ନୂଆଦିଲ୍ଲୀ: କଂଗ୍ରେସ ନେତା ଏବଂ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ଏବେ ପୁଣି ଥରେ ୟେଲୋ ବୁକ୍ ନିୟମ ଉଲ୍ଲଂଘନ କରିଛନ୍ତି। CRPF ଏକ ଚିଠି ଲେଖି ଏ ବିଷୟରେ ସୂଚନା ଦେଇଛି। ରାହୁଲ ଗାନ୍ଧୀ ତାଙ୍କ ବିଦେଶ ଯାତ୍ରା ସମୟରେ ବାରମ୍ବାର ସୁରକ୍ଷା ପ୍ରୋଟୋକଲ୍ ଉଲ୍ଲଂଘନ କରୁଥିବା ନେଇ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ ୧୦ ସେପ୍ଟେମ୍ବରରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୁ ଏକ ଚିଠି ଲେଖିଛି । ଯେଉଁଥିରେ CRPF, VVIP ସୁରକ୍ଷା ମୁଖ୍ୟ ସୁନୀଲ ଜୁନ୍ ରାହୁଲ ଗାନ୍ଧୀଙ୍କ ଅବହେଳା ଉପରେ ଚିନ୍ତା ପ୍ରକାଶ କରିଛନ୍ତି । ଚିଠିରେ କୁହାଯାଇଛି ଯେ ରାହୁଲ ପୂର୍ବରୁ ସୂଚନା ନ ଦେଇ ବିଦେଶ ଯାତ୍ରା କରନ୍ତି। ଏହା ତାଙ୍କ Z ପ୍ଲସ୍ ସୁରକ୍ଷା ପାଇଁ ଏକ ଗମ୍ଭୀର ବିପଦ ସୃଷ୍ଟି କରୁଛି। ମାଲେସିଆ ଯାତ୍ରା ସମୟରେ ରାହୁଲ ଗାନ୍ଧୀ ନିୟମ ଉଲ୍ଲଂଘନ କରିଛନ୍ତି। ସୁରକ୍ଷା ଏଜେନ୍ସି ଅନୁଯାୟୀ, ଏହା VVIP ମାନଙ୍କର ସୁରକ୍ଷା ପାଇଁ ବିପଦ ସୃଷ୍ଟି କରୁଛି।
ବିବାଦରେ ରାହୁଲଙ୍କ ବିଦେଶ ଯାତ୍ରା!
‘ୟେଲୋ ବୁକ’ ପ୍ରୋଟୋକଲ ଅନୁଯାୟୀ, ଜେଡ୍ ପ୍ଲସ୍ ଆଡଭାନ୍ସ ସିକ୍ୟୁରିଟି ଲିଆଜନ ସୁରକ୍ଷା ଥିବା ବ୍ୟକ୍ତି ବିଦେଶ ଯାତ୍ରା କରିବାର ଅତି କମରେ ୧୫ ଦିନ ପୂର୍ବରୁ CRPFକୁ ସୂଚନା ଦେବାକୁ ବାଧ୍ୟ। କିନ୍ତୁ, ଇଟାଲୀ, ଭିଏତନାମ, ଦୁବାଇ, କତାର, ଲଣ୍ଡନ ଏବଂ ମାଲେସିଆ ଭଳି ଯାତ୍ରା ସମୟରେ ରାହୁଲ ଗାନ୍ଧୀ ଏପରି କରି ନଥିଲେ। ଅଭିଯୋଗ ହୋଇଛି ଯେ ରାହୁଲ ସୁରକ୍ଷା ଏଜେନ୍ସକୁ ଅବଗତ ନକରି ବିଦେଶ ଯାତ୍ରା କରୁଥିଲେ । ଯାହାକୁ ନେଇ CRPF ଚିଠିରେ ଭବିଷ୍ୟତରେ ପ୍ରୋଟୋକଲକୁ କଡ଼ାକଡ଼ି ପାଳନ କରିବାକୁ ଅନୁରୋଧ କରିଛି । କାରଣ ଏହା VVIP ସୁରକ୍ଷାକୁ ଦୁର୍ବଳ କରିଥାଏ ଏବଂ ବ୍ୟକ୍ତିଙ୍କ ସୁରକ୍ଷାରେ ବିପଦକୁ ବୃଦ୍ଧି କରିଥାଏ।
କାହିଁକି ବାରମ୍ବାର ନିୟମ ଭାଙ୍ଗୁଛନ୍ତି ରାହୁଲ?
