କଟକ: ଚୌଦ୍ବାର ନିର୍ଗୁଣ୍ଡିରେ ନିକଟରେ ସରିଲା ରେଲୱେ ଟ୍ରାକ୍ ମରାମତି କାମ । ସକାଳ ୭ଟା ୧୫ ସୁଦ୍ଧା ମରାମତି କାମ ସରିଥିବା ନେଇ ସୂଚନା ମିଳିଛି । ଖୁବ୍ଶୀଘ୍ର ଟ୍ରେନ୍ ଚଳାଚଳ ହେବା ନେଇ ସୂଚନା ଦେଇଛି ରେଲୱେ ବିଭାଗ । ସେପଟେ କାହିଁକି ଲାଇନଚ୍ୟୁତ ହେଲା କାମାକ୍ଷା ଏକ୍ସପ୍ରେସ? କାରଣ ଖୋଜୁଛି ରେଲୱେ ସେଫ୍ଟି ବିଭାଗ । କଟକ ନିର୍ଗୁଣ୍ଡି ଷ୍ଟେସନରେ ଚାଲିଛି ତଦନ୍ତ ।
ରେଳ ଦୁର୍ଘଟଣା ପରେ ରାତି ସାରା ଟ୍ରାକ ମରାମତି କାମ ଜାରି ରହିଥିଲା । ନିର୍ଗୁଣ୍ଡି ଷ୍ଟେସନର ଦୁର୍ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି ବ୍ରିଜେସ କୁମାର ମିଶ୍ର । କୌଣସି ବ୍ୟକ୍ତି ଦୁର୍ଘଟଣା ସମ୍ପର୍କରେ କିଛି ତଥ୍ୟ ଦେବାକୁ ଚାହୁଁଥିଲେ ଖୋର୍ଦ୍ଧା ରୋଡ୍ ଡିଆରଏମ୍ ଅଫିସର ଯାଇ ତଥ୍ୟ ରଖିପାରିବେ । ଏହାଛଡ଼ା ସାଉଥ ଇଷ୍ଟର୍ଣ୍ଣ ସର୍କଲର କମିଶନର ଅଫ ରେଲୱେ ସେଫଟିକୁ ମଧ୍ୟ ଚିଠି ଲେଖି ଜଣାଇପାରିବେ ବୋଲି କହିଛି ରେଲୱେ ବିଭାଗ।
ସୂଚନାଯୋଗ୍ୟ, ଗତକାଲି ଜି ପୂର୍ବାହ୍ନ ପ୍ରାୟ ୧୧ଟା ୫୪ ମିନିଟରେ ଟ୍ରେନ୍ ନମ୍ବର ୧୨୫୫୧ ବେଙ୍ଗାଲୁରୁରୁ କାମାକ୍ଷା ଅଭିମୁଖେ ଯାଉଥିବା ସମୟରେ ଟ୍ରେନ୍ର କିଛି କୋଚ୍ ଟ୍ରାକରୁ ଖସି ପଡ଼ିଥିଲା। ତେବେ ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଗୁରୁତର ହୋଇଥିଲେ । ସଙ୍ଗେ ସଙ୍ଗେ ପ୍ରସ୍ତୁତ ହୋଇ ରହିଥିବା ଆମ୍ବୁଲାନ୍ସରେ ଆହତଙ୍କୁ ମେଡିକାଲ ନିଆଯାଇଥିଲା। ମୃତକ ପଶ୍ଚିମବଙ୍ଗର ଶୁଭଙ୍କର ରୟ ବୋଲି ସୂଚନା ମିଳିଛି । ମୃତକ ଏବଂ ଆହତଙ୍କ ପାଇଁ ସହାୟତା ରାଶି ଘୋଷଣା କରାଯାଇଛି । ମୃତକଙ୍କ ପାଇଁ ୫ ଲକ୍ଷର ସହାୟତା ରାଶି ଘୋଷଣା କରାଯାଇଥିବା ବେଳେ ଜଣେ ଗୁରୁତର ଆହତଙ୍କୁ ଅଢ଼େଇ ଲକ୍ଷ, ୨ ଆହତଙ୍କୁ ୫୦ ହଜାର ପ୍ରଦାନ କରାଯିବା ନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଏନେଇ ପୂର୍ବତଟ ରେଲୱେ ପକ୍ଷରୁ ସହାୟତା ନେଇ ସୂଚନା ଜାରି କରାଯାଇଛି । ଅନ୍ୟପଟେ ଘଟଣା ପରେ ଅନ୍ୟ ଟ୍ରେନ ମାନଙ୍କର ଗତିପଥରେ ପରିବର୍ତ୍ତନ କରାଯାଇଥିଲା ।
Comments are closed.