ସିଂହବାହିନୀରେ ଯାତ୍ରା କରିବେ ପିୟୂଷ

କଟକ : କିଛି ଦିନର ନିରବତା ପରେ ପୁଣିଥରେ ବଡ ବୟାନ ଦେଇଛନ୍ତି ଯାତ୍ରାଜଗତର ଚର୍ଚ୍ଚିତ ଖଳନାୟକ ପୀୟୂଷ । ଆସନ୍ତା ଦଶହରାରୁ ପୁଣିଥରେ ମଞ୍ଚକୁ ଓହ୍ଲାଇବେ ବୋଲି ସ୍ପଷ୍ଟ କରିଛନ୍ତି । ଗଣମାଧ୍ୟମ ଆଗରେ ସିଂହବାହିନୀରେ କାମ କରିବେ ବୋଲି ନିଜେ ସ୍ପଷ୍ଟ କରିଛନ୍ତି । ବର୍ଷେ ବିଶ୍ରାମ ପାଇଁ ଆଗରୁ ସେ ସ୍ପଷ୍ଟ କରିଥିଲେ । ହେଲେ ସେ ସେତେବେଳେ ଯେଉଁ ନିଷ୍ପତ୍ତି ନେଇଥିଲେ ସେଥିରୁ ଓହରିଯାଇଛନ୍ତି । ବିବାଦ ତାଙ୍କ ପିଛା ଛାଡୁନଥିବାରୁ ଚଳିତବର୍ଷ ଯାତ୍ରା ମଞ୍ଚକୁ ଚଢିବି ବୋଲି ସେ କହିଛନ୍ତି । ଗତବର୍ଷ ବିବାଦରେ ରହି ଭୂଲ କରିଥିବାରୁ ବର୍ଷେ ବିଶ୍ରାମ ନେବାକୁ ଚାହିଁଥିଲେ । ଆଉ ୨୦୨୬-୨୭ରୁ ପାଞ୍ଚବର୍ଷ ପାଇଁ ସିଂହବାହିନୀ ଯିବାକୁ ଚୁକ୍ତି କରିଥିଲେ ବୋଲି କହିଥିଲେ । ହେଲେ ମାଲିକ ସଂଘ ଏହାକୁ ମଧ୍ୟ ଗ୍ରହଣ କରିନଥିଲେ ବୋଲି ପୀୟୂଷ କହିଛନ୍ତି । ଯଦି ବିବାଦ ପିଛା ଛାଡୁନି ତେବେ ବର୍ଷେ କାହିଁକି ବିଶ୍ରାମ ନେବି ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି ।
କିଛିଦିନ ତଳେ ପୀୟୂଷଙ୍କ ପୁରୁଣା ମାଲିକ ଅର୍ଥାତ ସୂର୍ଯ୍ୟ ମନ୍ଦିର ମାଲିକ ପ୍ରମୋଦ ସ୍ୱାଇଁ ତାଙ୍କୁ ନିଜ ଟିମରେ ରଖିବା ପାଇଁ ଚାହିଁଥିଲେ । ଏପରିକି ପୀୟୂଷ ମଧ୍ୟ ଟଙ୍କା ଅଗ୍ରୀମ ନେଇଥିବା କଥା କହିଥିଲେ । କେବଳ ସେତିକି ନୁହେଁ ସିଂହବାହିନୀ ମାଲିକଙ୍କଠାରୁ ମଧ୍ୟ ସେ ଟଙ୍କା ନେଇଥିଲେ । ଉଭୟଙ୍କ ମଧ୍ୟରେ ବିବାଦ ଲାଗି ରହିବାରୁ ପୀୟୂଷ ଯାତ୍ରା କରିବେ ନାହିଁ ବୋଲି କହିଥିଲେ । ଏବେ ସେହି ବିବାଦ ଥମି ନଥିବା ବେଳେ ପୀୟୂଷ ନୂଆ କଥା କହିଛନ୍ତି । ଯେହେତୁ ସେ ସିଂହବାହିନୀ ସହ ଚୁକ୍ତି କରିଛନ୍ତି ତେଣୁ ସେହି ସିଂହବାହୀନୀରେ କାମ କରିବେ । ଆଉ ଯଦି ସେ ବିବାଦରେ ରହୁଛନ୍ତି ତେବେ ସେମିତି ବିବାଦ ଚାଲୁ ପଛେ ନିଜ କର୍ମ ଜାରି ରଖିବେ ବୋଲି କହିଛନ୍ତି । ପୀୟୂଷଙ୍କ ଏଭଳି ମନ୍ତବ୍ୟ ପରେ ଯାତ୍ରା ଜଗତରେ ପୁଣି ହଇଚଇ ସୃଷ୍ଟି ହୋଇଛି । ପୀୟୂଷଙ୍କ ଏଭଳି ବୟାନ ପରେ ସୂର୍ଯ୍ୟ ମନ୍ଦିର ମାଲିକ କି ପ୍ରକାର ନିଷ୍ପତି ନେଉଛନ୍ତି ତାକୁ ହିଁ ସମସ୍ତେ ଚାହିଁଛନ୍ତି । ସେ ତାଙ୍କ ଟଙ୍କା ପାଇବା ପାଇଁ ଚାହିଁବେ ନାଁ ବିକଳ୍ପ କଥା କିଛି ଚିନ୍ତା କରିବେ ତାହା ସମୟ ହିଁ କହିବ ।