ନୂଆଦିଲ୍ଲୀ: ସାରାବିଶ୍ୱରେ ଚାଂଚଲ୍ୟ ସୃଷ୍ଟି କରିଛି ଲେବାନନରେ ପେଜର ସିରିଆଲ ବ୍ଲାଷ୍ଟ । ପେଜର ଜରିଆରେ ବିସ୍ପୋରଣ କରି ହିଜବୋଲ୍ଲାକୁ ଇସ୍ରାଏଲ ଟାର୍ଗେଟ କରିଥିବା ନେଇ ଚର୍ଚ୍ଚା ହେଉଛି । ହିଜବୋଲ୍ଲା ଅର୍ଡର କରିଥିବା ପେଜରରେ କିପରି ବିସ୍ଫୋରକ ଖଞ୍ଜା ହେଲା, ସେ ନେଇ ଖୋଳତାଡ ଜାରି ରହିଛି । ଏବେ ଲେବାନନ ପେଜର୍ ବ୍ଲାଷ୍ଟର କେରଳ କନେକସନ୍ ବାହାରିଛି । କେରଳରେ ଜନ୍ମିତ ନରୱେ ନାଗରିକ ରିନସନ ଜୋସ୍ଙ୍କ ନାଁ ପେଜର ବ୍ଲାଷ୍ଟ ସହ ଯୋଡାଯାଉଛି । କଥା ହେଉଛି, ପେଜର ବିକ୍ରି କରିଥିବା ନାର୍ଟୋ ଗ୍ଲୋବାଲ୍ ଲିମିଟେଡର ମାଲିକ ହେଉଛନ୍ତି ରିନସନ ଜୋସ୍ । କେରଳ ପୋଲିସ ଓ ଆନ୍ତର୍ଜାତିକ ସୁରକ୍ଷା ଏଜେନସୀ ରିନସନ ଜୋସ୍ଙ୍କ ପେଜର ବ୍ଲାଷ୍ଟ୍ ଲିଙ୍କ୍ ନେଇ ଯାଂଚ୍ ଆରମ୍ଭ କରିଛନ୍ତି ।
କେରଳର ୱାୟନାଡ୍ ସହ ରିନସନଙ୍କ ସଂପର୍କ
୩୭ ବର୍ଷିୟ ରିନସନଙ୍କ ପରିବାର କେରଳର ୱାୟନାଡ୍ର ବାସିନ୍ଦା । ରିନସନ ମଧ୍ୟ ୱାୟନାଡ ଜିଲ୍ଲାରେ ଜନ୍ମିଥିଲେ । ନରୱେ ଯିବା ପୂର୍ବରୁ ଖ୍ରୀଷ୍ଟିୟ କ୍ଲର୍ଗି ବା ଧର୍ମଗୁରୁ ହେବା ପାଇଁ ପ୍ରଶିକ୍ଷଣ ନେଇଥିଲେ ରିନସନ । ପରେ ନରୱେର ନାଗରିକତା ଗ୍ରହଣ କରିଥିଲେ ରିନସନ । ବୁଲଗାରିଆ ରାଜଧାନୀ ସୋଫିଆରେ ଥିବା ନାର୍ଟୋ ଗ୍ଲୋବାଲ ଲିମିଟେଡ୍ ନାମକ ଏକ କମ୍ପାନିର ମାଲିକ ହେଉଛନ୍ତି ରିନସନ୍ । ବିଭିନ୍ନ ରିପୋର୍ଟ ଅନୁସାରେ ରିନସନଙ୍କ କମ୍ପାନି ହିଜବୋଲ୍ଲାକୁ ଶତାଧିକ ପେଜର ବିକ୍ରି କରିଥିଲା । ଏଥିପାଇଁ ସନ୍ଦେହ ଘେରକୁ ଆସିଛନ୍ତି ରିନସନ୍ ଜୋସ୍ । କେନ୍ଦ୍ରୀୟ ଗୁଇନ୍ଦା ସଂସ୍ଥା ଓ କେରଳ ପୋଲିସର ସ୍ପେଶାଲ ବ୍ରାଂଚ୍ ଶୁକ୍ରବାର ୱାୟନାଡ୍ ଜିଲ୍ଲାରେ ରିନସନଙ୍କ ପୈତୃକ ଗାଁ ଯାଇ ତାଙ୍କ ସଂପର୍କରେ ତଥ୍ୟ ସଂଗ୍ରହ କରିଛନ୍ତି । ମିଡିଆରେ ରିନସନଙ୍କୁ ନେଇ ଚର୍ଚ୍ଚା ହୋଇଥିବାରୁ ତାଙ୍କ ପରିବାରକୁ ସୁରକ୍ଷା ଦିଆଯାଇଛି ।
