ଭୁବନେଶ୍ୱର: ରାଜ୍ୟରେ ତାପମାତ୍ରା ବୃଦ୍ଧି ସହ ବିଦ୍ୟୁତ ସଙ୍କଟ ଲୋକଙ୍କ ଅସୁବିଧା ବଢ଼ାଇଛି। ଅନେକ ଅଞ୍ଚଳରେ ବିଜୁଳି ଯୋଗାଣ ଅନିୟମିତ ହୋଇଥିବା ବେଳେ କେତେକ ସ୍ଥାନରେ କମ୍ ଭୋଲଟେଜ ସମସ୍ୟା ଦେଖାଦେଇଛି। ଏହା ସହ ବିଦ୍ୟୁତ ବିଲ୍ ବକେୟା ନେଇ କିଛି ଗାଁରେ ସଂପୂର୍ଣ୍ଣ ଅନ୍ଧାର ରହିଛି । ଯେଉଁଥିପାଇଁ ଗାଁଠୁ ସହର ଲୋକମାନେ ଗରମରେ ଆଉଟ ପାଉଟ ହେଉଛନ୍ତି।
ସହର ଓ ଗାଁ ଉଭୟ ଅଞ୍ଚଳରେ ଏହି ସମସ୍ୟା ଦେଖାଦେଇଛି। ମାର୍ଚ୍ଚ ଶେଷ ଭାଗରୁ ତୀବ୍ର ଗରମ ସହ ବିଦ୍ୟୁତ କାଟ ଲାଗି ରହିଛି, ଯାହା ପରିସ୍ଥିତିକୁ ଆହୁରି ଜଟିଳ କରିଛି। ଏହି ପ୍ରଚଣ୍ଡ ଗରମ ରାଜ୍ୟରେ ନିରବଚ୍ଛିନ୍ନ ବିଜୁଳି ଯୋଗାଣର ଆବଶ୍ୟକତାକୁ ସାମ୍ନାକୁ ଆଣିଛି।
ନବରଙ୍ଗପୁର ଜିଲ୍ଲାର ରାଇଘର ଅଞ୍ଚଳରେ ପ୍ରାୟ ୨୬ଟି ଗ୍ରାମ ପଞ୍ଚାୟତର ବାସିନ୍ଦାମାନେ ରବିବାର ଦିନ ମଧ୍ୟାହ୍ନ ୧୨ଟାରୁ ବିନା ବିଜୁଳିରେ ବସବାସ କରୁଛନ୍ତି। ସ୍ଥାନୀୟ କୃଷକମାନେ ଅଭିଯୋଗ କରିଛନ୍ତି ଯେ, ଗତ ଛଅ ମାସ ଧରି କମ୍ ଭୋଲଟେଜ ସମସ୍ୟା ଜାରି ରହିଛି । ଏ ନେଇ ଅଧିକାରୀମାନେ ଆବଶ୍ୟକ ଗୁରୁତ୍ୱ ଦେଉନାହାନ୍ତି। କ୍ଷୁବ୍ଧ ଗ୍ରାମବାସୀ ରାସ୍ତା ଅବରୋଧ କରି ପ୍ରାୟ ୩୦ ଘଣ୍ଟା ଧରି ବିକ୍ଷୋଭ କରିଛନ୍ତି। ପରେ ପ୍ରଶାସନ ଏପ୍ରିଲ ୬ ସୁଦ୍ଧା ସମସ୍ୟାର ସମାଧାନ କରିବାକୁ ଆଶ୍ୱାସନା ଦେଇଛି।
ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁର ବ୍ଲକର ବାହାଳପଦାରେ ବିଦ୍ୟୁତ ବିଲ୍ ବକେୟା ନେଇ ଗ୍ରାମବାସୀଙ୍କ ବିଜୁଳି ସଂଯୋଗ ବିଚ୍ଛିନ୍ନ ହୋଇଥିଲା। ପ୍ରତି ପରିବାରକୁ ୨,୦୦୦ ଟଙ୍କା ବକେୟା ପରିଶୋଧ କରିବାକୁ କୁହାଯାଇଥିଲା। ଏହା ଦେଇ ନ ପାରିବାରୁ ଟାଟା ପାୱାର ମାର୍ଚ୍ଚ ୨୯ ମଧ୍ୟାହ୍ନରୁ ବିଜୁଳି କାଟି ଦେଇଥିଲା, ଯାହା ବିକ୍ଷୋଭକୁ ଉସକେଇଥିଲା। ସ୍ଥାନୀୟ ବିକ୍ଷୋଭକାରୀ, ପୋଲିସ ଓ ଟାଟା ପାୱାର ଅଧିକାରୀଙ୍କ ମଧ୍ୟରେ ଆଲୋଚନା ପରେ ୨୪ ଘଣ୍ଟା ମଧ୍ୟରେ ବିଜୁଳି ପୁନଃସ୍ଥାପନ ହୋଇଥିଲା। ତେବେ ଟାଟା ପାୱାର ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ମନ୍ତବ୍ୟ ଦେଇନାହିଁ।
ବାଲେଶ୍ୱର ସାହାକୁ ନିକଟବର୍ତ୍ତୀ ରାଣାସାହି ଅଞ୍ଚଳରେ ମାର୍ଚ୍ଚ ମାସରେ ବିଲ୍ ବକେୟା ନେଇ ସପ୍ତାହେ ଧରି ବିଜୁଳି କାଟ ହୋଇଥିଲା। ମାର୍ଚ୍ଚ ୧୧ ସନ୍ଧ୍ୟାରୁ ବିଜୁଳି ବନ୍ଦ ହୋଇଥିଲା ଏବଂ ମାର୍ଚ୍ଚ ୧୯ରେ ପୁନଃ ସଂଯୋଗ କରାଯାଇଥିଲା।
ନିକଟରେ ଉପ-ମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କେଭି ସିଂହ ଦେଓ ପ୍ରତିଶ୍ରୁତି ଦେଇଥିଲେ ଯେ ଗରମ ଦିନରେ ବିଲ୍ ବକେୟା ପାଇଁ ବିଜୁଳି କଟା ହେବ ନାହିଁ। ସେହିପରି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଥିଲେ, “କୌଣସି ଗ୍ରାହକଙ୍କୁ ବକେୟା ବିଲ୍ ପାଇଁ ବିଜୁଳି କାଟ ଭୋଗିବାକୁ ପଡ଼ିବ ନାହିଁ। ପ୍ରଚଣ୍ଡ ଖରା ବେଳେ ଅନଧିକୃତ ବିଜୁଳି କାଟ ଉପରେ ମଧ୍ୟ ରୋକ୍ ଲାଗିବ।” ତଥାପି, ରାଜ୍ୟରେ ବିଦ୍ୟୁତ ବିଚ୍ଛେଦ ଲୋକଙ୍କ ପାଇଁ ଅସୁବିଧାର କାରଣ ହୋଇପଡ଼ିଛି।
Comments are closed.