ ମଧ୍ୟରେ ସିନ୍ଧିଆ ମଧ୍ୟ କଂଗ୍ରେସ ଦଳକୁ ଟାର୍ଗେଟ କରି କହିଛନ୍ତି ଯେ ମୁଖ୍ୟମନ୍ତ୍ରୀ ପଦ ପାଇଁ ଦୌଡ କଂଗ୍ରେସ ଦଳରେ ହୋଇଥାଏ। ପ୍ରକୃତରେ, ମଧ୍ୟପ୍ରଦେଶ ସରକାର ଗଠନ ପାଇଁ ୧୭ ନଭେମ୍ବରରେ ୨୩୦ ଟି ବିଧାନସଭା ଆସନରେ ଭୋଟ୍ ଗ୍ରହଣ କରାଯାଉଛି। ଗଣତନ୍ତ୍ରର ଏହି ପର୍ବରେ ରାଜ୍ୟର ନାଗରିକମାନେ ଉତ୍ସାହର ସହ ଅଂଶଗ୍ରହଣ କରୁଛନ୍ତି।
Comments are closed.