ନୂଆଦିଲ୍ଲୀ: ଦେଶରେ କରୋନାର ନୂତନ ପ୍ରକାର, ଓମିକ୍ରନ୍, ମୂଳ ଭୂତାଣୁ ଅପେକ୍ଷା ତିନି ଗୁଣ ଅଧିକ ବେଗରେ ବିସ୍ତାର କରୁଛି। ଓମିକ୍ରନ୍ ସଂକ୍ରମଣର ପ୍ରଥମ ମାମଲା ଭାରତରେ ୨ ଡିସେମ୍ବରରେ ମିଳିଥିଲା। ମାତ୍ର ୧୯ ଦିନ ମଧ୍ୟରେ ଓମିକ୍ରନ୍ ସଂକ୍ରମିତ ସଂଖ୍ୟା ୨୦୦ ଟପିଗଲାଣି। ଅପରପକ୍ଷେ, ମୂଳ କରୋନା ଭାଇରସ୍ରେ ୨୦୦ ଜଣ ସଂକ୍ରମଣର ଶିକାର ହେବାକୁ ୬୦ ଦିନ ସମୟ ଲାଗିଥିଲା। ଏହି ଅର୍ଥରେ, ମୂଳ ଭୂତାଣୁ ତୁଳନାରେ ଓମିକ୍ରନର ବିସ୍ତାର ହାର ୩୧୮ ପ୍ରତିଶତ ରହିଛି।
ଏହି ସମୟ ମଧ୍ୟରେ ଓମିକ୍ରନ୍ ଦିନକୁ ହାରାହାରି ୧୦.୫ ଲୋକଙ୍କୁ ସଂକ୍ରମିତ କରୁଥିବାବେଳେ ପ୍ରଥମ ଦୁଇ ମାସରେ ପ୍ରତିଦିନ କେବଳ ୩.୩ ଲୋକ ସଂକ୍ରମିତ ହୋଇଥିଲେ। ଦେଶରେ କରୋନା ସଂକ୍ରମଣର ପ୍ରଥମ ମାମଲା ୨୦୨୦ ଜାନୁଆରୀ ୩୦ ରେ ପଞ୍ଜୀକୃତ ହୋଇଥିଲା। ଏହା ପରେ, ଏପ୍ରିଲ ୧, ୨୦୨୦ରେ, କରୋନା ସଂକ୍ରମିତଙ୍କ ସଂଖ୍ୟା ୨୦୦ କୁ ବୃଦ୍ଧି ପାଇଥିଲା।
ଉଲ୍ଲେଖନୀୟ ବିଷୟ ହେଉଛି, ଓମିକ୍ରନ୍ର ପ୍ରଥମ ମାମଲା ଦକ୍ଷିଣ ଆଫ୍ରିକାରେ ମିଳିଥିଲା। ସେବେଠାରୁ ଏପର୍ଯ୍ୟନ୍ତ ଏହି ମାରାତ୍ମକ ଭୂତାଣୁ ପ୍ରାୟ ୧୦୦ରୁ ଅଧିକ ଦେଶରେ ବ୍ୟାପିଗଲାଣି। ଦେଶରେ ଏହାର ଦ୍ରୁତ ପ୍ରସାରକୁ ଦୃଷ୍ଟିରେ ରଖି ବିଭିନ୍ନ ସଚେତନତାମୂଳକ ପଦକ୍ଷେପ ଗ୍ରହଣ କରାଯାଉଛି।
ଓମିକ୍ରନ୍ ଦେଶର ୧୬ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ବ୍ୟାପିସାରିଲାଣି। ଏପର୍ଯ୍ୟନ୍ତ ୨୩୬ ଜଣ ଲୋକ ଏହା ଦ୍ବାରା ସଂକ୍ରମିତ ହୋଇଛନ୍ତି, ଯେଉଁଥିରୁ ୧୦୬ ଜଣ ଆରୋଗ୍ୟ ଲାଭ କରିଛନ୍ତି। ମହାରାଷ୍ଟ୍ରରେ ସର୍ବାଧିକ ୬୫ ଟି ମାମଲା ଥିବାବେଳେ ଓମିକ୍ରନ୍ର ୬୪ ଟି ମାମଲା ସହିତ ଦିଲ୍ଲୀ ଦ୍ୱିତୀୟ ସ୍ଥାନରେ ରହିଛି। ତେଲେଙ୍ଗାନାରେ ୨୪ ଟି, କର୍ଣ୍ଣାଟକରେ ୧୯ ଟି, ରାଜସ୍ଥାନରେ ୨୧ ଟି ଏବଂ କେରଳରେ ୧୫ ଟି ନୂଆ ମାମଲା ରୁଜୁ ହୋଇଛି।
Comments are closed.