ଶ୍ରୀନଗର: ଜମ୍ମୁ-କଶ୍ମୀରର ପହଲଗାମ ଆତଙ୍କବାଦୀ ଆକ୍ରମଣର ତିନି ଦିନ ପରେ ପାକିସ୍ତାନ ସେନା ନିୟନ୍ତ୍ରଣ ରେଖା (ଏଲଓସି) ପଟୁ ଏକାଧିକ ପୋଷ୍ଟରୁ ଫାଇରିଂ ହେଉଛି। ସୂତ୍ର ଅନୁସାରେ, ଏହା ଏକ ଅସ୍ୱାଭାବିକ ଘଟଣା ଯାହା ନିକଟ ଅତୀତରେ ଦେଖିବାକୁ ମିଳିନଥିଲା। ତେବେ ପାକିସ୍ତାନର ଏପରି ଆଭିମୁଖ୍ୟ ଦେଖି ଭାରତୀୟ ସେନା ଏହାର ପାଲଟା ଜବାବ ଦେଉଛି। ଭାରତ ପକ୍ଷରୁ କୌଣସି ହତାହତ ହୋଇନଥିବା ଜଣାପଡ଼ିଛି।
ଏକ ବରିଷ୍ଠ ଅଧିକାରୀ କହିଛନ୍ତି, “ପାକିସ୍ତାନୀ ସେନା ସୀମାରେ ଛୋଟିଆ ଅସ୍ତ୍ର ଧରି ଗୁଳିଚାଳନା କରିଥିଲା। ଆମର ସୈନ୍ୟମାନେ ଏହାର ଜବାବ ଦେଇଛନ୍ତି। ଆମ ପକ୍ଷରୁ କୌଣସି ହାତାହାତି ହୋଇ ନାହିଁ।” ଏହା ପୂର୍ବରୁ ଫେବୃଆରୀ ମାସରେ ପାକିସ୍ତାନୀ ସେନା ପୁଞ୍ଚ ଜିଲ୍ଲାରେ ଏଲଓସି ଏପରି କରିଥିଲା। ସେତେବେଳେ ମଧ୍ୟ କୌଣସି କ୍ଷୟକ୍ଷତି ହୋଇ ନଥିଲା।
ଏହି ଘଟଣା ପହଲଗାମ ଆତଙ୍କବାଦୀ ଆକ୍ରମଣ ପରେ ଘଟିଛି । ଯେଉଁଥିରେ ୨୬ ଜଣ ପର୍ଯ୍ୟଟକଙ୍କର ମୃତ୍ୟୁ ଘଟିଥିଲା। ଏହି ଆକ୍ରମଣ ପରେ ଭାରତ ଓ ପାକିସ୍ତାନ ଉଭୟ ଆଲର୍ଟରେ ଅଛନ୍ତି। ପାକିସ୍ତାନ ଜମ୍ମୁ-କଶ୍ମୀର ଆତଙ୍କବାଦୀ ଘଟଣା ଏବଂ ଆଜି ପାଇଁ ଯୋଜନା ହୋଇଥିବା ଏକ ସମ୍ଭାବ୍ୟ ମିସାଇଲ ପରୀକ୍ଷଣ ମଧ୍ୟରେ ଆରବ ସାଗର ଉପରେ ନୋ-ଫ୍ଲାଇିଂ ଜୋନ ଜାରି କରିଛି।
ବାନ୍ଦିପୋରାରେ ନିୟୋଜିତ ଜଣେ ବରିଷ୍ଠ ପୁଲିସ ଅଧିକାରୀ ଦୁଇ ସୁରକ୍ଷା ଅଧିକାରୀ ମଧ୍ୟ ଆହତ ହୋଇଛନ୍ତି। ଏହି ଅଞ୍ଚଳର ଜଙ୍ଗଲରେ ଆତଙ୍କବାଦୀମାନେ ଲୁଚିଥିବା ସୂଚନା ଆଧାରରେ ସୁରକ୍ଷା ବାହିନୀ ଏକ ଘେରାବନ୍ଦୀ କରି ସର୍ଚ୍ଚ ଅପରେସନ ଅଭିଯାନ ଆରମ୍ଭ କରିଥିଲେ।
ଗୁରୁବାର ଉଦମପୁର ଜିଲ୍ଲାରେ ସୁରକ୍ଷା ବାହିନୀ ଓ ଆତଙ୍କବାଦୀମାନଙ୍କ ମଧ୍ୟରେ ହୋଇଥିବା ଗୁଳିବିନିମୟରେ ଭାରତୀୟ ସେନାର ସ୍ୱତନ୍ତ୍ର ବାହିନୀର ଜଣେ ସୈନିକ ଶହୀଦ ହୋଇଥିଲେ।
ପହଲଗାମ ଆକ୍ରମଣ ପରେ ସୁରକ୍ଷା ବାହିନୀ ଏହି ଘଟଣାରେ ସମ୍ପୃକ୍ତ ୫ ରୁ ୬ ଜଣ ଆତଙ୍କବାଦୀଙ୍କୁ ଧରିବା ପାଇଁ ଏକ ବୃହତ ଅଭିଯାନ ଆରମ୍ଭ କରିଛି। ସୁରକ୍ଷା ବାହିନୀ ତିନି ସନ୍ଦିଗ୍ଧ ଆତଙ୍କବାଦୀ – ଆସିଫ ଫୁଜି, ସୁଲେମାନ ଶାହ ଏବଂ ଆବୁ ତାଲହା – ଙ୍କ ସ୍କେଚ ଜାରି କରିଛି। ଏହି ଆକ୍ରମଣରେ ସେମାନେ ସମ୍ପୃକ୍ତ ଥିବା ସନ୍ଦେହ କରାଯାଉଛି। ଏହା ସହିତ, ଅପରାଧୀମାନଙ୍କ ସମ୍ପର୍କରେ ନିର୍ଭରଯୋଗ୍ୟ ସୂଚନା ପ୍ରଦାନ କରୁଥିବା ବ୍ୟକ୍ତିଙ୍କ ପାଇଁ ୨୦ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଛି।
ପହଲଗାମ ଆକ୍ରମଣ ପରେ ଭାରତ ପାକିସ୍ତାନକୁ କୂଟନୈତିକ ଭାବେ ଅଲଗା କରିବା ପାଇଁ ଏକାଧିକ ପଦକ୍ଷେପ ଗ୍ରହଣ କରିଛି। ଏହା ମଧ୍ୟରେ ସିନ୍ଧୁ ଜଳ ଚୁକ୍ତିର ନିଲମ୍ବନ, ବାଘା-ଅଟାରୀ ସୀମା ବନ୍ଦ ଏବଂ ପାକିସ୍ତାନୀ ନାଗରିକଙ୍କ ଭିସା ରଦ୍ଦ ଅନ୍ତର୍ଭୁକ୍ତ। ଏହି ଘଟଣା ପରେ ଦୁଇ ଦେଶ ମଧ୍ୟରେ ସ୍ଥିତି ଉତ୍ତେଜନା ମୂଳକ ରହିଛି।
Comments are closed.