ଭୁବନେଶ୍ୱର: ଦିନ ଦ୍ୱିପ୍ରହରରେ ରାଜଧାନୀର ବାପୁଜୀ ନଗରରେ ବୁଲିଲା ଖଣ୍ଡାକାତି । ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ଯୁବକଙ୍କୁ ସଂଘବଦ୍ଧ ଆକ୍ରମଣ ହୋଇଛି । ପୋଲିସ ଘଟଣା ସ୍ଥଳରେ ପହଞ୍ଚି ଗୁରୁତର ଆହତ ଯୁବକଙ୍କୁ ଚିକିତ୍ସା ପାଇଁ ପଠାଇବା ସହ ଘଟଣାର ତଦନ୍ତ କରୁଛି ।
ସୂଚନା ଅନୁଯାୟୀ, ସ୍ଥାନୀୟ ବସ୍ତିର ଦାଣ୍ଡିଆ ନାମକ ଯୁବକଙ୍କୁ ସେହି ବସ୍ତିର ଅନ୍ୟ କିଛି ଯୁବକ ପୂର୍ବ ଶତ୍ରୁତାକୁ କେନ୍ଦ୍ର କରି ଗୋଡାଇ ଗୋଡାଇ ଆକ୍ରମଣ କରିଥିଲେ । ଜୀବନ ବିକଳରେ ଦାଣ୍ଡିଆ ଦୌଡୁଥିବା ବେଳେ ସେମାନେ ତାଙ୍କ ହାତ ସମେତ ବିଭିନ୍ନ ଅଂଶକୁ ଖଣ୍ଡାରେ ହାଣି ପକାଇଥିଲେ । ଗୁରୁତର ଅବସ୍ଥାରେ ସେ ପଡି ଛଟପଟ ହେଉଥିବା ବେଳେ ଦୁର୍ବୁତମାନେ ଘଟଣା ସ୍ଥଳରୁ ଫେରାର ହୋଇଯାଇଥିଲେ । ତେବେ ଦାଣ୍ଡିଆଙ୍କ ସମ୍ପର୍କୀୟ ମାଆ ଓ ଅନ୍ୟମାନଙ୍କ କହିବା କଥା ସେହି ବସ୍ତିର ଶିବା ନାମକ ଯୁବକ ଓ ତାର ସାଥୀମାନେ ଏହି ଆକ୍ରମଣ କରିଛନ୍ତି ।
ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଦାଣ୍ଡିଆକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିବା ସହ ଘଟଣାର ତଦନ୍ତ ଚଳାଇଛି ।
Comments are closed.