Latest Odisha News

ଅଷ୍ଟମ ଥର ପାଇଁ ଶପଥ ନେବେ ନୀତୀଶ : ତେଜସ୍ୱୀ ଦ୍ୱିତୀୟ ଥର ପାଇଁ ଉପମୁଖ୍ୟମନ୍ତ୍ରୀ, କ୍ୟାବିନେଟରେ ସାମିଲ ହେବେ ୩୫ ବିଧାୟକ !

ପାଟଣା: ଆଜି ବୁଧବାର ବିହାରରେ ମହାମେଣ୍ଟ ସରକାର ଶପଥ ନେବ । ବିହାରରେ ବିଜେପି-ଜେଡିୟୁ ଏନଡିଏ ସରକାର ଭାଙ୍ଗିବା ପରେ ୨୦୧୫ ଶୈଳୀରେ ନୂଆ ସରକାର ଗଠନ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି। ଆଜି ଅପରାହ୍ନ ୨ ଟାରେ ନୀତୀଶ କୁମାର ଅଷ୍ଟମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବାକୁ ଥିବାବେଳେ ଆରଜେଡି ନେତା ତେଜସ୍ୱୀ ଯାଦବ ଦ୍ୱିତୀୟ ଥର ଉପ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।

ବିହାରର ୧୬୪ ବିଧାୟକଙ୍କ ଏକ ବୃହତ ମିଳିତ ସରକାରର ସୂତ୍ର ମଧ୍ୟ ପ୍ରାୟ ନିଷ୍ପତ୍ତି ନିଆଯାଇଛି। କୁହାଯାଉଛି ଯେ ୩୫ ଜଣ ବିଧାୟକଙ୍କୁ ନେଇ କ୍ୟାବିନେଟ୍ ଗଠନ ପାଇଁ ପ୍ରସ୍ତୁତି ଚାଲିଛି। ଜେଡିୟୁ ଏବଂ ଆରଜେଡି କୋଟାରୁ ୧୪-୧୪ ମନ୍ତ୍ରୀ ହେବେ ବୋଲି ସୂଚନା ରହିଛି। ଏଥିସହିତ ଅନ୍ୟ ଦଳର ୭ ଜଣ ମନ୍ତ୍ରୀ ରହିବେ। ଏହି ମହାମେଂଟରେ ମୋଟ୍ ସାତୋଟି ରାଜନୈତିକ ଦଳ ଯୋଗଦେବେ।

ଏହାପୂର୍ବରୁ ଗତକାଲି ନୀତୀଶ କୁମାର ରାଜ୍ୟପାଳ ଫଗୁ ଚୌହାନଙ୍କୁ ଭେଟି ତାଙ୍କ ଇସ୍ତଫା ପତ୍ର ଦାଖଲ କରିଛନ୍ତି। ଏହାପରେ ସେ ସିଧାସଳଖ ଲାଲୁଙ୍କ ବାସଭବନରେ ପହଞ୍ଚି ସେଠାରେ ତେଜସ୍ୱୀ ଯାଦବଙ୍କୁ ଭେଟିଥିଲେ। ବାସଭବନରୁ ତେଜସ୍ୱୀ ଯାଦବ ଓ ସେ ପୁଣିଥରେ ରାଜ୍ୟପାଳଙ୍କ ନିକଟରେ ପହଞ୍ଚିଥିଲେ। ଉଭୟ ରାଜ୍ୟପାଳଙ୍କୁ ଭେଟି ମହାମେଣ୍ଟ ସରକାର ଗଠନ ପାଇଁ ଦାବି ଉପସ୍ଥାପନ କରିଥିଲେ।

୧୬୪ ବିଧାୟକଙ୍କ ସହଯୋଗରେ ନୀତୀଶ ରାଜ୍ୟପାଳଙ୍କୁ ଏକ ଦାବି ପତ୍ର ମଧ୍ୟ ଦେଇଛନ୍ତି। ନୀତୀଶ ନିଜର ଦାବି ଉପସ୍ଥାପନ କରିବାର କିଛି ଘଣ୍ଟା ପରେ ତାଙ୍କୁ ଗତକାଲି ରାଜଭବନରେ ଶପଥ ଗ୍ରହଣ କରିବାକୁ ମଧ୍ୟ ସମୟ ଦିଆଯାଇଥିଲା। ନୀତୀଶଙ୍କ ନୂଆ ସରକାରର ଶପଥ ଗ୍ରହଣ ଅପରାହ୍ନ ୨ ଟାରେ ହେବ।

କୁହାଯାଉଛି ଯେ ନୀତୀଶଙ୍କ ନୂଆ ସରକାରରେ ୩୫ ମନ୍ତ୍ରୀଙ୍କୁ ନେଇ ଶକ୍ତିଶାଳୀ କ୍ୟାବିନେଟ୍ ତିଆରି ହେବ। ସମସ୍ତ ଦଳ ନୂଆ ସରକାରରେ ଅନ୍ତର୍ଭୁକ୍ତ ହେବେ। ତେବେ ଆରଜେଡି ଗୃହ ମନ୍ତ୍ରଣାଳୟ ଦାବି କରିଛି। ଆରଜେଡି ଗୃହ ମନ୍ତ୍ରଣାଳୟକୁ ନିଜ ପାଖେ ରଖିବାକୁ ଚାହୁଁଛି।

Leave A Reply

Your email address will not be published.