ନରୱେ ଯିବା ଆଗରୁ ଦରଜୀ କାମ କରୁଥିଲେ
କେରଳ ପୋଲିସ ଯାଂଚରୁ ଜଣାପଡିଛି ଯେ, ରିନସନଙ୍କ ବାପା ଦରଜୀ କାମ କରନ୍ତି । ରିନସନ ମଧ୍ୟ ଦରଜୀ କାମ କରୁଥିଲେ । ପରେ ରିନସନ ନିଜର ଯାଆଁଳା ଭାଇ ସହ ବିଦେଶ ପଳାଇଥିଲେ । ତାଙ୍କ ଭାଇ ୟୁକେରେ ଓ ଭଉଣୀ ଆୟର୍ଲାଣ୍ଡରେ ବସବାସ କରୁଥିବା ସୂଚନା ମିଳିଛି । ରିନସନ ବିବାହିତ ଓ ନରୱେର ନାଗରିକତା ଗ୍ରହଣ ପରେ ସେଠାରେ ରହୁଛନ୍ତି । ୨୦୨୩ ନଭେମ୍ବରରେ ଶେଷ ଥର ପାଇଁ କେରଳ ଆସିଥିଲେ ରିନସନ୍ । ଏ ବର୍ଷ ଜାନୁଆରୀରେ ସେ ପୁଣି ନରୱେ ଚାଲିଯାଇଥିଲେ । ତିନି ଦିନ ପୂର୍ବେ କେରଳରେ ଥିବା ତାଙ୍କ ପରିବାର ସହ ଶେଷଥର ପାଇଁ କଥା ହୋଇଥିଲେ ରିନସନ । ଏହାପରେ ତାଙ୍କ ସହ ଫୋନରେ ଯୋଗାଯୋଗ ହୋଇପାରିନାହିଁ ବୋଲି ରିନସନଙ୍କ କକା କହିଛନ୍ତି । ରିନସନଙ୍କୁ ଏହି ମାମଲାରେ ବୋଧହୁଏ ଫସାଇ ଦିଆଯାଇଛି ବୋଲି ଅଭିଯୋଗ କରିଛନ୍ତି ପରିବାର ଲୋକେ ।
ପେଜର ବିକ୍ରିରେ ସହାୟତା କରିଥିଲା ରିନସନଙ୍କ କମ୍ପାନି
ହଙ୍ଗେରି ମିଡିଆ ଅନୁସାରେ ରିନସନ ଜୋସଙ୍କ କମ୍ପାନି ନାର୍ଟୋ ଗ୍ଲୋବାଲ ପେଜର ବିକ୍ରିରେ ସହାୟତା କରିଥିଲା । ନାର୍ଟୋ ଗ୍ଲୋବାଲ ଏକ କନସଲଟିଂ, ଟେକ୍ନୋଲୋଜି , ପେମେଂଟ୍ ଇଂଟିଗ୍ରେସନ ଓ ରିକ୍ରୁଟମେଂଟ କମ୍ପାନି ବୋଲି ୱେବସାଇଟରେ ଉଲ୍ଲେଖ କରାଯାଇଥିଲା । କିନ୍ତୁ ଏହି ୱେବସାଇଟ ଏବେ ହଟିଯାଇଛି । ହେଲେ ବୁଲଗାରିଆର ଷ୍ଟେଟ୍ ଏଜେନସୀ ଫର୍ ନ୍ୟାସନାଲ ସିକ୍ୟୁରିଟି ନାର୍ଟୋ ଗ୍ଲୋବାଲ ଓ ମାଲିକ ରିନସନଙ୍କୁ କ୍ଲିନଚିଟ୍ ଦେଇଛି । କିନ୍ତୁ ତାଙ୍କ ଉପରୁ ସନ୍ଦେହ ହଟିନାହିଁ । ଆନ୍ତର୍ଜାତିକ ସୁରକ୍ଷା ଏଜେନସୀ ରିନସନଙ୍କ ସଂପର୍କରେ ଅଧିକ ସୂଚନା ସଂଗ୍ରହ କରି ଖୋଳତାଡ କରୁଛନ୍ତି ।