ଭୁବନେଶ୍ୱର: କ୍ୟାପିଟାଲ ହସ୍ପିଟାଲରେ ଚିକିତ୍ସା ଅବହେଳାରୁ ଜଣେ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ହସ୍ପିଟାଲ ନିର୍ଦ୍ଦେଶକ ଲକ୍ଷ୍ମୀଧର ସାହୁ ଘଟଣାକୁ ଅତି ଗୁରୁତର ସହ ନେଇ ଅଧୀକ୍ଷକଙ୍କୁ ଏହାର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି ବୋଲି କହିଛନ୍ତି । ପରିବାର ଲୋକଙ୍କ ଅଭିଯୋଗ ଅନୁସାରେ ଭୁଲ୍ ଇଞ୍ଜେକ୍ସନ ପାଇଁ ରୋଗୀଙ୍କ ମୃତ୍ୟୁ ହୋଇଛି ।
ଶୁକ୍ରବାର ସକାଳେ ଛାତିରେ ଯନ୍ତ୍ରଣା କରୁଥିବା ଦୁଃଶାସନ ବେହେରାଙ୍କୁ କ୍ୟାପିଟାଲ ହସ୍ପିଟାଲ ଅଣାଯାଇଥିଲା । ଡାକ୍ତର ଗ୍ୟାଷ୍ଟ୍ରିକ ହୋଇଛି ବୋଲି କହି ଏକ ଇଞ୍ଜେକ୍ସନ ଦେଇ ଘରକୁ ନେଇଯିବାକୁ ପରାମର୍ଶ ଦେଇଥିଲେ । ଘରକୁ ଯିବା ରାସ୍ତାରେ ଦୁଃଶାସନ ପୁଣି ଯନ୍ତ୍ରଣା ଭୋଗିଥିଲେ । ପୁନଶ୍ଚ ହସ୍ପିଟାଲରେ ପହଞ୍ଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ବୋଲି ପରିବାର ଲୋକେ କହିଛନ୍ତି ।
ପରିବାର ଲୋକେ ଅଭିଯୋଗ କରିଥିଲେ ଯେ, ଡାକ୍ତରୀ ଅବହେଳା ଯୋଗୁଁ ରୋଗୀଙ୍କ ମୃତ୍ୟୁ ଘଟିଲା । ଅଭିଯୋଗ ନିର୍ଦ୍ଦେଶକଙ୍କ ନିକଟରେ ପହଞ୍ଚିବା ପରେ ସେ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି । ନିର୍ଦ୍ଦେଶକ ଲକ୍ଷ୍ମୀଧର ସାହୁ କହିଛନ୍ତି, ମୃତ ରୋଗୀଙ୍କୁ ତିନି ଜଣ ଡାକ୍ତର ଚିକିତ୍ସା କରୁଥିଲେ । ତାଙ୍କ ଇସିଜି ରିପୋର୍ଟ ମଧ୍ୟ ଠିକ୍ ଥିଲା । କିନ୍ତୁ ପରିବାର ଲୋକେ ତାଙ୍କୁ ଆଡ଼ମିଶନ କରିବାକୁ ଚାହୁଁଥିଲେ ।
ଏବେ ତଦନ୍ତରେ ଘରକୁ ନେଇଯିବାକୁ ପରାମର୍ଶ ଦେଇଥିବା ଡାକ୍ତରଙ୍କୁ ଖୋଜା ଚାଲିଛି । ଜଣାପଡ଼ିଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଲକ୍ଷ୍ମୀଧର ସାହୁ କହିଛନ୍ତି । ପରିବାର ଲୋକେ କହିଛନ୍ତି ଯେ, ଡାକ୍ତରଖାନାକୁ ପୁଣି ଫେରିବା ପରେ ପୂର୍ବରୁ ଚିକିତ୍ସା କରିଥିବା ଡାକ୍ତର ନଥିଲେ । ଆଉ ଜଣେ ଡାକ୍ତର ପ୍ରେସକ୍ରିପ୍ସନ ନେଇଯାଇଥିଲେ । ତା’ ପରେ ସେ ମଧ୍ୟ କୁଆଡ଼େ ଉଭେଇ ଗଲେ ।
Comments are closed.