ନୂଆଦିଲ୍ଲୀ: ମୋଦୀ ସରକାରଙ୍କ ‘ଶ୍ୱେତପତ୍ର’ ଏପର୍ଯ୍ୟନ୍ତ ପ୍ରକାଶ ପାଇନଥିବା ବେଳେ ଅର୍ଥନୀତିରେ ବିଫଳ ହେବା ସହ ବେକାରୀ, ଦରବୃଦ୍ଧି ଓ କୃଷକଙ୍କ ଦୁର୍ଦ୍ଦଶା ପ୍ରସଙ୍ଗକୁ ଅଣଦେଖା କରୁଥିବା ଅଭିଯୋଗ କରିଛି କଂଗ୍ରେସ।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଦିଲ୍ଲୀରେ ଏକ ସାମ୍ବାଦିକ ସମ୍ମିଳନୀରେ ‘ବ୍ଲାକ୍ ପେପର’ ଉନ୍ମୋଚନ କରି କହିଛନ୍ତି ଯେ ସରକାର ସର୍ବଦା ସଂସଦରେ ନିଜର ସଫଳତା ବିଷୟରେ କଥା ହୁଅନ୍ତି। କିନ୍ତୁ ନିଜ ବିଫଳତାକୁ ସ୍ୱୀକାର କରନ୍ତି ନାହିଁ। ସେ ଆହୁରି ମଧ୍ୟ କହିଛନ୍ତି ଯେ ସରକାର ବିରୋଧୀଙ୍କୁ ସ୍ୱର ଉତ୍ତୋଳନ କରିବାକୁ ଦେଇନଥିଲେ। ଏହି ବ୍ଲାକ ପେପରର ନାରା ରହିଛି, ‘ଦଶ ବର୍ଷ ଅନ୍ୟାୟର କାଳ’।
ଖଡଗେ କହିଛନ୍ତି ଯେ ଦେଶରେ ବେକାରୀ ସବୁଠାରୁ ବଡ଼ ସମସ୍ୟା, କିନ୍ତୁ ସରକାର ଏହାର ସମାଧାନ କରିନାହାଁନ୍ତି। ଜବାହରଲାଲ ନେହେରୁଙ୍କ ଦ୍ୱାରା ସ୍ଥାପିତ ଏବଂ ଲକ୍ଷ ଲକ୍ଷ ଲୋକଙ୍କୁ ନିଯୁକ୍ତି ଦେଇଥିବା ସାର୍ବଜନୀନ କ୍ଷେତ୍ର ବିଷୟରେ ପ୍ରଧାନମନ୍ତ୍ରୀ କିଛି କହିନାହାନ୍ତି ବୋଲି ସେ କହିଛନ୍ତି। ସରକାର ଇନ୍ଦିରା ଗାନ୍ଧୀ, ରାଜୀବ ଗାନ୍ଧୀ ଏବଂ ନେହେରୁଙ୍କୁ ଗାଳି ଗୁଲଜ କରିଥିଲେ, କିନ୍ତୁ ନିଜେ ମନରେଗା ଯୋଜନା ପାଇଁ ଟଙ୍କା ପ୍ରଦାନ କରିନଥିଲେ, ଯାହା ଗ୍ରାମୀଣ ଦୁର୍ଦ୍ଦଶା ସୃଷ୍ଟି କରିଛି।
ଗତ କିଛି ବର୍ଷ ମଧ୍ୟରେ ବିଜେପି କଂଗ୍ରେସର ୪୧୧ ଜଣ ବିଧାୟକଙ୍କୁ ଛଡ଼ାଇ ନେଇଛି ଏବଂ କଂଗ୍ରେସ ସରକାର ଭାଙ୍ଗିବା ପାଇଁ ବିପୁଳ ପରିମାଣର ଅର୍ଥ ଖର୍ଚ୍ଚ କରିଛି ବୋଲି ଖଡଗେ ଅଭିଯୋଗ କରିଛନ୍ତି।
ସଂସଦର ଚଳିତ ବଜେଟ୍ ଅଧିବେଶନରେ ପ୍ରକାଶ ପାଇବାକୁ ଥିବା ସରକାରଙ୍କ ‘ଶ୍ୱେତପତ୍ର’ର ଜବାବରେ କଂଗ୍ରେସର ‘ବ୍ଲାକ୍ ପେପର’ ଆଣିଛି। କଂଗ୍ରେସ ନେତୃତ୍ୱାଧୀନ ୟୁପିଏ କ୍ଷମତାରେ ଥିବା ବେଳେ ଦେଶର ଖରାପ ଅର୍ଥନୈତିକ ସ୍ଥିତି ଏବଂ ବର୍ତ୍ତମାନର ସରକାର କିପରି ପରିବର୍ତ୍ତନ ଆଣିଲା ତାହା ସରକାରଙ୍କ ‘ଶ୍ୱେତପତ୍ର’ରେ ଦର୍ଶାଯିବ ବୋଲି କୁହାଯାଉଛି।
ବିଜେପି ନେତା ତଥା ଅର୍ଥ ସଂକ୍ରାନ୍ତ ସ୍ଥାୟୀ କମିଟି ଅଧ୍ୟକ୍ଷ ଜୟନ୍ତ ସିହ୍ନା ବୁଧବାର କହିଛନ୍ତି ଯେ ୨୦୧୩ରେ ପୂର୍ବ ୟୁପିଏ ସରକାର ସମୟରେ ଭାରତ ବିଶ୍ୱର ‘ଦୁର୍ବଳ ପାଞ୍ଚଟି’ ଅର୍ଥନୀତି ମଧ୍ୟରେ ଥିଲା ଏବଂ ‘ଶ୍ୱେତପତ୍ର’ ଦର୍ଶାଇବ ଯେ ସରକାର ଦେଶର ଅର୍ଥନୈତିକ ସ୍ଥିରତା ଏବଂ ଅଭିବୃଦ୍ଧି ସମ୍ଭାବନାରେ କିପରି ଉନ୍ନତି ଆଣିଛନ୍ତି।
ବିଶେଷ କରି ଫେବ୍ରୁଆରି ୧ ତାରିଖରେ ସରକାର ଉପସ୍ଥାପିତ କରିଥିବା ଅନ୍ତରୀଣ ବଜେଟରେ କୃଷକ, ଗରିବ ଓ ମଧ୍ୟବିତ୍ତଙ୍କ ପାଇଁ ଅନେକ ଯୋଜନା ଓ ସୁବିଧା ଘୋଷଣା କରାଯିବା ପରେ ଅର୍ଥନୀତିର ସ୍ଥିତିକୁ ନେଇ କଂଗ୍ରେସ ଓ ବିଜେପି ମଧ୍ୟରେ ବାକ୍ ଯୁଦ୍ଧ ଲାଗି ରହିଛି। କଂଗ୍ରେସ ଏହି ବଜେଟକୁ ‘ଜୁମଲା’ ଏବଂ ‘ନିର୍ବାଚନୀ କୌଶଳ’ ବୋଲି କହିଥିବା ବେଳେ ବିଜେପି ଏହାକୁ ‘ଜନହିତକର’ ଏବଂ ‘ଦୂରଦର୍ଶୀ’ ବଜେଟ୍ ବୋଲି ଅଭିହିତ କରିଛି।