ପାରାଦ୍ୱୀପ: ଜେଏସଡବ୍ଲୁ ପ୍ରକଳ୍ପକୁ ବିରୋଧ କରିବାକୁ ନୂଆଦିଲ୍ଲୀରୁ ଆସୁଛି ଟଙ୍କା । ଏକ ଏନଜିଓ ଏଥିପାଇଁ ଢିଙ୍କିଆ ଗାଁର କିଛି ଲୋକଙ୍କୁ ବର୍ଷ ହେବ ଟଙ୍କା ପଠାଉଛି। ଏପରି ଅଭିଯୋଗ ଆଣିଛନ୍ତି ଢିଙ୍କିଆ ଗ୍ରାମର କିଛି ଲୋକେ । ଯେଉଁମାନେ କି ସଂପୃକ୍ତ ଏନଜିଓ ଠାରୁ ପଇସା ପାଇଛନ୍ତି ବୋଲି କହିଛନ୍ତି । ଏହି ଘଟଣାରେ ଅଭୟଚନ୍ଦପୁର ଥାନା ତଦନ୍ତ ଆରମ୍ଭ କରିଛି । ଏଥିସହ ଗାଁର ଯେଉଁ ଲୋକ ଏପରି ଟଙ୍କା ପାଇଥିବା ନେଇ ଦାବି କରିଛନ୍ତି ସେମାନଙ୍କ ବ୍ୟାଙ୍କକୁ ପଇସା କିଏ ପଠାଇଛନ୍ତି ତାର ତଥ୍ୟ ମାଗିଛି ପୋଲିସ ।
ମିଳିଥିବା ସୂଚନା ଅନୁଯାୟୀ, ଜେଏସଡବ୍ଲୁ ପ୍ରକଳ୍ପକୁ ବିରୋଧ କରିବା ପାଇଁ ଜିନ୍ଦଲ ପ୍ରତିରୋଧ ସଙ୍ଗ୍ରାମ ସମିତି ନାମରେ ଏକ ସଂଗଠନ ରହିଛି। ଜେଏସଡବ୍ଲୁ ବିରୋଧୀ ନେତା ଦେବେନ୍ଦ୍ର ସ୍ୱାଇଁ ଗିରଫ ହେବା ପରେ ପ୍ରକଳ୍ପକୁ ବିରୋଧ କରୁଥିବା ନେତା ସେପରି ଆଉ ପତିଆରା ଦେଖାଇପାରୁ ନାହାନ୍ତି । ପ୍ରକଳ୍ପକୁ ବିରୋଧ କରି ଅନେକ ଗ୍ରାମବାସୀ ଜେଏସଡବ୍ଲୁ ବିରୋଧରେ ହାତ ମିଳାଇଥିଲେ ଏବଂ ପରବର୍ତ୍ତୀ ସମୟରେ କହିଛନ୍ତି ଯେ କମ୍ପାନୀ ବିରୋଧରେ କହିବାକୁ ବିଭିନ୍ନ ବ୍ୟାଙ୍କରୁ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ଆସିଛି। ବିଭିନ୍ନ ସମୟରେ ପ୍ରାୟ 200 ଜଣ ବିକ୍ଷୋଭକାରୀଙ୍କୁ ଏପରି ଟଙ୍କା ଆସିଛି ବୋଲି ସେମାନେ ଦାବି କରିଛନ୍ତି।
ଢିଙ୍କିଆର ସୁବାଷ ଚନ୍ଦ୍ର ନାୟକ ଅଭିଯୋଗ କରିଛନ୍ତି ଯେ ସେ ଗତ 12-13 ମାସ ମଧ୍ୟରେ ତାଙ୍କ ୟୁକୋ ବ୍ୟାଙ୍କ ଆକାଉଣ୍ଟରେ 1,250 ଟଙ୍କା ପାଇଛନ୍ତି। ସେହିଭଳି ଅନ୍ୟ ଜଣେ ଗ୍ରାମବାସୀ ଅଭିଯୋଗ କରିଛନ୍ତି ଯେ ଗତ ବର୍ଷ ଏପ୍ରିଲ 29ରୁ କୌଣସି ଅଜ୍ଞାତ ସଂସ୍ଥାରୁ ତାଙ୍କ ଆକାଉଣ୍ଟରେ 1,250 ଟଙ୍କା ଆସିଛି। ଏବେ ଉଭୟ ଏ ସମ୍ପର୍କରେ ସ୍ଥାନୀୟ ପୋଲିସ ଷ୍ଟେସନରେ ଅଭିଯୋଗ କରିଛନ୍ତି। ସେହିପରି ଗ୍ରାମବାସୀ ନିରୁପାମା ନାୟକ, ପ୍ରଶାନ୍ତ ଲେଙ୍କା ଏବଂ ବିବେକାନନ୍ଦ ମହାପାତ୍ର ମଧ୍ୟ ସମାନ ଅଭିଯୋଗ କରିଛନ୍ତି।
ସେମାନେ ଦାବି କରିଛନ୍ତି ଯେ ଜେଏସଡବ୍ଲୁ ବିରୋଧରେ ପ୍ରଦର୍ଶନ କରିବା ପାଇଁ ଏନଭିରୋନିକ୍ସ ଟ୍ରଷ୍ଟ (Environics Trust) ନାମକ ଏକ ସଂସ୍ଥା ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ପଠାଉଛନ୍ତି। ଉଲ୍ଲେଖଯୋଗ୍ୟ, ଏପରି ଏକ ଏନଜିଓ ସଂସ୍ଥା ନୂଆଦିଲ୍ଲୀରେ ରିହଛି।
ଅଭୟଚାନ୍ଦପୁର ଆଇଆଇସି ଜିବାନାନନ୍ଦ ଜେନା କହିଛନ୍ତି ଯେ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ଆସିଥିବା ଅଭିଯୋଗ ପାଇଛନ୍ତି। ଏ ନେଇ ବ୍ୟାଙ୍କ କର୍ତ୍ତୃପକ୍ଷଙ୍କ ନିକଟକୁ ଆବଶ୍ୟକ ତଥ୍ୟ ମଗାଯାଇଛି। ତଦନ୍ତ ଚାଲିଛି।
ଅନ୍ୟପଟେ ବିଭିନ୍ନ ସମୟରେ ସମାଜସେବୀ ସଂଗଠନ ଏବଂ ପ୍ରକଳ୍ପକୁ ବିରୋଧ କରୁଥିବା ନେତା ଅଭିଯୋଗ କରିଛନ୍ତି ଯେ ପୋଲିସ ଏବେ ଗ୍ରାମବାସୀଙ୍କୁ ଧମକାଇ ରଖିଛି । ପ୍ରକଳ୍ପ ବିରୋଧରେ କହିଲେ ଥାନାକୁ ଡାକି ନିର୍ଯାତନା ଦେଉଛି। ତେଣୁ ଦୀର୍ଘଦିନ ଧରି ଯେଉଁମାନେ ପଇସା ପାଇ ଚୁୁପ୍ ବସିଥିଲେ ଆଜି ହଠାତ୍ ପଇସା ପାଉଥିବା ନେଇ ମୁହଁ ଖୋଲିବା ପଛରେ ପୋଲିସର ହାତ ରହିଛି କି ତାହା ଏବେ ପ୍ରଶ୍ନ ଘେରରେ ?
Comments are closed.