ଭୁବନେଶ୍ୱର: ଶୁକ୍ରବାର ବିଶ୍ବବ୍ୟାଙ୍କର ସମୀକ୍ଷା ବୈଠକରେ ବିଶେଷଜ୍ଞମାନେ ଓଡ଼ିଶାର ଡ୍ୟାମ୍ (ବନ୍ଧ) ସୁରକ୍ଷା ଓ ଆନୁଷଙ୍ଗିକ କାର୍ଯ୍ୟକଳାପକୁ ପ୍ରଶଂସା କରିବା ସହ ଏହାକୁ ଅନ୍ୟ ରାଜ୍ୟ ପାଇଁ ଆଦର୍ଶ ବୋଲି କହିଛନ୍ତି।
ଜାନୁଆରୀ ୧୮ ଓ ୧୯ ତାରିଖରେ ଭୁବନେଶ୍ୱରରେ ଅନୁଷ୍ଠିତ ଏହି ବୈଠକରେ ଭାରତରେ ବଛାବଛା ଡ୍ୟାମ୍ ଗୁଡ଼ିକର ନିରାପତ୍ତା ଓ କାର୍ଯ୍ୟଦକ୍ଷତାରେ ଉନ୍ନତି ଆଣିବା ପାଇଁ ବିଶ୍ୱବ୍ୟାଙ୍କ ସହାୟତାପ୍ରାପ୍ତ ପ୍ରକଳ୍ପ ଡ୍ୟାମ୍ ଥଇଥାନ ଓ ଉନ୍ନତି ପ୍ରକଳ୍ପ (ଡ୍ରିପ୍)ର ମଧ୍ୟବର୍ତ୍ତୀ ସମୀକ୍ଷା ମିଶନର ଏକ ଅଂଶ ଥିଲା।
ଏହି ବୈଠକରେ ରାଷ୍ଟ୍ରମନ୍ତ୍ରୀ, ସିଡବ୍ଲ୍ୟୁସି, ବିଶ୍ୱବ୍ୟାଙ୍କ, ଏଆଇଆଇବି ଏବଂ ପଶ୍ଚିମବଙ୍ଗ, ମଧ୍ୟପ୍ରଦେଶ, ମହାରାଷ୍ଟ୍ର, ମଣିପୁର, ମେଘାଳୟ, ଡିଭିସି, ୟୁଜେଭିଏନଏଲ ଏବଂ ଓଡ଼ିଶାର ୮ଟି କାର୍ଯ୍ୟକାରୀ ସଂସ୍ଥାର ପ୍ରତିନିଧି ଯୋଗ ଦେଇଥିଲେ।
ଉନ୍ନୟନ କମିସନର ଅନୁ ଗର୍ଗ ଅଧିବେଶନକୁ ଉଦଘାଟନ କରିବା ସହ ରାଜ୍ୟରେ ଡ୍ୟାମ୍ ସୁରକ୍ଷା କାର୍ଯ୍ୟର ବିଭିନ୍ନ ଦିଗ ସମ୍ପର୍କରେ ଆଲୋଚନା କରିଥିଲେ। ଜଳବାୟୁ ପରିବର୍ତ୍ତନ ଏବଂ ଜଳ ନିରାପତ୍ତା ଭଳି ଆହ୍ୱାନର ମୁକାବିଲା କରିବା ଉପରେ ସେ ଗୁରୁତ୍ୱାରୋପ କରିଥିଲେ ।
ସେ କହିଥିଲେ ଯେ ଓଡ଼ିଶା ବାରମ୍ବାର ବାତ୍ୟାର ସମ୍ମୁଖୀନ ହୋଇଥାଏ, ବେଳେବେଳେ ବର୍ଷକୁ ଦୁଇଥର ଏବଂ କୌଣସି ବିପର୍ଯ୍ୟୟ ପରିସ୍ଥିତିରେ ଡ୍ୟାମ୍ ଏବଂ ଲୋକଙ୍କୁ ସୁରକ୍ଷା ଦେବା ପାଇଁ ଏକ ସୁଚିନ୍ତିତ ଜରୁରୀକାଳୀନ କାର୍ଯ୍ୟ ଯୋଜନା ରହିଛି।
ସେ ଆହୁରି ମଧ୍ୟ କହିଛନ୍ତି ଯେ ଓଡ଼ିଶାରେ ୨୧୦ରୁ ଅଧିକ ନିର୍ଦ୍ଦିଷ୍ଟ ଡ୍ୟାମ୍ ଅଛି। ସେଥିମଧ୍ୟରୁ ୬୦% ୩୦ ବର୍ଷରୁ ଅଧିକ ପୁରୁଣା ଏବଂ ସେମାନଙ୍କ ସ୍ୱାସ୍ଥ୍ୟ ବଜାୟ ରଖିବା ପାଇଁ ବିଶେଷ ଧ୍ୟାନ ଦେବାର ଆବଶ୍ୟକତା ରହିଛି। ସେ ନିକଟରେ ଘଟିଥିବା ଘଟଣାଗୁଡ଼ିକୁ ଉଦାହରଣ ଦେଇଛନ୍ତି ଯାହା ଡ୍ୟାମ୍ ସୁରକ୍ଷା ପ୍ରସଙ୍ଗର ଗୁରୁତ୍ୱଉପରେ ଆଲୋକପାତ କରିଛି।
ସେ ଡ୍ରିପ୍ ର ଭୂମିକାକୁ ପ୍ରଶଂସା କରିଥିଲେ, ଯାହା କେବଳ ଢାଞ୍ଚାଗତ ପରିବର୍ତ୍ତନ ନୁହେଁ ବରଂ ଜରୁରୀକାଳୀନ କାର୍ଯ୍ୟ ଯୋଜନା, ଅପରେସନ୍ ଏବଂ ରକ୍ଷଣାବେକ୍ଷଣ ମାନୁଆଲ୍ ଭଳି ସଫ୍ଟୱେୟାର୍ ପରିବର୍ତ୍ତନ ସହିତ ମଧ୍ୟ କାର୍ଯ୍ୟ କରେ।
ସେ କହିଥିଲେ ଯେ ଓଡ଼ିଶାରେ ଏକ ପୂର୍ଣ୍ଣାଙ୍ଗ ଡ୍ୟାମ୍ ସୁରକ୍ଷା ସଂଗଠନ ରହିଛି ଯେଉଁଥିରେ ୪୦% ମହିଳା ଡ୍ୟାମର ତଦାରଖ ଏବଂ ନିରାପତ୍ତା କାର୍ଯ୍ୟକଳାପ ରକ୍ଷଣାବେକ୍ଷଣରେ ନିୟୋଜିତ ଅଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ସର୍ବାଧିକ ବିପର୍ଯ୍ୟସ୍ତ ଡ୍ୟାମ୍ଗୁଡ଼ିକୁ ପ୍ରାଥମିକତା ଭିତ୍ତିରେ ସମାଧାନ କରିବା ପାଇଁ ଓଡ଼ିଶାର ଏକ ପୃଥକ ରାଜ୍ୟ ବଜେଟ୍ ଡିପିଆଇଡବ୍ଲୁ ରହିଛି।
Comments are closed.