ଏବେ ହେଲିକପ୍ଟରରେ କେଦାରନାଥ ଯିବା ପାଇଁ ଦେବାକୁ ପଡିବ ୨ ଗୁଣା ଅଧିକ ଟଙ୍କା…

ଡେରାଡୁନ: ଏଥର ହେଲିକପ୍ଟରରେ କେଦାରନାଥ ଧାମକୁ ଯାତ୍ରା କରିବା ଶ୍ରଦ୍ଧାଳୁମାନଙ୍କୁ ମହଙ୍ଗା ପଡିବ । ଉତ୍ତରାଖଣ୍ଡ ବେସାମରିକ ବିମାନ ଚଳାଚଳ ବିକାଶ ପ୍ରାଧିକରଣ (UCADA) ହେଲିକପ୍ଟର ଭଡ଼ା ୪୯ ପ୍ରତିଶତ ବୃଦ୍ଧି କରିଛି । ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA) ଚୂଡ଼ାନ୍ତ ଅନୁମତି ଦେଲେ ନୂତନ ଦର ସେପ୍ଟେମ୍ବର ୧୫ ରୁ ଲାଗୁ ହେବ ।

ଅନୁମତି ପାଇବା ପରେ ହିଁ, ସେପ୍ଟେମ୍ବର ୧୦ରୁ IRCTC ୱେବସାଇଟ୍ ରେ ଅନଲାଇନ୍ ଟିକେଟ୍ ବୁକିଂ ଆରମ୍ଭ ହେବ । ନୂତନ ଭଡ଼ା ହାର ଅନୁସାରେ, ଗୁପ୍ତକାଶୀରୁ କେଦାରନାଥ ପର୍ଯ୍ୟନ୍ତ ରାଉଣ୍ଡ ଟ୍ରିପ୍ ଭଡ଼ା ୧୨ ହଜାର ୪୪୪ ଟଙ୍କା ସ୍ଥିର କରାଯାଇଛି ।

ତେବେ ଫାଟାରୁ ଭଡ଼ା ୮,୯୦୦ ଟଙ୍କା ଏବଂ ସିରସିରୁ ୮,୫୦୦ ଟଙ୍କା ହେବ । ପୂର୍ବରୁ ଗୁପ୍ତକାଶୀରୁ ପ୍ରାୟ ୮,୫୦୦ ଟଙ୍କା ଏବଂ ଫାଟା ଏବଂ ସିରସିରୁ ପ୍ରାୟ ୬,୫୦୦ ଟଙ୍କାରେ ଟିକେଟ୍ ଉପଲବ୍ଧ ଥିଲା । ଏହାର ଅର୍ଥ ହେଉଛି ଯାତ୍ରୀମାନଙ୍କୁ ପୂର୍ବ ତୁଳନାରେ ପ୍ରାୟ ଚାରିରୁ ପାଞ୍ଚ ହଜାର ଟଙ୍କା ଅଧିକ ଦେବାକୁ ପଡିବ ।

ୟୁସିଏଡିଏ ସିଇଓ ଆଶିଷ ଚୌହାନ କହିଛନ୍ତି ଯେ, ଯାତ୍ରୀଙ୍କ ସୁରକ୍ଷାକୁ ଧ୍ୟାନରେ ରଖି, ଏଥର ହେଲିକପ୍ଟର ସେବାରେ ବୈଷୟିକ ଉନ୍ନତି କରାଯାଉଛି । ଚାରି ଧାମରେ ​​ଅଟୋମେଟିକ ଓ୍ବେଦର ଷ୍ଟେସନ ସ୍ଥାପନ କରାଯିବ, ଯାହା ପାଗ ବିଷୟରେ ସଠିକ୍ ଏବଂ ବାସ୍ତବ-ସମୟ ସୂଚନା ପ୍ରଦାନ କରିବ ।

ଏହା ବ୍ୟତୀତ, PTG କ୍ୟାମେରା, ATC, VHF ସେଟ୍ ଏବଂ ସିଲୋମିଟର ସ୍ଥାପନ କରାଯିବ । ଦୁଇଟି ନିୟନ୍ତ୍ରଣ କକ୍ଷ ମଧ୍ୟ ନିର୍ମାଣ କରାଯାଉଛି – ଗୋଟିଏ ଡେରାଡୁନର ସହସ୍ତ୍ରଧାରାରେ ଏବଂ ଅନ୍ୟଟି ସିରସିରେ । ଭୂମି ନିୟନ୍ତ୍ରଣ ପାଇଁ ୨୨ ଜଣ ଅପରେଟରଙ୍କ ଏକ ଟିମ୍ ନିୟୋଜିତ କରାଯିବ, ଯାହା ଦ୍ଵାରା ବିମାନଗୁଡିକ ନିରନ୍ତର ତଦାରଖ କରାଯାଇପାରିବ ।

ତେବେ ଗତ ବର୍ଷଗୁଡ଼ିକରେ ବଦ୍ରିନାଥ ଏବଂ ଗଙ୍ଗୋତ୍ରୀ ରୁଟରେ ହେଲିକପ୍ଟର ଦୁର୍ଘଟଣା ପରେ, DGCA ରାଜ୍ୟ ସରକାରଙ୍କୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ନିର୍ଦ୍ଦେଶ ଦେଇଥିଲା । ଏହି କ୍ରମରେ, ଗୃହ ସଚିବ ଶୈଳେଶ ବଗୌଲିଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଥିଲା, ଯିଏ ହେଲି ସେବାର ସୁରକ୍ଷା ସମ୍ପର୍କରେ ଅନେକ ସୁପାରିଶ ଦେଇଥିଲା । ସେହି ସୁପାରିଶ ଆଧାରରେ ନୂତନ ବ୍ୟବସ୍ଥା କାର୍ଯ୍ୟକାରୀ କରାଯାଉଛି ।