ପାସପୋର୍ଟ ମାମଲାରେ ରାହୁଲଙ୍କୁ ଆଶ୍ୱସ୍ତି, ୩ ବର୍ଷ ପାଇଁ ମିଳିଲା ଅନୁମତି

ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଦିଲ୍ଲୀର ସ୍ଥାନୀୟ କୋର୍ଟରୁ ଆଶ୍ବସ୍ତି। ତାଙ୍କୁ ତିନି ବର୍ଷର ବୈଧତା ସହିତ ପାସପୋର୍ଟ ପାଇବାକୁ ଅନୁମତି ଦେଇଛନ୍ତି କୋର୍ଟ। ରାହୁଲଙ୍କୁ ନୂଆ ପାସପୋର୍ଟ ପାଇଁ ଅନୁମତି ମିଳିଛି। କଂଗ୍ରେସ ନେତା ନ୍ୟାସନାଲ ହେରାଲ୍ଡ ମାମଲାରେ ଜଣେ ଅଭିଯୁକ୍ତ ଏବଂ ସୁବ୍ରମଣ୍ୟମ ସ୍ୱାମୀ ତାଙ୍କ ବିରୋଧରେ ଅଭିଯୋଗକାରୀ, ଯିଏ କେବଳ ଗୋଟିଏ ବର୍ଷ ପାଇଁ ଏନଓସି ମଞ୍ଜୁର କରିବାକୁ ଏବଂ ସମୟ ସମୟରେ ଏହାର ସମୀକ୍ଷା କରିବାକୁ କୋର୍ଟରେ ଦାବି କରିଥିଲେ।

ଏହାପୂର୍ବରୁ ରାହୁଲ ଗାନ୍ଧୀଙ୍କ ପିଟିସନରେ ଦିଲ୍ଲୀର ରାଉସ୍ ଆଭେନ୍ୟୁ କୋର୍ଟର ଅତିରିକ୍ତ ମୁଖ୍ୟ ମହାନଗର ନିଗମ ମାଜିଷ୍ଟ୍ରେଟ ଶୁକ୍ରବାର ସକାଳେ ଏହି ମାମଲାର ଶୁଣାଣି ଶେଷ କରିବା ପରେ ଅପରାହ୍ନ ଗୋଟାଏ ପର୍ଯ୍ୟନ୍ତ ନିଜ ନିଷ୍ପତ୍ତି ସଂରକ୍ଷିତ ରଖିଥିଲେ। ପରେ ରାହୁଲ ଗାନ୍ଧୀଙ୍କୁ ତିନି ବର୍ଷର ବୈଧତା ଥିବା ପାସପୋର୍ଟ ପ୍ରଦାନକୁ କୋର୍ଟ ଅନୁମୋଦନ ଦେଇଛନ୍ତି।

ସାଧାରଣ ପାସପୋର୍ଟ ପ୍ରଦାନ ପାଇଁ କୈଣସି ଆପତ୍ତି ପ୍ରମାଣପତ୍ର ବା ଏନଓସି ପ୍ରଦାନ କରି ମାଜିଷ୍ଟ୍ରେଟ୍ କହିଛନ୍ତି, ଆପଣଙ୍କ ଆବେଦନକୁ ଆଂଶିକ ଅନୁମତି ଦେଉଛି। ଯଦିଓ ଏହା ୧୦ ବର୍ଷ ହେବ ନାହିଁ କିନ୍ତୁ କେବଳ ୩ ବର୍ଷ ପାଇଁ ଅବଧି ରହିବ।

କୋର୍ଟଙ୍କ ଦ୍ୱାରା ଦଣ୍ଡିତ ହେବା ପରେ ସାଂସଦ ଭାବେ ଅଯୋଗ୍ୟ ହେବା ପରେ କଂଗ୍ରେସ ନେତା ତାଙ୍କର କୂଟନୈତିକ ପାସପୋର୍ଟ ସମର୍ପଣ କରିଥିଲେ। ତାଙ୍କୁ ‘ମୋଦୀ ଉପନାମ ମନ୍ତବ୍ୟ’ ପାଇଁ ବଦନାମ ମାମଲାରେ ଦୋଷୀ ସାବ୍ୟସ୍ତ ହେବା ପରେ ଗୁଜୁରାଟର ସୁରଟ କୋର୍ଟ ତାଙ୍କୁ ଅଯୋଗ୍ୟ ଘୋଷଣା କରିଥିଲେ। ତା’ପରେ ରାହୁଲ କୂଟନୈତିକ ଗସ୍ତ ସହ ଜଡିତ ଦଲିଲଗୁଡ଼ିକୁ ଫେରସ୍ତ କରିଥିଲେ।

