ଭୁବନେଶ୍ୱର: ନବୀନଙ୍କ ପ୍ରତି ପୁଣି ମୋଦୀ ନୀରବ । ଖୋର୍ଦ୍ଧା ଓ ବାରିପଦା ପରି ବଲାଙ୍ଗୀରରେ ମଧ୍ୟ ନବୀନଙ୍କ ନାମ ନେଇ ନାହାନ୍ତି ମୋଦୀ । ତୃତୀୟ ଥର ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ନରମ ମନୋଭାବ ପୋଷଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।
ବଲାଙ୍ଗୀରର ପଥରଚେପାଠାରେ ଅନୁଷ୍ଠିତ ‘ଜବାବ୍ ମାଗୁଛି ଓଡ଼ିଶା’ କାର୍ଯ୍ୟକ୍ରମରେ କଂଗ୍ରେସ ଉପରେ ମୋଦୀ ବର୍ଷିଥିଲେ ମଧ୍ୟ ଓଡ଼ିଶା ସରକାରକୁ ମାତ୍ର କେଇଟି ପ୍ରଶ୍ନ ପଚାରି ନୀରବ ରହିଛନ୍ତି । କେବଳ ଏତିକି କହିଛନ୍ତି ନିର୍ବାଚନ ଆସିବ ଓ ଯିବ । ନବୀନଙ୍କ ନା ନେଇ ମୋଦୀ କହିଛନ୍ତି ନିର୍ବାଚନ ପାଇଁ ଟଙ୍କା ପକାଇ ରଖନାହିଁ । ଲୋକଙ୍କ କଥା ବୁଝ । ଅଳ୍ପରେ କହିଛନ୍ତି ଆଦିବାସୀଙ୍କ ଲାଗି ଟଙ୍କା ଖର୍ଚ୍ଚ ନ ହୋଇ ପଡ଼ିରହିଛି । ଖଣି ଅଞ୍ଚଳର ବିକାଶ ଲାଗି ଡିଏମଏଫରେ ୪୦୦୦ କୋଟି ଟଙ୍କା ଅଛି । ତେବେ ଓଡ଼ିଶା ସରକାର ଏହାକୁ ଖର୍ଚ୍ଚ ନ କରି କାହିଁକି ପକାଇ ରଖିଛି ବୋଲି ତାଗିଦ୍ କରିଛନ୍ତି ନରେନ୍ଦ୍ର ମୋଦୀ । ସରକାର ଶୋଇଛି ବୋଲି କହିଛନ୍ତି ମୋଦୀ ତେବେ ନବୀନଙ୍କୁ କୌଣସି ପ୍ରକାର ସିଧାସଳଖ ଟାର୍ଗେଟ କରିନାହାନ୍ତି ଏହି ଜନସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।
ବାରମ୍ବାର ନବୀନଙ୍କ ପ୍ରତି ମୋଦିଙ୍କର ଏଭଳି ନରମ ମନୋଭାବକୁ ନେଇ ରାଜନୈତିକ ପର୍ଯ୍ୟବେକ୍ଷକ ମହଲରେ ଚର୍ଚ୍ଚା ଆରମ୍ଭ ହୋଇଯାଇଛି । ନିକଟରେ ଶେଷ ହୋଇଥିବା ୫ଟି ରାଜ୍ୟର ନିର୍ବାଚନ ଫଳାଫଳ ପରେ ୨୦୧୯ ସାଧାରଣ ନିର୍ବାଚନରେ କେନ୍ଦ୍ରରେ ଏନ୍ଡିଏ ସରକାର ସ୍ପଷ୍ଟ ବହୁମତ ଆଣିବା ନେଇ କଳ୍ପନାଜଳ୍ପନା ଆରମ୍ଭ ହୋଇଯାଇଛି । ହୁଏତ ଖାସ୍ ଏଥିପାଇଁ ମୋଦିଙ୍କର ନବୀନଙ୍କ ଉପରେ ରହିଛି ନଜର । ଉତରପ୍ରଦେଶରେ ବିଏସ୍ପି ଓ ଏସ୍ପି ମେଣ୍ଟ ହୋଇସାରିଥିବା ବେଳେ ମହାଗଠବନ୍ଧନର ମଧ୍ୟ ପ୍ରକ୍ରୀୟା ଆରମ୍ଭ ହୋଇସାରିଲାଣି । ଏଭଳି ପରିସ୍ଥିତିରେ ନବୀନ ପଟ୍ଟନାୟକ ଉଭୟ କଂଗ୍ରେସ ଓ ବିଜେପି