ଟିକେଟ୍ ନ ମିଳିବାରୁ ବିଜେପି ଛାଡିଲେ କର୍ଣ୍ଣାଟକର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଟାଣୁଆ ଲିଙ୍ଗାୟତ ନେତା ଲକ୍ଷ୍ମଣ ସାବଦି

ବେଙ୍ଗାଲୁରୁ: ଟିକେଟ୍ ନ ମିଳିବା ପରେ ବିଜେପି ଛାଡ଼ିଲେ କର୍ଣ୍ଣାଟକର ପୂର୍ବତନ ତଥା ଟାଣୁଆ ବିଜେପି ନେତା ଲକ୍ଷ୍ମଣ ସାବଦି। ଆସନ୍ତା ମାସ କର୍ଣ୍ଣାଟକରେ ନିର୍ବାଚନ ହେବାକୁ ଅଛି। ହେଲେ ବିଜେପି ଯେଉଁ ପ୍ରାର୍ଥି ତାଲିକା ଘୋଷଣା କରିଛି ସେଥିରେ ଲକ୍ଷ୍ମଣ ସାବଦିଙ୍କୁ ଟିକେଟ୍ ମିଳି ନାହିଁ। ଏଥିପାଇଁ ସେ ଦଳ ଛାଡ଼ି ଦେଇଛନ୍ତି।

ବର୍ତ୍ତମାନର ବୋମାଇ ସରକାରରେ ମନ୍ତ୍ରୀ ଥିବା ଲକ୍ଷ୍ମଣ ସବାଦି ପୂର୍ବତନ ମୁଖ୍ୟମନ୍ତ୍ରୀ ବିଏସ୍‌ ୟୁଦୁରାପ୍ପାଙ୍କ ଘନିଷ୍ଟ। ସେ ରାଜ୍ୟରେ ଉପମୁଖ୍ୟମନ୍ତ୍ରୀ ଦାୟିତ୍ୱ ବି ସାମ୍ଭାଳି ସାରିଛନ୍ତି। ବିଜେପିର ଜଣେ ଟାଣୁଆ ଲିଙ୍ଗାୟତ ନେତା ମଧ୍ୟ। ୨୦୧୮ କର୍ଣ୍ଣାଟକ ବିଧାନସଭା ନିର୍ବାଚନରେ ସାବଦି କଂଗ୍ରସ ପ୍ରାର୍ଥିଙ୍କୁ ହରାଇଥିଲେ। ଏବେ ତାଙ୍କର ଦଳରୁ ଇସ୍ତଫା ଦେବା ବିଜେପି ପାଇଁ ମଙ୍ଗାପଡ଼ିପାରେ।

କେବଳ ସାବଦୀ ନୁହଁନ୍ତି ପୂର୍ବତନ ମୁଖ୍ୟମନ୍ତ୍ରୀ ଜଗଦିଶ ଶେତ୍ତାରଙ୍କୁ ମଧ୍ୟ ଚଳିତ ନିର୍ବାଚନରେ ଟିକେଟ୍ ଦେଇ ନାହିଁ ବିଜେପି। ଫଳରେ ସେ ନିଜର ଅସନ୍ତୋଷ ବ୍ୟକ୍ତ କରିବା ପାଇଁ କେନ୍ଦ୍ର ନେତୃଙ୍କୁ ଭେଟିବାକୁ ଦିଲ୍ଲୀ ଯାଇଥିବା ସୂଚନା ମିଳିଛି। ଏହା ପୂର୍ବରୁ କେଏସ୍‌ ଇଶ୍ୱରପ୍ପା ଗତକାଲି ନିର୍ବାଚନ ରାଜନୀତିରୁ ସନ୍ନ୍ୟାସ ଘୋଷଣା କରିଥିଲେ। ସେ ଆଉ ନିର୍ବାଚନ ଲଢ଼ିବେ ନାହିଁ ବୋଲି କହିଥିଲେ।

ସୂଚନା ଥାଉକି, ଗତକାଲି ରାତିରେ ବିଜେପି କର୍ଣ୍ଣାଟକ ନିର୍ବାଚନ ପାଇଁ ୧୮୯ ଜଣ ପ୍ରାର୍ଥି ତାଲିକା ଘୋଷଣା କରିଥିଲା। ଏଥିରେ ଅନେକ ବିଜେପି ବିଧାୟକଙ୍କୁ ବାଦ୍ ଦେଇ କଂଗ୍ରେସରୁ ଆସିଥିବା ବିଧାୟକଙ୍କୁ ଟିକେଟ୍ ଦିଆଯାଇଛି। ଯାହାକୁ ନେଇ ବିଜେପି ନେତାଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି।

ଘୋଷଣା ହୋଇଥିବା ୧୮୯ ପ୍ରାର୍ଥିଙ୍କ ମଧ୍ୟରୁ ୫୨ ଜଣ ନୂଆ ମୁହଁ ସ୍ଥାନ ପାଇଛନ୍ତି। ସେଥିରୁ ୩୨ ଜଣ ପଛୁଆ ବର୍ଗର ହୋଇଥିବା ବେଳେ ୩୦ ଜଣ ଅନୁସୂଚିତ ଜାତି ଓ ୧୬ ଅନୁସୂଚିତ ଜନଜାତି ବର୍ଗର ପ୍ରାର୍ଥି ରହିଛନ୍ତି। ସେହିପରି ଶିକ୍ଷାଗତ ଯୋଗ୍ୟତା କଥା ଯଦି ଦେଖିବା ଘୋଷିତ ପ୍ରାର୍ଥିଙ୍କ ମଧ୍ୟରୁ ୩୧ ଜଣ ପିଏଚ୍‌ଡି କରିଥିବା ୩୧ ଜଣ ପିଜି କରିଛନ୍ତି।