କୋଭିଡ୍ ରୋଗୀଙ୍କ ଚିକିତ୍ସା ଲାଗି ୫୦ ପ୍ରତିଶତ ବେଡ୍ ରଖିବାକୁ ଘରୋଇ ହସ୍ପିଟାଲକୁ ନିର୍ଦ୍ଦେଶ

ଭୁବନେଶ୍ୱର: ରାଜ୍ୟରେ ଦୈନିକ ସଂକ୍ରମିତଙ୍କ ସଂଖ୍ୟା ୬ ହଜାର ଟପିଥିବା ବେଳେ ସକ୍ରିୟ ସଂକ୍ରମିତଙ୍କ ସଂଖ୍ୟା ୩୫ହଜାର ଡେଇଁଛି । ବଢ଼ୁଥିବା ସଂକ୍ରମଣକୁ ଦେଖି ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଘରୋଇ ହସ୍ପିଟାଲଗୁଡ଼ିକୁ ନୂଆ ନିର୍ଦ୍ଦେଶନାମା ଜାରି କରିଛନ୍ତି । ଘରୋଇ ହସ୍ପିଟାଲଗୁଡ଼ିକରେ ଉପଲବ୍ଧ ଶଯ୍ୟାର ୫୦ ପ୍ରତିଶତ କୋଭିଡ୍ ଆକ୍ରାନ୍ତଙ୍କ ଲାଗି ରଖିବାକୁ କୁହାଯାଇଛି ।

ଏଥିସହ ଘରୋଇ ହସ୍ପିଟାଲରେ ଚିକିତ୍ସା ବେଳେ ଅନେକ କୋଭିଡ୍ ସଂକ୍ରମିତ ହେଉଛନ୍ତି । ଫଳରେ ସେମାନଙ୍କୁ ସରକାରୀ କୋଭିଡ୍ ହସ୍ପିଟାଲ ଆଣିବାକୁ ପଡ଼ୁଛି । ଅନେକ ସମୟରେ ବେଡ୍ ନଥିବା ଦର୍ଶାଇ କୋଭିଡ୍ ସଂକ୍ରମିତଙ୍କୁ ଘରୋଇ ହସ୍ପିଟାଲ ଚିକିତ୍ସା କରୁନାହାଁନ୍ତି । ଆଉ କିଛି ଘରୋଇ ହସ୍ପିଟାଲ କୋଭିଡ୍ ସଂକ୍ରମିତଙ୍କ ଲାଗି ଅଳ୍ପ କିଛି ବେଡ୍ ରଖିଛନ୍ତି । ଫଳରେ ସରକାରୀ କୋଭିଡ୍ ହସ୍ପିଟାଲ ଉପରେ ଲୋଡ୍ ବଢ଼ୁଛି ।

ଏସବୁକୁ ଦେଖି ଘରୋଇ ହସ୍ପିଟାଲରେ ସର୍ବନିମ୍ନ ୩୦ଟି ଶଯ୍ୟାରୁ ଅଧିକ ଥିଲେ ସେଥିରୁ ୫୦ ପ୍ରତିଶତ କୋଭିଡ୍ ରୋଗୀଙ୍କ ଲାଗି ରଖିବାକୁ ନିର୍ଦ୍ଦେଶ ଦିଆଯାଇଛି । ସେହଭଳି ଉପଲବ୍ଧ ଆଇସିୟୁ/ଏଚଡିୟୁ ବେଡର ୫୦ ପ୍ରତିଶତ କୋଭିଡ୍ ସଂକ୍ରମିତଙ୍କ ଲାଗି ରଖିବାକୁ ଘରୋଇ ହସ୍ପିଟାଲଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ଏଥିସହ ସ୍ୱାସ୍ଥ୍ୟ ବିଭାଗ ଜାରି କରିଥିବା କୋଭିଡ୍ ଗାଇଡଲାଇନ୍ ପାଳନ କରିବାକୁ କୁହାଯାଇଛି । ଏପରିକି ସଂକ୍ରମଣ ବଢ଼ିଲେ ଶତପ୍ରତିଶତ ବେଡ୍ ବ୍ୟବହାର ପାଇଁ କୁହାଯାଇଛି ।

କୋଭିଡ୍ ଚିକିତ୍ସା ଲାଗି ବ୍ୟବହୃତ ଶଯ୍ୟା ନେଇ ହସ୍ପିଟାଲ କର୍ତ୍ତୃପକ୍ଷ ଜିଲ୍ଲାପାଳଙ୍କ ସହ ରାଜ୍ୟ ସ୍ତରୀୟ ଅଧିକାରୀଙ୍କୁ ଜଣାଇବେ । ଏଥିପାଇଁ ଘରୋଇ ହସ୍ପିଟାଲ ଜଣେ ସ୍ୱତନ୍ତ୍ର ମେଡିକାଲ ଅଫିସରଙ୍କୁ ନିୟୋଜିତ କରିବେ । ଏଥିସହ ଘରୋଇ ହସ୍ପିଟାଲରେ କୋଭିଡ୍ ରୋଗୀଙ୍କ ଚିକିତ୍ସା ଲାଗି ବେଡ୍ ଦର ଧାର୍ଯ୍ୟ କରିଛି ସ୍ୱାସ୍ଥ୍ୟ ବିଭାଗ ।

ସାଧାରଣ ଶଯ୍ୟା ଲାଗି ଦିନକୁ ୧୨୦୦ ଟଙ୍କା, NABH ମାନ୍ୟତା ଥିଲେ ୩୦୦୦ ଟଙ୍କା

ଆଇସିୟୁ ଦିନକୁ ୨୦୦୦ ଟଙ୍କା, NABH ମାନ୍ୟତା ଥିଲେ ୫୦୦୦ ଟଙ୍କା

ଆଇସିୟୁ ସହ ଭେଣ୍ଟିଲେଟର ୨୦୦୦ ଟଙ୍କା, NABH ମାନ୍ୟତା ଥିଲେ ୩୦୦୦ ଟଙ୍କା