ନୂଆଦିଲ୍ଲୀ: ଅଲିମ୍ପିକ୍ସ ଗେମ୍ସ ୨୦୨୪ ଆରମ୍ଭ ହୋଇଯାଇଛି। ସିନ୍ ନଦୀରେ ଉଦଘାଟନୀ ଉତ୍ସବ ଚାଲିଛି। ଅଲିମ୍ପିକ୍ସ ଇତିହାସରେ ପ୍ରଥମ ଥର ପାଇଁ କୌଣସି ନଦୀରେ ଉଦଘାଟନୀ ସମାରୋହର ଆୟୋଜନ କରାଯାଉଛି।
ଶୁକ୍ରବାର ପ୍ୟାରିସରେ ଆୟୋଜିତ ଅଲିମ୍ପିକ୍ସର ଉଦଘାଟନୀ ସମାରୋହ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ସହରର ରାସ୍ତାକୁ ବ୍ୟାରିକେଡ୍ କରାଯିବା ସହ ବହୁ ସଂଖ୍ୟାରେ ପୁଲିସ ପାଟ୍ରୋଲିଂ କରୁଛନ୍ତି। ଏହା ସହ ସିନ୍ ନଦୀରେ କଡା ସୁରକ୍ଷା କରାଯାଇଛି। ଅଲିମ୍ପିକ୍ସର ସୁରକ୍ଷା ପାଇଁ ୪୫ ହଜାରରୁ ଅଧିକ ପୁଲିସ ଓ ୧୦ ହଜାର ସୈନିକଙ୍କୁ ନିୟୋଜିତ କରାଯାଇଛି।
ଅଲିମ୍ପିକ୍ସ ଇତିହାସରେ ପ୍ରଥମ ଥର ପାଇଁ କୌଣସି ଅଲିମ୍ପିକ୍ କ୍ରୀଡ଼ାରେ ପୁରୁଷ ଓ ମହିଳା ଆଥଲେଟଙ୍କ ସଂଖ୍ୟା ସମାନ ରହିଛି। ଏପରି କରି ପ୍ୟାରିସ ଇତିହାସ ରଚିଛି ।
ଫ୍ରାନ୍ସର ୧୦ ଜଣ ଶକ୍ତିଶାଳୀ ମହିଳାଙ୍କୁ ସମ୍ମାନିତ କରାଯାଇଛି। ଅଲିମ୍ପେ ଡି ଗଉଜେସ୍, ଆଲିସ୍ ମିଲିଓଟ୍, ଗିସେଲ୍ ହାଲିମି, ସିମୋନ୍ ଡି ବିଉଭର, ପାଉଲେଟ୍ ନାର୍ଡାଲ, ଜିନ୍ ବ୍ୟାରେଟ୍, ଲୁଇସ୍ ମିଚେଲ୍, କ୍ରିଷ୍ଟିନ୍ ଡି ପିଜାନ୍, ଏଲିସ୍ ଗାଇ ଏବଂ ସିମୋନ୍ ଓ୍ଵିଲଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି।
ପ୍ୟାରିସ୍ ଅଲିମ୍ପିକ୍ସରେ ଟିମ୍ ଇଣ୍ଡିଆ ୧୧୯ ଜଣ ଆଥଲେଟଙ୍କୁ ନେଇ ମୈଦାନକୁ ଓହ୍ଲାଇଛି। ଆଥଲେଟିକ୍ସରେ ସର୍ବାଧିକ ୨୯ ଜଣ ଖେଳାଳି ଯୋଗ୍ୟତା ଅର୍ଜନ କରିଛନ୍ତି, ଯେଉଁମାନେ ବିଭିନ୍ନ କ୍ରୀଡ଼ାରେ ପଦକ ଜିତିବାକୁ ଚେଷ୍ଟା କରିବେ। ଏହାପରେ ସବୁଠାରୁ ବଡ଼ ଦଳ ସୁଟିଂ କରୁଛି, ଯେଉଁଥିରେ ୨୧ ଜଣ ଖେଳାଳି ଅଂଶଗ୍ରହଣ କରିବେ।
ସୂଚନାଯୋଗ୍ୟ, ଏହି କ୍ଷେତ୍ରରେ ଏହା ଏପର୍ଯ୍ୟନ୍ତ ସବୁଠାରୁ ବଡ଼ ଦଳ। ଏହା ପୂର୍ବରୁ ଟୋକିଓ ଅଲିମ୍ପିକ୍ସରେ ୧୫ ଜଣ ଖେଳାଳି ନିଜ ଦାବି ଉପସ୍ଥାପନ କରିଥିଲେ।
Comments are closed.