ଚାଷୀଙ୍କ ଋଣ ଟଙ୍କା ଉପରେ ବାବୁଙ୍କ ନଜର! ୨୧ ଲକ୍ଷ ଆତ୍ମସାତ୍ କରି ଭିଜିଲାନ୍ସ ଜାଲରେ ପୂର୍ବତନ ସେକ୍ରେଟାରୀ
କଟକ: କଟକ ଜିଲ୍ଲା ବାଙ୍କୀ ଅଞ୍ଚଳରେ ଏକ ବଡ଼ ଧରଣର ଆର୍ଥିକ ଠକେଇ ଓ ଦୁର୍ନୀତିର ପର୍ଦ୍ଦାଫାଶ ହୋଇଛି । ଚାଷୀ ଏବଂ ସାଧାରଣ ଲୋକଙ୍କ ସୁବିଧା ପାଇଁ ଗଠିତ ସମବାୟ ସମିତିକୁ ନିଜର ବ୍ୟକ୍ତିଗତ ସ୍ୱାର୍ଥ ହାସଲର ମାଧ୍ୟମ ବନାଇଥିବା ଜଣେ ପୂର୍ବତନ ଅଧିକାରୀ ଏବେ ଭିଜିଲାନ୍ସ ଜାଲରେ ଛନ୍ଦି ହୋଇଛନ୍ତି । ୨୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଆତ୍ମସାତ୍ କରିବା ଅଭିଯୋଗରେ ଓଡ଼ିଶା ଭିଜିଲାନ୍ସ ମଙ୍ଗଳବାର ଦିନ ବାଙ୍କୀ ପ୍ୟାକ୍ସ ଅଧୀନରେ ଥିବା ଆନନ୍ଦପୁର ସେବା ସମବାୟ ସମିତିର ପୂର୍ବତନ ସମ୍ପାଦକ ଶରତ କୁମାର ନାୟକଙ୍କୁ ଗିରଫ କରିଛି ।
ଭିଜିଲାନ୍ସ ବିଭାଗ ପକ୍ଷରୁ ମିଳିଥିବା ସୂଚନା ମୁତାବକ, ଶରତ ନାୟକ ସମିତିର ସମ୍ପାଦକ ଦାୟିତ୍ୱରେ ଥିବା ବେଳେ ଋଣ ନେଇଥିବା ବିଭିନ୍ନ ହିତାଧିକାରୀ ଓ ସଦସ୍ୟଙ୍କ ଠାରୁ ସିଧାସଳଖ ଋଣ ପରିଶୋଧ ଅର୍ଥ ସଂଗ୍ରହ କରୁଥିଲେ। ଟଙ୍କା ଆଦାୟ କରିବା ପରେ ସେ ଚତୁରତାର ସହ ଦୈନିକ କାରବାର ଖାତାରେ ପ୍ରକୃତ ଟଙ୍କା ହିସାବ ଲେଖୁଥିଲେ ମଧ୍ୟ, ସରକାରୀ ଆକାଉଣ୍ଟିଂ ରେଜିଷ୍ଟରରେ ବ୍ୟାପକ ଜାଲିଆତି କରୁଥିଲେ। ଆଦାୟ ହୋଇଥିବା ଟଙ୍କାର ପରିମାଣକୁ ରେଜିଷ୍ଟରରେ ଢେର୍ କମ୍ ଦର୍ଶାଇ, ବଳକା ଟଙ୍କାକୁ ସେ ବିନା ଦ୍ୱିଧାରେ ନିଜ ପକେଟରେ ପୂରାଉଥିଲେ।
ଭିଜିଲାନ୍ସର ସ୍ୱତନ୍ତ୍ର ତଦନ୍ତରୁ ସ୍ପଷ୍ଟ ହୋଇଛି ଯେ, ସମ୍ପୃକ୍ତ ପୂର୍ବତନ ସମ୍ପାଦକ ଏହିଭଳି କୌଶଳ ପ୍ରୟୋଗ କରି ମୋଟ ୨୧,୨୮,୦୫୮ ଟଙ୍କା ଲୁଟି ନେଇଛନ୍ତି। ତାଙ୍କର ଏପରି ବେଆଇନ କାର୍ଯ୍ୟ ଯୋଗୁଁ ବାଙ୍କୀ ପ୍ୟାକ୍ସ ଓ ସରକାରୀ ରାଜକୋଷର ବ୍ୟାପକ ଆର୍ଥିକ କ୍ଷତି ଘଟିଛି। ଏ ସମ୍ପର୍କରେ ସୁରାକ୍ ପାଇବା ପରେ ଗତ ଅଗଷ୍ଟ ୧୦ ତାରିଖରେ କଟକ ଭିଜିଲାନ୍ସ ଥାନାରେ (କେସ୍ ନମ୍ବର ୨୯) ଏକ ମାମଲା ରୁଜୁ କରାଯାଇଥିଲା। ଦୁର୍ନୀତି ନିବାରଣ ଆଇନ (ସଂଶୋଧନ) ୨୦୧୮ ଏବଂ ଆଇପିସିର ଦଫା ୪୦୯ ଓ ୪୬୭ ବଳରେ ତାଙ୍କ ବିରୋଧରେ କଠୋର ଆଇନଗତ ପଦକ୍ଷେପ ନିଆଯାଇଛି।
ମଙ୍ଗଳବାର ଦିନ ଗିରଫଦାରୀ ପରେ ଶରତ କୁମାର ନାୟକଙ୍କୁ କଟକ ସ୍ଥିତ ସ୍ୱତନ୍ତ୍ର ଭିଜିଲାନ୍ସ ବିଚାରପତିଙ୍କ କୋର୍ଟରେ ହାଜର କରାଯାଇଛି। ତେବେ ଏହି ବଡ଼ ଧରଣର ଲୁଟ୍ରେ କେବଳ ଶରତ ସମ୍ପୃକ୍ତ ଅଛନ୍ତି ନା ତାଙ୍କ ପଛରେ ଆଉ କାହାର ହାତ ଅଛି, ସେ ନେଇ ଭିଜିଲାନ୍ସ ବିଭାଗ ପକ୍ଷରୁ ଅଧିକ ଖୋଳତାଡ଼ ଜାରି ରହିଛି। ଆଗକୁ ଏହି ଘଟଣାରେ ଆହୁରି ଅନେକ ଗୁମର ଫିଟିବାର ସମ୍ଭାବନା ରହିଛି।
