ଭୁବନେଶ୍ୱର: ରାଜ୍ୟରେ ବିକଶିତ ହୋଇନଥିବା ଅଞ୍ଚଳରେ ପ୍ରସ୍ତୁତ ହେଉଥିବା ପାରମ୍ପରିକ ଉତ୍ପାଦଗୁଡ଼ିକୁ ପ୍ରୋତ୍ସାହିତ କରିବା ପାଇଁ ମଙ୍ଗଳବାର ଦିନ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସପ୍ତାହବ୍ୟାପୀ ‘ଆକାଂକ୍ଷା ହାଟ ଅଭିଯାନ’ ଆରମ୍ଭ କରିଛନ୍ତି। ଏହି ଅଭିଯାନ ଭୁବନେଶ୍ୱରର ରାଜ୍ୟ ସମ୍ମିଳନୀ କେନ୍ଦ୍ରରେ ଯୋଜନା ଏବଂ ଅଭିସରଣ ବିଭାଗ ଦ୍ୱାରା ଆୟୋଜିତ ‘ସମ୍ପୂର୍ଣ୍ଣତା ଅଭିଯାନ ସମ୍ମାନ ସମାରୋହ’ ସମୟରେ ଆରମ୍ଭ କରାଯାଇଥିଲା।
ତେବେ ଏହି କାର୍ଯ୍ୟକ୍ରମ ସ୍ୱାସ୍ଥ୍ୟ, ଶିକ୍ଷା, କୃଷି, ଜଳସମ୍ପଦ, ଦକ୍ଷତା ବିକାଶ ଏବଂ ଆର୍ଥିକ ଅନ୍ତର୍ଭୁକ୍ତି ଭଳି ସାମାଜିକ-ଆର୍ଥିକ ସୂଚକଗୁଡ଼ିକୁ ଉନ୍ନତ କରିବାରେ ସହାୟକ ହୋଇଥିବା ନେଇ ମୁଖ୍ୟମନ୍ତ୍ରୀ କହିଛନ୍ତି। ତେବେ ଏହା ତିନୋଟି ମୂଳ ନୀତି ଦ୍ୱାରା ପରିଚାଳିତ ହୋଇଥାଏ ଯେପରିକି ଅଭିସରଣ (କେନ୍ଦ୍ର ଏବଂ ରାଜ୍ୟ ଯୋଜନାଗୁଡ଼ିକୁ ସମନ୍ୱୟ କରିବା), ସହଯୋଗ (ଭାଗୀଦାରମାନଙ୍କ ମଧ୍ୟରେ ସହଯୋଗ ସୁନିଶ୍ଚିତ କରିବା), ଏବଂ ପ୍ରତିଯୋଗିତା (କାର୍ଯ୍ୟଦକ୍ଷତା ସୂଚକ ଉପରେ ଆଧାରିତ ସୁସ୍ଥ ପ୍ରତିଦ୍ୱନ୍ଦ୍ୱିତାକୁ ପ୍ରୋତ୍ସାହିତ କରିବା)।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ପରିଚାଳିତ ହେଉଥିବା ‘ଭୋକାଲ୍ ଫର୍ ଲୋକାଲ’ ଆନ୍ଦୋଳନକୁ ନେଇ ମୁଖ୍ୟମନ୍ତ୍ରୀ କହିଛନ୍ତି ଯେ ସ୍ଥାନୀୟ ଉତ୍ପାଦକମାନଙ୍କୁ ସମର୍ଥନ କରିବା ପାଇଁ ଓଡ଼ିଶା ୨୦୨୪ ରେ ‘ଆକାଂକ୍ଷା’ ବ୍ରାଣ୍ଡ ଲଞ୍ଚ କରିଥିଲା। ମହିଳା ସ୍ୱୟଂ ସହାୟକ ଗୋଷ୍ଠୀ (ଏସଏଚଜି), ଚାଷୀ, କାରିଗର ଏବଂ ବୁଣାକାରଙ୍କ ସମେତ ଗ୍ରାମୀଣ ଉଦ୍ୟୋଗୀମାନଙ୍କୁ ଉତ୍ସାହିତ କରି ସେମାନଙ୍କୁ ଆଗକୁ ବଢ଼ାଇବା ଏହାର ମୂଳ ଲକ୍ଷ୍ୟ ଥିବା ନେଇ କହିଛନ୍ତି। ତେବେ ଏହି ସମୟରେ ପ୍ରଦର୍ଶିତ ହୋଇଥିବା ଉତ୍ପାଦଗୁଡ଼ିକୁ ଡିଜିଟାଲ୍ ଇ-ମାର୍କେଟପ୍ଲେସରେ ମଧ୍ୟ ଉପଲବ୍ଧ କରାଯିବ ଯାହାଫଳରେ ଏହା ଅଧିକରୁ ଅଧିକ ଲୋକଙ୍କ ପାଖରେ ପହଞ୍ଚିବା ସହ ବଜାର ଚାହିଦା ମଧ୍ୟ ବୃଦ୍ଧି ପାଇବ।
୧୬୫ କୋଟି ଟଙ୍କାର ପୁରସ୍କାର ଜିତିଥିବା ଓଡ଼ିଶାର ଆକାଂକ୍ଷୀ ଜିଲ୍ଲା ଏବଂ ବ୍ଲକଗୁଡ଼ିକର ପ୍ରଦର୍ଶନକୁ ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି। ତେବେ ମାଲକାନଗିରି ଏବଂ ନବରଙ୍ଗପୁର ଜିଲ୍ଲା ସ୍ୱର୍ଣ୍ଣ ପଦକ ପାଇଥିବା ବେଳେ କନ୍ଧମାଳ ଏବଂ କୋରାପୁଟ ରୌପ୍ୟ ପଦକ ପାଇଛନ୍ତି। ସେହିପରି ଢେଙ୍କାନାଳ, ଗଜପତି, କଳାହାଣ୍ଡି ଏବଂ ନୂଆପଡ଼ା ଜିଲ୍ଲା କାଂସ୍ୟ ପଦକ ପାଇଛନ୍ତି।ଏଥିସହିତ ଆକାଂକ୍ଷୀ ବ୍ଲକରେ ଥିବା ଖଇରପୁଟ, ମାଥିଲି, ଚିତ୍ରକୋଣ୍ଡା ଏବଂ ଡାବୁଗାଁ ସ୍ୱର୍ଣ୍ଣ ପଦକ ଜିତିଥିବା ଜଣାପଡ଼ିଛି।
ପୁରସ୍କୃତ ହୋଇଥିବା ବ୍ୟକ୍ତି ମାନଙ୍କୁ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇଥିଲେ। ତେବେ ଉନ୍ନୟନ କମିଶନର ୨୦୩୬ ସୁଦ୍ଧା ଏକ ସମୃଦ୍ଧ ଓଡ଼ିଶା ତିଆରି କରିବା ସହ ଦୂରଦୂରାନ୍ତ ଅଞ୍ଚଳରେ ପହଞ୍ଚିବା ନେଇ ଗୁରୁତ୍ୱାରୋପ କରିଛନ୍ତି।
Comments are closed.