କୋରାପୁଟ: ନ୍ୟାସନାଲ ହେଲଥ ମିଶନ (ଏନଏଚଏମ୍) ଏବଂ ଓଡିଶା ସରକାରଙ୍କ ମିଳିତ ସହଯୋଗରେ ୟୁନିସେଫ, କୋରାପୁଟ ଜିଲ୍ଲାରେ ଅପପୃଷ୍ଟି ରୋକିବା ପାଇଁ ଏକ ମିଡିଆ ରାଉଣ୍ଡ ଟେବୁଲ ବୈଠକ ଆୟୋଜନ କରିଛି ।
ବୈଠକରେ ଜିଲ୍ଲାରେ ଦେଖାଦେଉଥିବା ଗୁରୁତର କୁପୋଷଣ ସମସ୍ୟାର ସମାଧାନ କରିବା ଉପରେ ଆଲୋଚନା କରାଯାଇଥିଲା । ଏହା ସହ ସଚେତନତା ସୃଷ୍ଟି କରିବାରେ ବହୁ-କ୍ଷେତ୍ର ସହଯୋଗ ଏବଂ ଗଣମାଧ୍ୟମର ଯୋଗଦାନ ଉପରେ ମଧ୍ୟ ଗୁରୁତ୍ୱାରୋପ କରାଯାଇଥିଲା ।
ଡିପିଓ-ଏନଓପି ମମତା ମହାନ୍ତି ପ୍ରଥମେ ସ୍ୱାଗତ ଜଣାଇ ଏହି ବୈଠକ ଆରମ୍ଭ କରିଥିଲେ । ଯିଏକି ଓଡିଶାର ଅନ୍ୟତମ ପ୍ରଭାବିତ ଜିଲ୍ଲା କୋରାପୁଟରେ ପୁଷ୍ଟିହୀନତାର ସମାଧାନ ପାଇଁ ଗୁରୁତ୍ବପୂର୍ଣ ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ଡିପିଏମ୍ ଜିଲ୍ଲାରେ ଏସଏଏମ୍ ମ୍ୟାନେଜମେଣ୍ଟ ପାଇଁ ବିସ୍ତୃତ ରୂପରେଖ ଉପସ୍ଥାପନ କରିଥିଲେ । ଯେଉଁଥିରେ ଚାଲିଥିବା ପ୍ରୟାସ ଏବଂ ଯୋଜନା ଉପରେ ଆଲୋକପାତ କରିଥିଲେ ।
କୋରାପୁଟରେ ପ୍ରଭାବଶାଳୀ ପୁଷ୍ଟିକର ସମାଧାନ ଯୋଗାଇବା ପାଇଁ ଅଙ୍ଗନୱାଡି କେନ୍ଦ୍ର ଏବଂ ସ୍ଥାନୀୟ ସଂଗଠନର ତୃଣମୂଳସ୍ତରର ଯୋଗଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆମର ଲକ୍ଷ୍ୟ ହେଉଛି ଏହି ନେଟୱାର୍କ ଗୁଡ଼ିକୁ ମଜବୁତ କରିବା ଏବଂ ପୁଷ୍ଟିକର ଖାଦ୍ୟ ଜିଲ୍ଲାର ପ୍ରତ୍ୟେକ କୋଣରେ ପହଞ୍ଚିବା ନିଶ୍ଚିତ କରିବା ବୋଲି ସେ କହିଛନ୍ତି ।
ୟୁନିସେଫର ପୁଷ୍ଟିକର ବିଶେଷଜ୍ଞ ସୌରଭ ଭଟ୍ଟାଚାର୍ଯ୍ୟ ପୁଷ୍ଟିହୀନତାର ସମୀକ୍ଷା ଏବଂ ଏସଏଏମ ପରିଚାଳନାର ଗୁରୁତ୍ୱ ଉପରେ ଅଧିବେଶନର ନେତୃତ୍ୱ ନେଇଥିଲେ । “କୋରାପୁଟର 43 ପ୍ରତିଶତରୁ ଅଧିକ ପିଲା ଅବିକଶିତ ହୋଇଥିବାବେଳେ 16 ପ୍ରତିଶତ କୁପୋଷଣରେ ପୀଡିତ । ଜୀବନ ବଞ୍ଚାଇବା ଏବଂ ଆମ ପିଲାମାନଙ୍କ ପାଇଁ ସୁସ୍ଥ ଭବିଷ୍ୟତକୁ ପ୍ରୋତ୍ସାହିତ କରିବା ପାଇଁ ଆମକୁ ଗୁରୁତର କୁପୋଷଣ (ଏସଏଏମ) ପରିଚାଳନାକୁ ପ୍ରାଥମିକତା ଦେବାକୁ ପଡିବ ବୋଲି ସୌରଭ ଭଟ୍ଟାଚାର୍ଯ୍ୟ କହିଛନ୍ତି ।