ନୂଆଦିଲ୍ଲୀ: ଯଦିଓ ଭାରତ ଏବଂ ଆମେରିକା ମଧ୍ୟରେ ଭଲ କୂଟନୈତିକ ସମ୍ପର୍କ ବିଷୟରେ ଆଲୋଚନା ହେଉଛି, ତଥାପି ଭାରତୀୟମାନଙ୍କୁ ନିର୍ବାସିତ କରିବା ପ୍ରକ୍ରିୟା ଜାରି ରହିଛି। ଏକ ରିପୋର୍ଟ ଅନୁଯାୟୀ, ଆମେରିକାରୁ ଭାରତୀୟ ପ୍ରବାସୀମାନଙ୍କୁ ବହିଷ୍କାର କରିବାର ଗତି ବଢିଚାଲିଛି। ଯଦି ୨୦୨୪ ମସିହାର ରିପୋର୍ଟକୁ ଦେଖିବା ତେବେ ଚଳିତ ବର୍ଷ ମଧ୍ୟରେ ପ୍ରତି ୬ ଘଣ୍ଟାରେ ଜଣେ ଭାରତୀୟ ଆମେରିକାରୁ ହେଉଛନ୍ତି ନିର୍ବାସିତ।
ଆମେରିକାର ଇମିଗ୍ରେସନ୍ ଆଣ୍ଡ କଷ୍ଟମ୍ସ ଏନଫୋର୍ସମେଣ୍ଟ (ICE) ଦ୍ୱାରା ଡିସେମ୍ବର ୧୯ ରେ ପ୍ରକାଶିତ ୨୦୨୪ ଆର୍ଥିକ ବର୍ଷର ରିପୋର୍ଟ ଅନୁଯାୟୀ, ଚଳିତ ବର୍ଷ ପ୍ରତି ୬ଘଣ୍ଟାରେ ଆମେରିକାରୁ ଜଣେ ଭାରତୀୟଙ୍କୁ ଆମେରିକାରୁ ବହିଷ୍କାର କରାଯାଉଛି। ଏଠାରେ ବିଶେଷ କଥା ହେଉଛି ଏହି କ୍ଷେତ୍ରରେ ସଂଖ୍ୟାରେ କୌଣସି ହ୍ରାସ ଘଟିନାହିଁ, ବରଂ ଏହି ସଂଖ୍ୟା ବୃଦ୍ଧି ହେଉଛି।
୨୦୨୧ ବର୍ଷ ତୁଳନାରେ ୨୦୨୪ରେ (୨,୭୧, ୪୮୪ ମଧ୍ୟରୁ ୧,୫୨୯) ଦେଶରୁ ବିତାଡିତ ହୋଇଥିବା ଭାରତୀୟଙ୍କ ସଂଖ୍ୟାରେ ୪୦୦ ପ୍ରତିଶତ ବୃଦ୍ଧି ଘଟିଛି (ସମୁଦାୟ ୫୯,୦୧୧ ମଧ୍ୟରୁ ୨୯୨)। ସେହିପରି ୨୦୨୩ ମସିହାରେ, ୧,୪୨,୫୮୦ ଲୋକଙ୍କୁ ଆମେରିକାରୁ ନିର୍ବାସିତ କରାଯାଇଥିଲା, ଯେଉଁଥିରେ ୩୭୦ ଜଣ ଭାରତୀୟ ସାମିଲ ହୋଇଥିଲେ। ୨୦୨୨ ମସିହାରେ ନିର୍ବାସିତ ହୋଇଥିବା ୭୨,୧୭୭ ମଧ୍ୟରୁ ୨୭୬ ଜଣ ଭାରତୀୟ ଥିଲେ।
ଭାରତର କେନ୍ଦ୍ରୀୟ ଏଜେନ୍ସିର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ବର୍ଷ ବର୍ଷ ଧରି ଅପସାରଣ ସଂଖ୍ୟାରେ ପରିବର୍ତ୍ତନକୁ ବିଭିନ୍ନ କାରଣ ଦର୍ଶାଯାଇପାରେ। ଯେପରିକି ଆମେରିକାର ଇମିଗ୍ରେସନ ନୀତିରେ ପରିବର୍ତ୍ତନ, ଭାରତ ଏବଂ ଆମେରିକା ମଧ୍ୟରେ ଦ୍ୱିପାକ୍ଷିକ ଚୁକ୍ତିନାମା। ଅଧିକାରୀ କହିଛନ୍ତି ଯେ ୨୦୨୪ରେ ସଂଖ୍ୟା ବୃଦ୍ଧି “ବ୍ୟାପକ ସ୍ଥାନାନ୍ତରଣ ଧାରା ଏବଂ ଆମେରିକାରେ ଆଇନଗତ ମାନ୍ୟତା ନଥିବା ଲୋକଙ୍କୁ ଟାର୍ଗେଟ କରୁଥିବା କାର୍ଯ୍ୟାନୁଷ୍ଠାନକୁ ପ୍ରତିଫଳିତ କରିପାରେ।”
ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ ପରିସ୍ଥିତି କ’ଣ ଥିଲା?
