ବୁର୍ଲା: ଟାଟା ପାୱାର ଏବଂ ଓଡ଼ିଶା ସରକାରଙ୍କ ଯୌଥ ଉଦ୍ୟୋଗ ଟିପି ୱେଷ୍ଟର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍ ପକ୍ଷରୁ ମାସବ୍ୟାପୀ ଚାଲିଥିବା ‘ସେବା ସେତୁ ଅଭିଯାନ’ ସଫଳତାର ସହ ଉଦ୍ଯାପିତ ହୋଇଯାଇଛି। ଏହି ଅଭିଯାନ ଜରିଆରେ ପଶ୍ଚିମ ଓଡ଼ିଶାର ବିଭିନ୍ନ ଅଞ୍ଚଳରେ ରୁଫ୍ଟପ୍ ସୋଲାର୍ ସେବାକୁ ଲୋକଙ୍କ ନିକଟତର କରାଯାଇପାରିଛି। ସେପ୍ଟେମ୍ବର ୧୭ ରୁ ଅକ୍ଟୋବର ୧୭ ପର୍ଯ୍ୟନ୍ତ ଆୟୋଜିତ ଏହି ସେବା ସେତୁ କାର୍ଯ୍ୟକ୍ରମ ଅନ୍ତର୍ଗତ ୭ଟି ଜିଲ୍ଲାରେ ୪୪ଟି କ୍ୟାମ୍ପ୍ ଆୟୋଜନ କରାଯାଇଥିଲା, ଯେଉଁଥିରେ ୨,୦୦୦ରୁ ଅଧିକ ଗ୍ରାହକ ଯୋଗଦେଇଥିଲେ ଏବଂ ୩୦୦ରୁ ଅଧିକ ଗ୍ରାହକଙ୍କ ଅଭିଯୋଗର ସମାଧାନ କରାଯାଇଥିଲା। ଏହି ଅଭିଯାନ କାଳରେ ପାଖାପାଖି ୧,୪୦୦ ରୁଫ୍ଟପ୍ ସୋଲାର୍ ଆବେଦନ ପଞ୍ଜୀକୃତ ହୋଇଥିବା ବେଳେ ୨୦୦ଟି ସୋଲାର୍ ସଂଯୋଗ ସଫଳତାର ସହ କାର୍ଯ୍ୟକ୍ଷମ କରାଯାଇଛି।
ଏହି ମାସବ୍ୟାପୀ ଅଭିଯାନ ସମ୍ବଲପୁର, ଝାରସୁଗୁଡ଼ା, ଦେବଗଡ଼, ସୁନ୍ଦରଗଡ଼, ବରଗଡ଼, ବଲାଙ୍ଗୀର ଏବଂ ନୂଆପଡ଼ା ଜିଲ୍ଲାରେ ପରିଚାଳିତ ହୋଇଥିଲା। କ୍ୟାମ୍ପଗୁଡ଼ିକରେ ନିୟୋଜିତ ସ୍ୱତନ୍ତ୍ର ଟିମ୍ ଗ୍ରାହକମାନଙ୍କୁ ‘ପ୍ରଧାନମନ୍ତ୍ରୀ ସୂର୍ଯ୍ୟ ଘର: ମୁଫତ୍ ବିଜଲି ଯୋଜନା’ ଏବଂ ‘ୟୁଟିଲିଟି ଲେଡ୍ ଏଗ୍ରିଗେସନ୍’ ମଡେଲ୍ ଅଧୀନରେ ରୁଫ୍ଟପ୍ ସୋଲାର୍ ପଞ୍ଜୀକରଣ ପାଇଁ ଆବଶ୍ୟକ ସହାୟତା ଯୋଗାଇଦେଇଥିଲେ। ଗ୍ରାହକମାନେ ଯେପରି ସୌର ଶକ୍ତି ଆପଣାଇବା ପାଇଁ ସଠିକ୍ ନିଷ୍ପତ୍ତି ନେଇପାରିବେ, ସେଥିପାଇଁ ସେମାନଙ୍କୁ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ମିଳୁଥିବା ସବ୍ସିଡି ଏବଂ ଉପଲବ୍ଧ ବ୍ୟାଙ୍କ ଫାଇନାନ୍ସିଂ ବିକଳ୍ପ ସମ୍ପର୍କରେ ସୂଚନା ଦିଆଯାଇଥିଲା।
