କୃଷି ଓ କୃଷକଙ୍କ ଉନ୍ନତି ଉପରେ ସରକାରଙ୍କ ଫୋକସ୍: ୧୫ ହଜାରରୁ ଊର୍ଦ୍ଧ୍ୱ ହେକ୍ଟର ଜମିକୁ ମିଳିବ ପାଣି
ଭୁବନେଶ୍ୱର: ରାଜ୍ୟରେ କୃଷି ଓ କୃଷକମାନଙ୍କର ଉନ୍ନତି ତଥା ଜଳସେଚନ ବ୍ୟବସ୍ଥାକୁ ସୁଦୃଢ଼ କରିବା ଦିଗରେ ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ବୁଧବାର ଦିନ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ୍ ବୈଠକରେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି କ୍ରମେ ରାଜ୍ୟର ୬୮୦ଟି କ୍ଷୁଦ୍ର ଜଳସେଚନ ପ୍ରକଳ୍ପର ପୁନରୁଦ୍ଧାର ପାଇଁ ମୋହର ବାଜିଛି। ଏହି ବିକାଶମୂଳକ କାର୍ଯ୍ୟ ଲାଗି ସରକାର ସମୁଦାୟ ୩୮୯ କୋଟି ଟଙ୍କାର ବ୍ୟୟବରାଦକୁ ଅନୁମୋଦନ ଦେଇଛନ୍ତି।
ରାଜ୍ୟର ବିଭିନ୍ନ ଅଞ୍ଚଳରେ ଅଚଳ ଅବସ୍ଥାରେ ପଡ଼ିଥିବା ବା ରକ୍ଷଣାବେକ୍ଷଣ ଅଭାବରୁ ବ୍ୟବହାର ଉପଯୋଗୀ ହୋଇପାରୁନଥିବା ଜଳାଶୟ ଓ କ୍ଷୁଦ୍ର ଜଳସେଚନ ପ୍ରକଳ୍ପଗୁଡ଼ିକୁ ସଜାଡ଼ିବା ପାଇଁ ସରକାରଙ୍କ ପକ୍ଷରୁ ଏହି ପଦକ୍ଷେପ ନିଆଯାଇଛି। ‘ଇମ୍ପ୍ରୁଭମେଣ୍ଟ ଟୁ ଟ୍ୟାଙ୍କ୍ସ ଆଣ୍ଡ ଏମଆଇପିଏସ – ଫେଜ୍ ୩’ (Improvement to Tanks & MIPs – Phase-III) ଯୋଜନା ଅଧୀନରେ ଆସନ୍ତା ୪ ବର୍ଷ ଅର୍ଥାତ୍ ଆର୍ଥିକ ବର୍ଷ ୨୦୨୬-୨୭ ରୁ ୨୦୨୯-୩୦ ମଧ୍ୟରେ ଏହି ପ୍ରକଳ୍ପଗୁଡ଼ିକର ନବୀକରଣ କାର୍ଯ୍ୟ ସମ୍ପୂର୍ଣ୍ଣ କରାଯିବା ନେଇ ଲକ୍ଷ୍ୟ ଧାର୍ଯ୍ୟ କରାଯାଇଛି।
ଏହି ଉଚ୍ଚାଭିଳାଷୀ ଯୋଜନା ସଫଳତାର ସହ କାର୍ଯ୍ୟକାରୀ ହେଲେ ରାଜ୍ୟର ପ୍ରାୟ ୧୫,୭୦୦ ହେକ୍ଟର ଚାଷଜମିକୁ ପୁଣିଥରେ ଜଳସେଚନ ସୁବିଧା ମିଳିପାରିବ। ବିଶେଷ କରି ଖରାଦିନେ ଚାଷ କାର୍ଯ୍ୟ ପାଇଁ ଯେଉଁ ସବୁ ଅଞ୍ଚଳରେ ପାଣିର ଘୋର ଅଭାବ ଦେଖାଦେଉଛି, ସେହି ଅଞ୍ଚଳର ଲକ୍ଷାଧିକ ଚାଷୀମାନେ ଏହାଦ୍ୱାରା ସର୍ବାଧିକ ଉପକୃତ ହେବେ। କ୍ଷୁଦ୍ର ଜଳସେଚନ ବ୍ୟବସ୍ଥାକୁ ପୁନର୍ଜୀବିତ କରିବା ଦ୍ୱାରା ଉଭୟ ଖରିଫ ଏବଂ ରବି ଋତୁରେ ଫସଲ ଅମଳ ଆଖିଦୃଶିଆ ଭାବେ ବୃଦ୍ଧି ପାଇବ ବୋଲି ସରକାର ଆଶା ରଖିଛନ୍ତି।
ସୂଚନାଯୋଗ୍ୟ ଯେ, ବୁଧବାର ଅନୁଷ୍ଠିତ ଏହି ଗୁରୁତ୍ୱପୂର୍ଣ୍ଣ କ୍ୟାବିନେଟ୍ ବୈଠକରେ ଜଳସେଚନ ବ୍ୟତୀତ ଆଇଟି, ନବୀକରଣଯୋଗ୍ୟ ଶକ୍ତି, ଶିଶୁ କଲ୍ୟାଣ ଏବଂ ଅନ୍ୟାନ୍ୟ ବିଭାଗର ମୋଟ ୧୦ଟି ପ୍ରସ୍ତାବ ଉପରେ ଆଲୋଚନା କରାଯାଇ ଅନୁମୋଦନ ଦିଆଯାଇଛି। ତେବେ ରାଜ୍ୟ ସରକାରଙ୍କ ଏହି ନିଷ୍ପତ୍ତିକୁ ବିଭିନ୍ନ କୃଷକ ସଂଗଠନ ଓ ସାଧାରଣ ଚାଷୀମାନେ ବେଶ୍ ସ୍ୱାଗତ କରିଛନ୍ତି।
