ମୁମ୍ବାଇ: ସମାଜରେ ମହିଳାଙ୍କ ପ୍ରତି ବଢୁଥିବା ଯୌନ ନିର୍ଯାତନାକୁ ଦୃଷ୍ଟିରେ ରଖି କଡା ପଦକ୍ଷେପ ନେଉଛନ୍ତି ମହାରାଷ୍ଟ୍ର ସରକାର। ମହାରାଷ୍ଟ୍ର (ମହାରାଷ୍ଟ୍ର) ସରକାର ଏଭଳି ଆଇନ ପ୍ରଣୟନ କରିବାକୁ ଯାଉଛନ୍ତି ଯେଉଁଥିରେ ବଳାତ୍କାର ପାଇଁ ମୃତ୍ୟୁଦଣ୍ଡର ବ୍ୟବସ୍ଥା ହେବ। ଏହି ବିଲ୍ କୁ କ୍ୟାବିନେଟର ଅନୁମୋଦନ ମିଳିଥିବା ବେଳେ ଏବଂ ଖୁବ୍ ଶୀଘ୍ର ବିଧାନସଭାରେ ଏହା ଆଗତ ହେବା ନେଇ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ।
ଏହାସହ ଏସିଡ୍ ଆକ୍ରମଣରେ ପୀଡିତାଙ୍କୁ ୧୦ ଲକ୍ଷ ଟଙ୍କା କ୍ଷତିପୂରଣ ଦିଆଯିବ। ଏହି ବିଲ କ୍ୟାବିଟେନ ମଞ୍ଜୁରୀ ପାଇବା ପରେ ଗୃହମନ୍ତ୍ରୀ ଅନିଲ ଦେଶମୁଖ କହିଛନ୍ତି ଯେ, ଏହି ବିଲ ଅନୁଯାୟୀ ଯଦି କୌଣସି ବ୍ୟକ୍ତି ଦୁଷ୍କର୍ମ କରିଥିବା ନେଇ ଦୋଷୀ ସାବ୍ୟସ୍ତ ହୁଏ ତେବେ ଅଭିଯୁକ୍ତକୁ ମୃତ୍ୟୁଦଣ୍ଡ ଅଥବା ଆଜୀବନ କାରାଦଣ୍ଡ ସହ ଭାରି ଜୋରିମାନା ପ୍ରଦାନ କରିବାକୁ ପଡିବ।
ଏସିଡ ପିଡିତାଙ୍କ ପ୍ଲାଷ୍ଟିକ୍ ସର୍ଜରୀ ପାଇଁ ୧୦ ଲକ୍ଷ ଟଙ୍କା ପ୍ରଦାନ କରାଯିବ ଏବଂ ଦୋଷୀ ସାବ୍ୟସ୍ତ ବ୍ୟକ୍ତିଙ୍କୁ ଦଣ୍ଡ ମଧ୍ୟ ଦିଆଯିବ।
ଶକ୍ତି ଅଧିନିୟମରେ ଅଭିଯୁକ୍ତଙ୍କ ଶୁଣାଣି 30 ଦିନ ମଧ୍ୟରେ ଶେଷ ହେବା ନେଇ ମନ୍ତ୍ରୀ କହିଛନ୍ତି। ଏହି ଅଧିନିୟମ (ଶକ୍ତି ଅଧିନିୟମ) ଅନୁଯାୟୀ ବଳାତ୍କାର ମାମଲା ସ୍ୱତନ୍ତ୍ର କୋର୍ଟରେ ଶୁଣାଣି ହେବ ଏବଂ ପୋଲିସକୁ ୧୫ ଦିନ ମଧ୍ୟରେ ଚାର୍ଜସିଟ ଦାଖଲ କରିବାକୁ ପଡିବ। ରାଜ୍ୟର ମହିଳା ଓ ଶିଶୁ ବିକାଶ ମନ୍ତ୍ରୀ ଯଶୋମତି ଠାକୁର ଏହାକୁ ଏକ ଐତିହାସିକ ନିଷ୍ପତ୍ତି ବୋଲି କହିଛନ୍ତି। ସେ କହିଛନ୍ତି ଯେ, ଏହି ନିଷ୍ପତ୍ତି ରାଜ୍ୟରେ ମହିଳା ଓ ବାଳିକାଙ୍କ ପ୍ରତି ହିଂସା କରୁଥିବା ଲୋକଙ୍କ ମଧ୍ୟରେ ଭୟ ବୃଦ୍ଧି କରାଇବ।
ବିଧାନସଭାର ଶୀତକାଳୀନ ଅଧିବେଶନରେ ଏହି ବିଲ୍ ଆଗତ ହେବ ବୋଲି ଅନିଲ ଦେଶମୁଖ କହିଛନ୍ତି। ମହାରାଷ୍ଟ୍ର ବିଧାନସଭାର ଦୁଇ ଦିନିଆ ଶୀତକାଳୀନ ଅଧିବେଶନ ଡିସେମ୍ବର ୧୪ ରୁ ମୁମ୍ବାଇରେ ଆରମ୍ଭ ହେଉଛି। ଏହି ବିଲ୍ ଚଳିତ ଶୀତ ଅଧିବେଶନରେ ରାଜ୍ୟ ବିଧାନସଭାରେ ଆଗତ ହେବ। ବିଧାନସଭାର ଉଭୟ ଗୃହରେ ଆଲୋଚନା ଏବଂ ଅନୁମୋଦନ ପରେ ଏହାକୁ ରାଜ୍ୟପାଳଙ୍କ ନିକଟକୁ ଦସ୍ତଖତ ପାଇଁ ପଠାଯିବ। ସେଠାରୁ ଅନୁମୋଦନ ପାଇବା ପରେ ଏହି ଆଇନକୁ ‘ପାୱାର୍ ଆକ୍ଟ’ ନାମରେ ପ୍ରଣୟନ କାରାଯିବ