ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ
ମଂଚକୁ ଚଢ଼ିଲେ ସୁବକ୍ତା
ପାଲଟି ମଂଦ ଅଭିନେତା
ଅନ୍ୟ ଲୋକଂକ କଥା କହି
ମନକୁ ନେଇଥାଂତି ମୋହି
ମୋହିତ ହେବା ପାଇଁ ଶ୍ରୋତା
ଦେଖାଂତି ଛଦ୍ମ ଏକାଗ୍ରତା
ଶ୍ରୋତା ଓ ବକ୍ତା ଏକାଭଳି
ସଭାକୁ ନିଅଂତି ସଂଭାଳି
ନାଟକୀୟତା ଭଂଗୀଭରା
ସ୍ବରର ଚଢ଼ା ଓ ଉତୁରା
ସହିତ ହାତ, ମୁଂଡ ହଲା
ହୋଇଲେ ସଭା ସରିଗଲା
ଯିଏ ବି ‘ବାଗ୍ମୀ’ ଆଖ୍ୟା ପାଇ
ରାଇଜସାରା ବୁଲୁଥାଇ
ଯାଇ ଓ ଫେରି ସାରେ ବେଳ
ମିଳେନାହିଁ ବାଂଛିତ ଫଳ
କଂଠସ୍ଥ ମଧୁର ଭାଷଣ
ଶୁଣାଇଲେ ବି ଘନଘନ
ତହିଁର ସ୍ପଷ୍ଟ ପରିଣାମ
କେବଳ ଗଳା ପରିଶ୍ରମ
ଏପରି କଥା କହି, ଶୁଣି
ଲୋକେ ବୋଲାଂତି ଗୁଣୀ, ଜ୍ଞାନୀ
ଏହା ଏ ଭାଷାର କାହାଣୀ
ଅନେକେ ନେଇଛଂତି ମାନି
ଏଠି ପୁସ୍ତକ ଲୋକାର୍ପଣ
ସେଠି ପାଳଂତି ଜନ୍ମଦିନ
ସୁବିଦିତ ସ୍ମୃତିଚାରଣ
କରଂତି ଆମ ବକ୍ତାଗଣ
ବୌଦ୍ଧିକତାର ଏହି ସ୍ଥିତି
ଯୋଗୁଁ ଆମର ଏ ଦୁର୍ଗତି
କରିବା ଆମେ ଅବସାନ
ଅଳ୍ପ ଟିକିଏ ଦେଲେ ମନ
ଆମର ଗପୁଡ଼ି ସ୍ବଭାବ
ଯୋଗୁଁ ଭୋଗୁଛୁଁ ପରାଭବ
କାଳ ସହିତ ଦେଲେ ତାଳ
ଫୁଟିବ ଉଜ୍ଜ୍ବଳ ସକାଳ
ଭାଷାରେ ନ ଥିଲେ ବି ଖୁଣ
ଆମର ଯେତେ ଅବିଗୁଣ
କରଂତି ଏ ଭାଷାକୁ ନ୍ୟୂନ
ବୁଝଂତୁ ଜନସାଧାରଣ
