ଭୁବନେଶ୍ୱର: ବୁଧବାର ଘଟିଥିବା ରସୁଲଗଡ ଫ୍ଲାଏଓଭର ହତ୍ୟାକାଣ୍ଡରେ ଆଉ ଦୁଇ ଜଣଙ୍କୁ ଗିରଫ କଲା କମିଶନରେଟ୍ ପୋଲିସ । ସଦ୍ୟ ଗିରଫ ଦୁଇ ଜଣଙ୍କ ମଧ୍ୟରେ ମଧ୍ୟ ଜଣେ ମହିଳା ଅଭିଯୁକ୍ତ ରହିଛନ୍ତି । ଏଥିସହିତ ହତ୍ୟା ମାମଲାରେ ଗିରଫ ସଂଖ୍ୟା ୫କୁ ବୃଦ୍ଧି ପାଇଛି ।
ପୋଲିସ ଦୁଇଟି ବାଇକ୍ ସହ ହତ୍ୟାକାଣ୍ଡରେ ବ୍ୟବହୃତ ଅସ୍ତ୍ର ସହିତ ହତ୍ୟା କରିବା ସମୟରେ ହତ୍ୟାକାରୀ ପିନ୍ଧିଥିବା ପୋଷାକ ଜବତ କରିଛି । ସେପଟେ ଗୁରୁବାର ପୋଲିସ ଅଭିଯୁକ୍ତମାନଙ୍କୁ ନେଇ ଦୟା ନଦୀ ପଠାରେ କ୍ରାଇମ ରୀକ୍ରିଏସନ କରିଥିଲା । ଅଭିଯୁକ୍ତ ବ୍ୟକ୍ତି ହତ୍ୟା ପରେ କିପରି ଅସ୍ତ୍ରଶସ୍ତ୍ର ନେଇ ଭୁବନେଶ୍ୱରର ଲିଙ୍ଗିପୁର ନିକଟ ଦୟା ନଦୀର ପାଣିରେ ଲୁଚାଇ ରଖିଥିଲେ ତାହା ପ୍ରଦର୍ଶନ କରିଥିଲେ ।
ସୂଚନାଯୋଗ୍ୟ, ବୁଧବାର ସକାଳୁ ପୋଲିସ ମିତ୍ର ଭାବେ କାମ କରୁଥିବା ସହଦେବ ନାୟକଙ୍କୁ ବାଣୀ ବିହାର-ରସୁଲଗଡ଼ ରାସ୍ତାରେ ଦେହରୁ ମୁଣ୍ଡ ପୁରା ଅଲଗା କରିଦେଇଥିଲେ ଏହି ୫ ଅଭିଯୁକ୍ତ ମାନେ । ବ୍ରାଉନସୁଗାର କାରବାର ଓ ବ୍ୟକ୍ତିଗତ ଶତ୍ରୁତାକୁ ନେଇ ଏହି ବୀଭତ୍ସ ହତ୍ୟାକାଣ୍ଡ ଘଟାଇଛନ୍ତି ଅଭିଯୁକ୍ତ ।