ଭୁବନେଶ୍ୱର: ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଓଡ଼ିଶାର ୧୬ଟି ଜିଲ୍ଲାରେ ଗ୍ରୀଷ୍ମଜନିତ ରୋଗ ଦେଖାଦେଇଥିବା ବେଳେ ଏପର୍ଯ୍ୟନ୍ତ ୮୯ ଜଣ ପ୍ରଭାବିତ ହୋଇଛନ୍ତି। ଓଡ଼ିଶା ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ସୋମବାର ଏହି ସୂଚନା ଦେଇଛନ୍ତି।
ଡାକ୍ତର ମିଶ୍ରଙ୍କ କହିବାନୁଯାୟୀ, ୧୬ଟି ଜିଲ୍ଲାରୁ ପ୍ରାୟ ୮୯ ଜଣ ସନ୍ ଷ୍ଟ୍ରୋକ୍ ଓ ଗରମ ଜନିତ ରୋଗରେ ଆକ୍ରାନ୍ତ ଅଛନ୍ତି। ପ୍ରଭାବିତ ବ୍ୟକ୍ତିମାନେ ଏବେ ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଛନ୍ତି। ସୁନ୍ଦରଗଡ଼ରୁ ସର୍ବାଧିକ ୪୧ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି।
ଖୋର୍ଦ୍ଧା ଜିଲ୍ଲାରେ ୧୨ ଜଣ ଆକ୍ରାନ୍ତ ଥିବା ବେଳେ ୭ ଜଣ ଭୁବନେଶ୍ୱର କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି ବୋଲି ଡାକ୍ତର ମିଶ୍ର ସୂଚନା ଦେଇଛନ୍ତି।
ଅନୁଗୁଳ ଜିଲ୍ଲାରୁ ୯ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ମୟୂରଭଞ୍ଜ ଓ ଝାରସୁଗୁଡ଼ାରେ ୭ ଜଣ ଲେଖାଏଁ ଓ ସମ୍ବଲପୁରରେ ୫ ଜଣ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଡାକ୍ତର ମିଶ୍ର ମଧ୍ୟ ସନ୍ ଷ୍ଟ୍ରୋକ୍ ଯୋଗୁଁ ଜଣଙ୍କର ମୃତ୍ୟୁ ହୋଇଥିବା ନିଶ୍ଚିତ କରିଛନ୍ତି।
ଗ୍ରୀଷ୍ମ ପ୍ରବାହ ଯୋଗୁଁ ଅତିରିକ୍ତ ମୃତ୍ୟୁ ହେଉଥିବା ଦାବି ହେଉଥିଲେ ହେଁ ସ୍ବାସ୍ଥ୍ୟ ବିଭାଗ ପକ୍ଷରୁ ଏହାକୁ ପ୍ରମାଣିତ କରାଯାଇନାହିଁ।
ଡାକ୍ତର ମିଶ୍ର କହିଛନ୍ତି, ସନ୍ ଷ୍ଟ୍ରୋକ୍ ମୃତ୍ୟୁର ଏଭଳି ଦାବିର ଯାଞ୍ଚ କରିବା ପାଇଁ ଶବ ବ୍ୟବଚ୍ଛେଦ ରିପୋର୍ଟ, ଯୁଗ୍ମ ରିପୋର୍ଟ କିମ୍ବା ବେଳେବେଳେ ମୌଖିକ ଶବ ବ୍ୟବଚ୍ଛେଦ ରିପୋର୍ଟ ଆବଶ୍ୟକ ହୋଇଥାଏ। ସୂଚନାଯୋଗ୍ୟ, ଅନ୍ୟାନ୍ୟ ରୋଗ କିମ୍ବା କାରଣରୁ ମଧ୍ୟ ମୃତ୍ୟୁ ହୋଇପାରେ।
Comments are closed.