ଠାରୁ ସମଦୂରତା ରଖିଛନ୍ତି । ମହାଗଠବନ୍ଧନରେ ମଧ୍ୟ ସାମିଲ୍ ହୋଇନାହାନ୍ତି ନବୀନ । ତେବେ ନବୀନଙ୍କୁ ନାଖୁସ୍ କରିବାକୁ ଚାହୁଁନାହାନ୍ତି ମୋଦୀ ତେଣୁ ବାରମ୍ବାର ଓଡ଼ିଶା ଗସ୍ତରେ ଆସୁଥିଲେ ମଧ୍ୟ ମୋଦୀ ନବୀନଙ୍କ ପ୍ରତି ବେଶ ନରମ ମନୋଭାବ ରଖୁଥିବା ରାଜନୈତିକ ଚର୍ଚ୍ଚା କରୁଛନ୍ତି ।
ତେବେ କଂଗ୍ରେସ ଉପରେ ବର୍ଷିଛନ୍ତି ମୋଦୀ । ପୂର୍ବ କଂଗ୍ରେସ ସରକାର ତୂଳନାରେ ଓଡ଼ିଶାକୁ ଏନ୍ଡିଏ ସରକାର ୫ ଗୁଣା ଅଧିକ ଅର୍ଥ ଦେଇଛନ୍ତି ବୋଲି ମୋଦି କହିଛନ୍ତି । ଏକ ମାସ ମଧ୍ୟରେ ୨୦୦୦୦ କୋଟି ଟଙ୍କାର ପୁଞ୍ଜିନିବେଶ ପୂର୍ବରୁ କୌଣସି କେନ୍ଦ୍ର ସରକାର କରି ନଥିଲେ ବୋଲି ମୋଦୀ ପ୍ରକାଶ କରିଥିଲେ । ସେହିପରି ୬୦୦୦ କୋଟିର ରାସନ୍ କାର୍ଡ ରଦ୍ଦ ହୋଇଛି । ଜନ୍ମ ହୋଇ ନଥିବା ଲୋକଙ୍କ ନା’ରେ କାର୍ଡ ଜାରି ହୋଇଥିଲା । ତେଣୁ କେନ୍ଦ୍ରସରକାର ଫର୍ଜି ରାସନ୍ କାର୍ଡ ବନ୍ଦ କରିଦେଇଥିବାରୁ ଅସାଧୁ ଲୋକଙ୍କ ରୋଜଗାର ବନ୍ଦ ହୋଇଯାଇଛି । ଖାସ୍ ସେଥିଲାଗି ସେହି ଅସାଧୁ ଲୋକମାନେ ମୋଦିଙ୍କୁ ଟାର୍ଗେଟ କରୁଛନ୍ତି । ଗରୀବ ଲୋକଙ୍କୁ ୨ ଟଙ୍କା କେଜିରେ ଗହମ ଦିଆଯାଉଛି, ୩୦ ଟଙ୍କାରେ ଚାଉଳ କିଣି ୩ ଟଙ୍କାରେ ଦିଆଯାଉଛି । ଦେଶରେ ଲୁଟ୍ ହେବାକୁ ଯାଉଥିବା ୯୦ ହଜାର କୋଟି ଟଙ୍କାକୁ ଅଟକାଇ ଦିଆଯାଇଛି ସେଥିପାଇଁ ଲୁଟେରାମାନଙ୍କର ମୁଁ ଟାର୍ଗେଟ ବୋଲି ମୋଦୀ କହିଛନ୍ତି ।
ତେବେ କଂଗ୍ରେସ ଉପରେ ବର୍ଷିଥିଲେ ମଧ୍ୟ ବିଜେଡିକୁ ସେଭଳି ଟାର୍ଗେଟ କରିନାହାନ୍ତି ମୋଦୀ । ଏଭଳି ପରିସ୍ଥିତିରେ ସାଧାରଣ ନିର୍ବାଚନ ଆଉ ମାତ୍ର ମାସ ଦୁଇଟା ଥିବା ବେଳେ କ’ଣ ହେବ ଅମିତ ଶାହାଙ୍କର ମିଶନ୍ ୱାନ୍-୨୦ ସେ ନେଇ ସନ୍ଦେହ ଆରମ୍ଭ ହୋଇଗଲାଣି । ଚର୍ଚ୍ଚା ହୋଇଛି ଆଉ ବିଜେଡି ସରକାରକୁ କାଢ଼ି ବାହାର କରିପାରିବ ନାହିଁ ବିଜେପି । କାରଣ ଏବେ ବି ରହିଛି ବିଜେଡି ଓ ନବୀନଙ୍କ ଦବଦବା । ତେଣୁ ହୁଏତ ୨୦୧୯ ନିର୍ବାଚନ ପରେ ବିଜେଡିର ହାତ ଧରିବା ପାଇଁ ହାତ ବଢ଼ାଇପାରେ ବିଜେପି । ସେ ନେଇ ଆରମ୍ଭ ହୋଇଯାଇଛି ଚର୍ଚ୍ଚା ।