ଫୁଲବାଣି: ଜଳୁଛି ଥାନା । ଫିରିଙ୍ଗିଆ ଥାନାରେ ନିଆଁ ଲଗାଇଲେ ଉତ୍ତ୍ୟକ୍ତ ଲୋକେ । ଫିରଙ୍ଗିଆ ପୋଲିସ ବିରୋଧରେ କାର୍ଯ୍ୟାନୁଷ୍ଠାନ ନେଇ ଉତ୍ତେଜନା ଦେଖା ଦେବା ପରେ ଥାନାରେ ନିଆଁ ଲଗାଇ ଦେଇଥିବା ଜାଣିବାକୁ ମିଳିଛି । ଗଞ୍ଜେଇ ଚାଲାଣରେ ଅଭିଯୋଗ ଏପରି ଉନ୍ମତ୍ତ କାଣ୍ଡ ଭିଆଇଛନ୍ତି ଲୋକେ । ଥାନା IIC ଓ ତାଙ୍କ ୨ ସହଯୋଗୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ବିଭିନ୍ନ ଘଟଣାରେ ଜବତ ହେଉଥିବା ଗଞ୍ଜେଇକୁ ଫିରିଙ୍ଗିଆ ଥାନାର ଆଇଆଇସି ବିକ୍ରି କରୁଥିବା ସ୍ଥାନୀୟ ଲୋକେ ଅଭିଯାେଗ କରିଛନ୍ତି । ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଏହି ଥାନା ଅଧିନରେ ଯେତେ ଚୋରା ଗଞ୍ଜେଇ ଜବତ ହେଉଛି ତାହାକୁ ଆଇଆଇସି ହୋମଗାର୍ଡଙ୍କ ସହାୟତାରେ ବିକ୍ରି କରିଦେଉଛନ୍ତି । ତେଣୁ ଉତ୍ତ୍ୟକ୍ତ ଲୋକେ ଏପରି ପଦକ୍ଷେପ ନେଇଛନ୍ତି ।
ସୂଚନାଥାଉ କି, ଗୁରୁବାର ବଳମ୍ବିତ ରାତିରେ ଥାନା ଅଧିକାରୀଙ୍କ ସହ କିଛି କର୍ମଚାରୀ ଏକ ବେଲେରୋ ଗାଡିରେ ଜବତ ଗଞ୍ଜେଇ ନେଇ ଯାଉଥିଲେ । ଏହି ସମୟରେ ଫିରିଙ୍ଗିଆ ସରପଞ୍ଚ, ପୂର୍ବତନ ସରପଞ୍ଚ ଓ ଗ୍ରାମବାସୀ ଗାଡିକୁ ଅଟକାଇଥିଲେ । ଏହି ଗଞ୍ଜେଇ ବିକ୍ରି ପାଇଁ ନେଉଥିବା ସ୍ଥାନୀୟ ଲୋକେ ଅଭିଯୋଗ କରିଥିଲେ । ଏହାର ଭିଡିଓ କରି ଭାଇରାଲ ମଧ୍ୟ କରିଥିଲେ ।
ପୋଲିସ ଅଧିକାରୀ ଓ କର୍ମଚାରୀଙ୍କୁ ନିଲମ୍ବନ କରିବା ଦାବି ନେଇ ଆଜି ଶତାଧିକ ଗ୍ରାମବାସୀ ଫିରିଙ୍ଗିଆ ଠାରେ ରାସ୍ତା ଅବରୋଧ କରିଥିଲେ । ଏପରକି ଦାବି ପୂରଣ ନ ହେବା ଯାଏ ଧାରଣାରୁ ହଟବେ ନାହିଁ ବୋଲି ଅଡି ବସିଥିଲେ । ହେଲେ ହଠାତ୍ ଉତ୍ତ୍ୟକ୍ତ ଲୋକେ ଯାଇ ଥାନାରେ ଭଙ୍ଗା ରୁଜା କରିବା ସହ ନିଆଁ ଲଗାଇ ଦେଇଛନ୍ତି ।