ଓଡ଼ିଶା ସରକାର ଓ BGU ମଧ୍ୟରେ ଚୁକ୍ତି; ‘ଅଦ୍ୱିକା’ ଯୋଜନାରେ କିଶୋରୀମାନେ ପାଇବେ ଦକ୍ଷତା ପ୍ରଶିକ୍ଷଣ

ଭୁବନେଶ୍ୱର: ଓଡ଼ିଶାର ଗଣପର୍ବ ‘ରଜ’ କେବଳ ଏକ ପାରମ୍ପରିକ ଉତ୍ସବ ନୁହେଁ, ବରଂ ଏହା କିଶୋର-କିଶୋରୀ, ବିଶେଷ କରି କିଶୋରୀମାନଙ୍କ ସଶକ୍ତୀକରଣ, ସ୍ଵାଧୀନତା ଏବଂ ସେମାନଙ୍କ ଗୌରବର ଏକ ମହାନ ପ୍ରତୀକ। ‘ରଜ ପର୍ବ’ ଏକ ଉତ୍ସାହପୂର୍ଣ୍ଣ ଚାରିଦିନିଆ ଉତ୍ସବ, ଯାହା ନାରୀତ୍ୱ, ପ୍ରଜନନ ଶକ୍ତି ଏବଂ କୃଷିକୁ ସମ୍ମାନ ଜଣାଇଥାଏ। ଏହି ପର୍ବର ମୁଖ୍ୟ ବିଷୟବସ୍ତୁ ହେଉଛି କିଶୋରୀମାନଙ୍କୁ ଯୌବନକାଳୀନ ପ୍ରଜନନ ଶକ୍ତିର ପ୍ରତୀକ ଭାବରେ ସମ୍ମାନ ପ୍ରଦାନ କରିବା।

ଓଡ଼ିଶା ସରକାର ଓ ଭୁବନେଶ୍ୱରସ୍ଥିତ ବିର୍ଲା ଗ୍ଲୋବାଲ୍ ୟୁନିଭର୍ସିଟି (BGU) ମଧ୍ୟରେ ରାଜ୍ୟର କିଶୋରୀ ଓ ଯୁବତୀମାନଙ୍କ ସଶକ୍ତିକରଣ ପାଇଁ ଏକ ଗୁରୁତ୍ୱପୂର୍ଣ୍ଣ ଚୁକ୍ତି (MoU) ସ୍ଵାକ୍ଷରିତ ହୋଇଛି। ରାଜ୍ୟ ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ଏବଂ ବିଜିୟୁ (BGU) ମଧ୍ୟରେ ଏହି ଚୁକ୍ତିନାମା ସ୍ଵାକ୍ଷର ହୋଇଛି, ଯାହା ରାଜ୍ୟ ସରକାରଙ୍କ ପ୍ରମୁଖ କାର୍ଯ୍ୟକ୍ରମ ‘ଅଦ୍ଵିକା’ (ADVIKA – A Path to Adolescent Empowerment) ଅଧୀନରେ କ୍ଷମତା ବିକାଶ ଓ ଦକ୍ଷତା ବୃଦ୍ଧି ପାଇଁ ଉଦ୍ଦିଷ୍ଟ।

ଏହି ପୁରୁଣା ପରମ୍ପରା ଓଡ଼ିଶା ସରକାରଙ୍କ ‘ଅଦ୍ଵିକା’ କାର୍ଯ୍ୟକ୍ରମ ମାଧ୍ୟମରେ ଏକ ଆଧୁନିକ ରୂପ ନେଇଛି। ଏହି କାର୍ଯ୍ୟକ୍ରମର ଲକ୍ଷ୍ୟ ହେଉଛି ୧୦ ରୁ ୧୯ ବର୍ଷ ବୟସର କିଶୋରୀ ଓ ପିଲାମାନଙ୍କ ମଧ୍ୟରେ ଜୀବନ ଜିଇଁବାର ଶୈଳୀ (Life Skills), ନେତୃତ୍ଵ ନେବାର କ୍ଷମତା (Leadership) ଏବଂ ଡିଜିଟାଲ୍ ସଚେତନତା (Digital Awareness) ବୃଦ୍ଧି କରି ସେମାନଙ୍କୁ ସଶକ୍ତ କରିବା। ପ୍ରତି ଶନିବାର ଆୟୋଜିତ ହେଉଥିବା ଜୀବନ କୌଶଳ ଶିକ୍ଷା (life-skills education) ଏବଂ ସଚେତନତା ସୃଷ୍ଟି କାର୍ଯ୍ୟକ୍ରମ ମାଧ୍ୟମରେ ଏହା ସେମାନଙ୍କ ନିକଟରେ ପହଞ୍ଚାଇବ।

ଚୁକ୍ତିନାମା ଅନୁଯାୟୀ, ଭୁବନେଶ୍ୱର ବିଜିୟୁ (BGU) କ୍ୟାମ୍ପସରେ ୫୦ ଜଣ ଅଦ୍ଵିକା ହିତାଧିକାରୀଙ୍କ ପାଇଁ ଏକ ୬ ଦିନିଆ ଆବାସିକ ପ୍ରଶିକ୍ଷଣ କାର୍ଯ୍ୟକ୍ରମ ଆୟୋଜିତ ହେବ। ସେହିପରି ପୁରୀ ଜିଲ୍ଲାର ନିମାପଡ଼ା ବ୍ଲକରେ ୫୦ ଜଣ ପିଅର ଲିଡର (Peer Leaders) ଙ୍କ ପାଇଁ ଏକ ୪ ସପ୍ତାହର ଗୋଷ୍ଠୀ-ଭିତ୍ତିକ ଶିକ୍ଷଣ ପ୍ରଦାନ କରାଯିବ, ଯାହା ଦ୍ୱାରା ସେମାନେ ସ୍ଥାନୀୟ ଅଞ୍ଚଳର କିଶୋରୀମାନଙ୍କୁ ସଠିକ୍ ମାର୍ଗଦର୍ଶନ ଦେଇପାରିବେ। ମହିଳା ଓ ଶିଶୁ ବିକାଶ ବିଭାଗର କମିଶନର-ତଥା-ଶାସନ ସଚିବ ଡ. ମୃଣାଳିନୀ ଦର୍ଶୱାଲ ଏବଂ ବିଜିୟୁ (BGU) ର କୁଳପତି ପ୍ରଫେସର କୁଳଭୂଷଣ ବାଲୁନିଙ୍କ ଉପସ୍ଥିତିରେ ଏହି ଚୁକ୍ତିନାମା ସ୍ଵାକ୍ଷରିତ ହୋଇଛି।