ଇମ୍ଫାଲ: ମଣିପୁରରେ ପୁଣି ହିଂସା। କୁକି ଉଗ୍ରବାଦୀ ମାନେ ପୁଣି ସକ୍ରିୟ ହୋଇଛନ୍ତି। ଭୟଙ୍କର ହେବାରେ ଲାଗିଛି ସ୍ଥିତି। ସାମାନ୍ୟ ନିରବତା ପରେ ପୁଣି ଥରେ ହିଂସା ଉଗ୍ର ହୋଇଛି । ଡ୍ରୋନ୍ ମାଧ୍ୟମରେ ଆଟାକ୍ କରୁଛନ୍ତି। କିଛି ଦିନ ପୂର୍ବେ ସାଧାରଣ ବସତି ଉପରେ ଡ୍ରୋନ୍ ବୋମା ମାଡ ହୋଇଥିଲା। ଏବେ ପୁଣି
ବିଷ୍ଣୁପୁର ଜିଲ୍ଲା ମୋଇରଙ୍ଗ ସହରରେ ଥିବା ପୂର୍ବତନ ମୁଖ୍ୟମନ୍ତ୍ରୀ ମୈରେମ୍ବମ କୋଇରେଙ୍ଗ ସିଂହଙ୍କ ଘର ଉପରେ ରକେଟ୍ ଆକ୍ରମଣ ହୋଇଛି।
ଏହି ଘଟଣାରେ ଜଣେ ବରିଷ୍ଠ ନାଗରିକଙ୍କ ମୃତ୍ୟୁ ଘଟିଥିଲା ବେଳେ ଅନ୍ୟ ୫ ଜଣ ଆହତ ହୋଇଛନ୍ତି। ସେମାନଙ୍କ ଭିତରେ ଜଣେ ୧୩ ବର୍ଷୀୟ ବାଳିକା ରହିଛି। ରକେଟ୍ ମାଡ଼ରେ କମ୍ୟୁନିଟି ହଲ୍ ଓ ଅନ୍ୟ ଏକ ଘର କ୍ଷତିଗ୍ରସ୍ତ ହୋଇଛି। ଶୁକ୍ରବାର ସକାଳୁ ମୋଇରଙ୍ଗଠାରୁ ୪ କି.ମି. ଦୂର ଟ୍ରୋଙ୍ଗଲଓବି ଅଞ୍ଚଳରେ ରକେଟ୍ ଆକ୍ରମଣ ଘଟିଥିଲା। ଏଥିରେ ଦୁଇଟି ଘର କ୍ଷତିଗ୍ରସ୍ତ ହୋଇଛି।
ଦିନକରେ ଏହା ଦ୍ୱିତୀୟ ରକେଟ୍ ଆକ୍ରମଣ। ପୋଲିସର ସୂଚନା ଅନୁସାରେ, ପୂର୍ବରୁ କେବେବି ମୋଇରଙ୍ଗରେ ବନ୍ଧୁକ କିମ୍ବା ବୋମା ଆକ୍ରମଣ ହୋଇନଥିଲା। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ଏହା ପୂର୍ବରୁ ଗତ ୩ ତାରିଖରେ ଇମ୍ଫାଲ ୱେଷ୍ଟ ଜିଲ୍ଲାର ସେଜମ ଚିରାଙ୍ଗ ଗ୍ରାମରେ ଉଗ୍ରବାଦୀମାନେ ଡ୍ରୋନ୍ ଆକ୍ରମଣ କରିଥିଲେ। ଏଥିରେ ଜଣେ ମହିଳାଙ୍କ ସମେତ ୩ ଜଣ ଆହତ ହୋଇଥିଲେ। କୁହାଯାଉଛି କି ଏହି ଆକ୍ରମଣ ପଛରେ କୁକି ଉଗ୍ରବାଦୀଙ୍କ ହାତ ରହିଛି ।
Comments are closed.