୨୦୧୯ ଏବଂ ୨୦୨୦ କୋଭିଡ ମହାମାରୀ ସମୟରେ, ଆମେରିକାର ରାଷ୍ଟ୍ରପତି ଭାବରେ ଡୋନାଲ୍ଡ ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ ମୋଟ ୩,୯୨୮ (୧,୬୧୬ ଏବଂ ୨,୩୧୨) ବେଆଇନ ଅଣ-ବାସିନ୍ଦା ଭାରତୀୟଙ୍କୁ ଦେଶରୁ ବିତାଡିତ କରାଯାଇଥିଲା। ତୁଳନାତ୍ମକ ଭାବରେ, ଯେତେବେଳେ ଜୋ ବାଇଡେନ ୨୦୨୧ ମସିହାରେ ଆମେରିକାର ରାଷ୍ଟ୍ରପତି ଭାବରେ ଦାୟିତ୍ୱ ଗ୍ରହଣ କରିଥିଲେ, ସେହି ସମୟରେ ୨୦୨୪ ମସିହାରେ ରିପୋର୍ଟ ଅନୁସାରେ ଦେଶରୁ ବିତାଡିତ ହୋଇଥିବା ଭାରତୀୟଙ୍କ ସଂଖ୍ୟା ୩,୪୬୭ରେ ପହଞ୍ଚିଥିଲା।
ଆମେରିକାର ଇମିଗ୍ରେସନ ଏବଂ କଷ୍ଟମ୍ସ ଏନଫୋର୍ସମେଣ୍ଟ ଦେଶାନ୍ତର ପାଇଁ ଧାର୍ଯ୍ୟ ହୋଇଥିବା ଲୋକଙ୍କ ତାଲିକା ପ୍ରସ୍ତୁତ କରିସାରିଛି ଏବଂ ପ୍ରାୟ ୧୮,୦୦୦ ଅଣ-ଦସ୍ତାବିଜୀ ଭାରତୀୟଙ୍କୁ ଚିହ୍ନଟ କରାଯାଇଛି ଯେଉଁମାନେ ଦେଶରୁ ବିତାଡିତ ହେବାର ସମ୍ଭାବନା ରହିଛି। ଗତ ନଭେମ୍ବର ୨୦୨୪ ପର୍ଯ୍ୟନ୍ତ ICE ତଥ୍ୟ ଦର୍ଶାଉଛି ଯେ ୧୪.୪ ଲକ୍ଷ ଲୋକଙ୍କ ମଧ୍ୟରେ ୧୭,୯୪୦ ଭାରତୀୟ ଅଛନ୍ତି, ଯେଉଁମାନେ ଆମେରିକାରୁ ନିର୍ବାସନର ଅନ୍ତିମ ନିର୍ଦ୍ଦେଶ ସହିତ ବନ୍ଦୀ ହୋଇନାହାଁନ୍ତି।