ବିଜେପି ନେତା ସୁବ୍ରମଣ୍ୟମ ସ୍ୱାମୀ କୋର୍ଟରେ ରାହୁଲଙ୍କ ଆବେଦନକୁ ବିରୋଧ କରି କହିଛନ୍ତି ଯେ ୧୦ ବର୍ଷ ପାଇଁ ପାସପୋର୍ଟ ଦେବାର କୌଣସି କାରଣ ନାହିଁ। କଂଗ୍ରେସ ନେତାଙ୍କୁ ବର୍ଷେ ପାଇଁ ଏନଓସି ଦେବାକୁ ଏବଂ ସମୟ ସମୟରେ ଏହାର ସମୀକ୍ଷା କରିବାକୁ ସେ କୋର୍ଟଙ୍କୁ ଦାବି କରିଛନ୍ତି।

ରାହୁଲ ଗାନ୍ଧୀ ନ୍ୟାସନାଲ ହେରାଲ୍ଡ ମାମଲାରେ ଜଣେ ଅଭିଯୁକ୍ତ ଏବଂ ସୁବ୍ରମଣ୍ୟମ ସ୍ୱାମୀ ଅଭିଯୋଗକାରୀ। କୋର୍ଟରେ ଶୁଣାଣି ସମୟରେ ସୁବ୍ରମଣ୍ୟମ୍ ସ୍ୱାମୀ ଏହି ଆବେଦନକୁ ବିରୋଧ କରି କହିଥିଲେ ଯେ ‘ଏଥିରେ କୌଣସି ଯୋଗ୍ୟତା ନାହିଁ’ ଏବଂ ପାସପୋର୍ଟକୁ କେବଳ ଗୋଟିଏ ବର୍ଷ ପାଇଁ ପ୍ରଦାନ କରାଯିବା ସହିତ ଏହା ପ୍ରତିବର୍ଷ ନବୀକରଣ କରାଯିବା ଉଚିତ। ସେ ତାଙ୍କ ପିଟିସନରେ କହିଛନ୍ତି, “ଏହା ଏକ ସ୍ୱତନ୍ତ୍ର ମାମଲା। ୧୦ ବର୍ଷ ପାଇଁ ପାସପୋର୍ଟ ଦିଆଯିବା ଉଚିତ୍ ନୁହେଁ”।

ସୁବ୍ରମଣ୍ୟମ୍ କହିଛନ୍ତି, “ଯେତେବେଳେ ମୁଁ ବ୍ରିଟେନରେ ଥିଲି ଏବଂ ଜଣେ ଅଧିକାରୀ ମୋତେ ସୂଚନା ଦେଇଥିଲେ ଯେ ରାହୁଲ ନିଜକୁ ବ୍ରିଟିଶ ନାଗରିକ ଘୋଷଣା କରିଛନ୍ତି। ଏଭଳି ପରିସ୍ଥିତିରେ ଭାରତୀୟ ଆଇନ ଅନୁଯାୟୀ ତାଙ୍କର ଭାରତୀୟ ନାଗରିକତ୍ୱ ବାତିଲ କରାଯିବା ଉଚିତ”।

କୋର୍ଟରେ ରାହୁଲ ଗାନ୍ଧୀଙ୍କ ଓକିଲ ତରୁନମ୍ ଚିମା କହିଛନ୍ତି ଯେ ୧୦ ବର୍ଷ ପାଇଁ ପାସପୋର୍ଟ ପ୍ରଦାନ ଏକ ସାଧାରଣ ପ୍ରକ୍ରିୟା। ଗୁରୁତର ଅପରାଧ ମାମଲାରେ ଜଡିତ ଲୋକଙ୍କୁ ୧୦ ବର୍ଷ ପାଇଁ ପାସପୋର୍ଟ ଦିଆଯାଇଛି। ଏଥିରେ ୨ଐ ସ୍କାମ ଏବଂ ଅନ୍ୟାନ୍ୟ ପ୍ରକାରର ମାମଲା ମଧ୍ୟ ଅନ୍ତର୍ଭୁକ୍ତ।