୧୭ଜିଲ୍ଲାରେ ନଭେମ୍ବର ୨୪ ଯାଏଁ ପୋଲିଓ ଟିକାକରଣ ଅଭିଯାନ; ବାଲିଯାତ୍ରା ପଡ଼ିଆରେ ଶିଶୁଙ୍କ ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା
ଭୁବନେଶ୍ୱର: ଓଡ଼ିଶାର ୧୭ଟି ଜିଲ୍ଲାରେ ଆଜି ଠାରୁ ନଭେମ୍ବ ୨୪ ତାରିଖ ପର୍ଯ୍ୟନ୍ତ ଚାଲିବ ସବ୍-ନ୍ୟାସନାଲ୍ ଇମ୍ୟୁନାଇଜେସନ୍ ଡେ (SNID) ଅଭିଯାନ । ଏହି ଅଭିଯାନରେ ୫ ବର୍ଷରୁ କମ୍ ବୟସର ୨୬ ଲକ୍ଷରୁ ଅଧିକ ଶିଶୁଙ୍କୁ ପୋଲିଓ ବୁନ୍ଦା ଦେବାକୁ ଲକ୍ଷ୍ୟ ରଖାଯାଇଛି । ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ଼. ମୁକେଶ ମହାଲିଙ୍ଗ ଭୁବନେଶ୍ୱରସ୍ଥିତ ଆଇଆରସି ଭିଲେଜ୍ର ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର (UPHC) ଠାରେ ଛୋଟ ପିଲାଙ୍କୁ ନିଜେ ପୋଲିଓ ଖୁଆଇ ଅଭିଯାନର ଶୁଭାରମ୍ଭ କରିଛନ୍ତି ।
ଏହାସହିତ କଟକର ପ୍ରସିଦ୍ଧ ବାଲିଯାତ୍ରା ପଡ଼ିଆରେ ସ୍ୱତନ୍ତ୍ର ପୋଲିଓ ଟିକାକରଣ କିଓସ୍କ ସ୍ଥାପନ କରାଯାଇଛି । ଯାତ୍ରାକୁ ଆସୁଥିବା କିମ୍ବା ଯାତ୍ରା ସମୟରେ ଯାତାୟତ କରୁଥିବା କୌଣସି ଶିଶୁ ଯେପରି ଟିକାକରଣରୁ ବଞ୍ଚିତ ନହୁଏ, ସେଥିପାଇଁ ଏହି ବ୍ୟବସ୍ଥା କରାଯାଇଛି।
ଅନୁଗୋଳ, ବାଲେଶ୍ୱର, ଭଦ୍ରକ, ବୌଦ୍ଧ, କଟକ, ଗଜପତି, ଗଞ୍ଜାମ, ଯାଜପୁର, ଝାରସୁଗୁଡ଼ା, କଳାହାଣ୍ଡି, କେନ୍ଦୁଝର, ଖୋର୍ଦ୍ଧା, ମାଲକାନଗିରି, ମୟୂରଭଞ୍ଜ, ପୁରୀ, ସମ୍ବଲପୁର ଓ ସୁନ୍ଦରଗଡ଼ ଜିଲ୍ଲାରେ ଏହି ଅଭିଯାନ କାର୍ଯ୍ୟକାରୀ ହେବ ଏବଂ ୨୬ ଲକ୍ଷରୁ ଅଧିକ ଶିଶୁଙ୍କୁ ପୋଲିଓ ଟିକା ପ୍ରଦାନ କରିବାର ଲକ୍ଷ୍ୟ ରହିଛି ।
“୨୦୧୪ରୁ ଭାରତ ପୋଲିଓମୁକ୍ତ ରହିଥିବାବେଳେ ଓଡ଼ିଶା ୨୦୦୮ ମସିହାରୁ ପୋଲିଓମୁକ୍ତ ସ୍ଥିତି ବଜାୟ ରଖିଛି । ତେବେ ବିଶ୍ୱରୁ ପୋଲିଓ ସମ୍ପୂର୍ଣ୍ଣ ନିର୍ମୂଳ ନହେବା ପର୍ଯ୍ୟନ୍ତ ଶିଶୁମାନଙ୍କ ମଧ୍ୟରେ ଉଚ୍ଚ ପ୍ରତିରୋଧକ କ୍ଷମତା ବଜାୟ ରଖିବା ଅତ୍ୟନ୍ତ ଜରୁରୀ । କୌଣସି ଶିଶୁ ଯେପରି ଟିକାକରଣରୁ ବଞ୍ଚିତ ନହୁଏ, କୌଣସି ଅଞ୍ଚଳ ଯେପରି ଅଣଦେଖା ନହୁଏ ଏବଂ ଟିକାକରଣର କୌଣସି ସୁଯୋଗ ଯେପରି ହାତଛଡ଼ା ନହୁଏ, ସେଥିପାଇଁ ଆମେ ସମସ୍ତେ ମିଳିତ ଭାବେ ସଂକଳ୍ପବଦ୍ଧ ହୋଇ କାର୍ଯ୍ୟ କରିବା। ପ୍ରତ୍ୟେକ ଶିଶୁର ସୁରକ୍ଷା ସୁନିଶ୍ଚିତ କରିବା ସହ ଓଡ଼ିଶାକୁ ପୋଲିଓମୁକ୍ତ ରଖିବା ଆମ ସମସ୍ତଙ୍କ ସାମୂହିକ ଦାୟିତ୍ୱ” ବୋଲି ସ୍ବାସ୍ଥ୍ୟ ମନ୍ତ୍ରୀ କହିଛନ୍ତି। ଚଳିତ ବର୍ଷ ଜୁନ୍ ମାସରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ପୋଲିଓ ଟିକାକରଣରେ ଓଡ଼ିଶାରେ ପାଞ୍ଚ ବର୍ଷରୁ କମ୍ ବୟସର ପ୍ରାୟ ୩୭.୪୮ ଲକ୍ଷ ଶିଶୁଙ୍କୁ ଟିକା ପ୍ରଦାନ କରାଯାଇଥିଲା।
ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ନିର୍ଦ୍ଦେଶ ଅନୁଯାୟୀ, ସମ୍ଭାବ୍ୟ ପ୍ରତିରୋଧକ କ୍ଷମତାର ଅଭାବକୁ ଦୂର କରିବା ଏବଂ ପୋଲିଓ ଭୂତାଣୁ ବିରୋଧରେ ଶିଶୁମାନଙ୍କ ସୁରକ୍ଷାକୁ ଅଧିକ ସୁଦୃଢ଼ କରିବା ଲକ୍ଷ୍ୟରେ ଏହି ସ୍ୱତନ୍ତ୍ର ଅଭିଯାନ ଆୟୋଜନ କରାଯାଉଛି।
ଅଭିଯାନର ସଫଳ ରୂପାୟନ ଏବଂ ଶେଷ ପର୍ଯ୍ୟାୟ ପର୍ଯ୍ୟନ୍ତ ଟିକାକରଣ ସୁନିଶ୍ଚିତ କରିବା ପାଇଁ ୧୭ଟି ଜିଲ୍ଲାରେ ୧୨,୯୦୮ଟି ଟିକାକରଣ ବୁଥ୍ ସ୍ଥାପନ କରାଯାଇଛି। ରେଳ ଷ୍ଟେସନ୍, ବସ୍ ଷ୍ଟାଣ୍ଡ ଓ ପ୍ରମୁଖ ଯାତାୟତ ସ୍ଥଳରେ ଶିଶୁମାନଙ୍କୁ ଟିକା ଦେବା ପାଇଁ ୭୩୯ଟି ଟ୍ରାଞ୍ଜିଟ୍ ଟିମ୍ ନିୟୋଜିତ ହେବା ସହ ଦୁର୍ଗମ ଅଞ୍ଚଳ, ନିର୍ମାଣସ୍ଥଳୀ, ଇଟାଭାଟି ଏବଂ ଅନ୍ୟାନ୍ୟ ଅପହଞ୍ଚ ଅଞ୍ଚଳରେ ଟିକାକରଣ ପାଇଁ ୪୦୦ଟି ମୋବାଇଲ୍ ଟିମ୍ କାର୍ଯ୍ୟ କରିବେ। ପ୍ରଥମ ଦିନ ବୁଥ୍ରେ ଟିକାକରଣ ଏବଂ ଦ୍ୱିତୀୟ ଓ ତୃତୀୟ ଦିନ ଘରକୁ ଘର ବୁଲି ଟିକାକରଣ କାର୍ଯ୍ୟର ତଦାରଖ ପାଇଁ ୨,୦୦୦ ଜଣ ସୁପରଭାଇଜର ନିୟୋଜିତ ହେବେ।
ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ଼. ମୁକେଶ ମହାଲିଙ୍ଗ ସମସ୍ତ ଅଭିଭାବକ, ଗଣମାଧ୍ୟମ ଏବଂ ଜନସାଧାରଣଙ୍କୁ ଏହି ଅଭିଯାନରେ ସକ୍ରିୟ ସହଯୋଗ କରିବାକୁ ଆହ୍ୱାନ ଜଣାଇଛନ୍ତି।
ଏହି ଅଭିଯାନ ଅବସରରେ ସ୍ଵାସ୍ଥ୍ୟ ବିଭାଗର ଶାସନ ସଚିବ ତଥା କମିଶନର ଏସ୍. ଏନ୍. ଗିରୀଶ, ଜାତୀୟ ସ୍ଵାସ୍ଥ୍ୟ ମିଶନ ଏମ୍ ଡ଼ି ଡ଼. ପରାଗ ଗଭାଲି, ସ୍ୱତନ୍ତ୍ର ସଚିବ (ଚିକିତ୍ସା ସେବା) ଡ଼. ବିଜୟ ମିଶ୍ର ,ପରିବାର କଲ୍ୟାଣ ନିର୍ଦ୍ଦେଶକ ଡ଼. ବିଷ୍ଣୁ ପ୍ରସାଦ ମହାପାତ୍ର, ଡ଼ ତାପସ କୁମାର ପାତ୍ର ଉପସ୍ଥିତ ଥିଲେ ।