ସମ୍ବଲପୁରର ରେଙ୍ଗାଲିଠାରେ ଟିପିଡବ୍ଲ୍ୟୁଓଡ଼ିଏଲ୍ ପକ୍ଷରୁ ଆୟୋଜିତ ଏକ ମେଗା ସେବା ସେତୁ କ୍ୟାମ୍ପ୍ ଏହି ଅଭିଯାନର ମୁଖ୍ୟ ଆକର୍ଷଣ ଥିଲା, ଯେଉଁଥିରେ ବହୁ ଲୋକଙ୍କ ସମାଗମ ହୋଇଥିଲା। ସମ୍ବଲପୁରର ସାଂସଦ ଧର୍ମେନ୍ଦ୍ର ପ୍ରଧାନ ଏହି କ୍ୟାମ୍ପ୍ରେ ଯୋଗଦେଇ ନାଗରିକମାନଙ୍କୁ ରୁଫ୍ଟପ୍ ସୋଲାର୍ ସମେତ ଅନ୍ୟାନ୍ୟ ସବୁଜ ଶକ୍ତି ବିକଳ୍ପ ବ୍ୟବହାର କରିବାକୁ ଉତ୍ସାହିତ କରିଥିଲେ। ଟିପିଡବ୍ଲ୍ୟୁଓଡ଼ିଏଲ୍ ଟିମ୍ ଘଟଣାସ୍ଥଳରେ ହିଁ ସୋଲାର୍ ପଞ୍ଜୀକରଣ ସହାୟତା ଯୋଗାଇବା ସହ ସବ୍ସିଡିର ଫାଇଦା ବୁଝାଇଥିଲେ ଏବଂ ଗ୍ରାହକଙ୍କ ପ୍ରଶ୍ନର ଉତ୍ତର ଦେଇ ସୌର ଶକ୍ତିର ବ୍ୟବହାର ଓ ଉପକାରିତା ବିଷୟରେ ସଚେତନ କରିଥିଲେ।
ଟିପିଡବ୍ଲ୍ୟୁଓଡ଼ିଏଲ୍ ନିଜର କାର୍ଯ୍ୟକାରୀ ଅଞ୍ଚଳରେ ୭୩,୦୦୦ରୁ ଅଧିକ ରୁଫ୍ଟପ୍ ସୋଲାର୍ ସଂଯୋଗ ସୁବିଧା ଯୋଗାଇଦେଇଛି, ଯେଉଁଥିରେ ୟୁଏଲ୍ଏ ମଡେଲ୍ ଅଧୀନରେ ୩୩,୫୮୭ ସଂଯୋଗ ଏବଂ କେପଏକ୍ସ ମଡେଲ୍ ଅଧୀନରେ ୪୦,୦୨୩ ସଂଯୋଗ ଏହାର ଅନ୍ତର୍ଭୁକ୍ତ, ଯାହା ପଶ୍ଚିମ ଓଡ଼ିଶାର ଗ୍ରାହକମାନଙ୍କ ମଧ୍ୟରେ ସ୍ୱଚ୍ଛ ଶକ୍ତିର ବୃଦ୍ଧିପାଉଥିବା ଆଗ୍ରହକୁ ଦର୍ଶାଉଛି। ସେପ୍ଟେମ୍ବର ୨୦୨୬ରେ ପଶ୍ଚିମ ଓଡ଼ିଶାର ଅନେକ ଗ୍ରାହକ ଶୂନ୍ୟ-ୟୁନିଟ୍ ବିଦ୍ୟୁତ୍ ବିଲ୍ ପାଇଛନ୍ତି। ଏହା ସାଧାରଣ ପରିବାରଗୁଡ଼ିକ ପାଇଁ ରୁଫ୍ଟପ୍ ସୋଲାର୍ ଆପଣାଇବାର ଆର୍ଥିକ ଫାଇଦାକୁ ପ୍ରମାଣିତ କରୁଛି।
ସେପ୍ଟେମ୍ବର ୧୭ ରୁ ଆରମ୍ଭ ହୋଇ ଅକ୍ଟୋବର ୧୭ ରେ ଶେଷ ହୋଇଥିବା ଏହି ‘ସେବା ସେତୁ ଅଭିଯାନ’ ସହରାଞ୍ଚଳ ଏବଂ ଗ୍ରାମାଞ୍ଚଳର ବ୍ଲକ୍ ସ୍ତରରେ ଏକ ସିଙ୍ଗଲ୍-ୱିଣ୍ଡୋ ସେବା ଭାବେ ଆୟୋଜିତ ହୋଇଥିଲା। ଏହି କ୍ୟାମ୍ପଗୁଡ଼ିକର ମୁଖ୍ୟ ଉଦ୍ଦେଶ୍ୟ ଥିଲା ନାଗରିକମାନଙ୍କୁ ବାରମ୍ବାର ବିଦ୍ୟୁତ୍ କାର୍ଯ୍ୟାଳୟକୁ ନଦୌଡ଼ାଇ ସେମାନଙ୍କର ବ୍ୟବହାରିକ ସମସ୍ୟାର ସମାଧାନ କରିବା ଏବଂ ସେମାନଙ୍କ ନିକଟରେ ଆବଶ୍ୟକୀୟ ସେବା ଓ ସ୍ୱଚ୍ଛ ଶକ୍ତି ସମାଧାନ ପହଞ୍ଚାଇବା।
Comments are closed.