କୌଣସି ନେତା ମନ୍ତ୍ରୀଙ୍କୁ କେଉଁ ପ୍ରକାର ସୁରକ୍ଷା ଦିଆଯିବ ତାହା ଗୃହ ମନ୍ତ୍ରାଣାଳୟ ଦ୍ବାରା ଚୟନ କରାଯାଇଥାଏ । ଅନେକ ସମୟରେ ବିରୋଧୀ ଦଳ କିମ୍ବା ସରକାରରେ ଥାଇ ମଧ୍ୟ କିଛି ନେତା ଗୋପନୀୟତା ରକ୍ଷା କରିବା ପାଇଁ ସୁରକ୍ଷା ବଳଗୁଡିକୁ ଅବଗତ କରାନ୍ତି ନାହିଁ । ୟେଲୋ ବୁକର ନିୟମ ଭଙ୍ଗ କରିବାରେ ରାହୁଲ ପ୍ରଥମ ନୁହନ୍ତି । ରାହୁଲ ଗାନ୍ଧୀଙ୍କ ପୂର୍ବରୁ ମଧ୍ୟ ଅନେକ ନେତା ୟେଲୋ ବୁକର ନିୟମ ଭଙ୍ଗ କରିଆସୁଛନ୍ତି । ରାହୁଲ ଗାନ୍ଧୀଙ୍କ ପିତା ରାଜୀବ ଗାନ୍ଧୀଙ୍କ ଉପରେ ମଧ୍ୟ ସୁରକ୍ଷା ପ୍ରତି ଅବହେଳା ପ୍ରଦର୍ଶନ କରିବାର ଅଭିଯୋଗ ଆସିଥିଲା। ତେବେ ରାହୁଲ ଗାନ୍ଧୀ ଅନେକ ଲୋକଙ୍କୁ ଭେଟିବା ପାଇଁ ଏବଂ କେତେବେଳେ ତାଙ୍କର ଗୋପନୀୟତା ବଜାୟ ରଖିବା ପାଇଁ ଏହା କରୁଥିବା କୁହାଯାଇଛି । ଗତ ୯ ମାସରେ ୬ ଥର ୟେଲୋ ବୁକର ନିୟମ ଉଲ୍ଲଂଘନ କରିଛନ୍ତି ରାହୁଲ । ଆଉ ୨୦୨୦ ପରଠାରୁ ୧୧୩ ଥର ପ୍ରୋଟୋକଲ ଭଙ୍ଗ କରିଛନ୍ତି ରାହୁଲ । ଖାଲି ସେ ବିଦେଶ ଯାତ୍ରା ତାହା ନୁହେଁ, ଭାରତ ଯୋଡୋ ଯାତ୍ରା ସମୟରେ ଭିଡ଼ରେ ପ୍ରବେଶ କରିବା ବେଳେ ରାହୁଲ ମଧ୍ୟ ଏହି ପ୍ରୋଟୋକଲ ଉଲଘଂନ କରିଥିଲେ ।
ୟେଲୋ ବୁକ୍ କ’ଣ?
ଭାରତର ରାଷ୍ଟ୍ରପତି, ଉପରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀଙ୍କ ବ୍ୟତୀତ, ଅନ୍ୟ ସମସ୍ତ VVIP ଲୋକଙ୍କ ସୁରକ୍ଷା ଅନେକ ନିୟମ ଏବଂ ନିର୍ଦ୍ଦେଶାବଳୀ ଆଧାରରେ ସ୍ଥିର କରାଯାଏ। VVIP ଲୋକଙ୍କୁ ଏହି ନିୟମ ପାଳନ କରିବାକୁ ପଡିବ। ଏହି ସମସ୍ତ ନିୟମ ଏବଂ ନିର୍ଦ୍ଦେଶାବଳୀ ଗୃହ ମନ୍ତ୍ରଣାଳୟ ଦ୍ୱାରା ଏକ ପୁସ୍ତକରେ ଲେଖାଯାଇଛି ଏବଂ VVIP ଲୋକଙ୍କୁ ଦିଆଯାଇଛି। ଏହି ପୁସ୍ତକକୁ ୟେଲୋ ବୁକ୍ କୁହାଯାଏ। ଯେଉଁଥିରେ ଭିନ୍ନ-ଭିନ୍ନ ଲୋକମାନଙ୍କୁ ଭିନ୍ନ-ଭିନ୍ନ ସ୍ତରରେ Z+, Z, Y ଏବଂ X ସୁରକ୍ଷା ପ୍ରଦାନ କରାଯାଏ। ଯଦି ଏଥିରେ ଲିଖିତ ଥିବା ସୁରକ୍ଷା ପ୍ରୋଟୋକଲ୍ ଭଙ୍ଗ ହୁଏ, ତେବେ ସିଆରପିଏଫ୍ ଅଧିକାରୀ ସ୍ଥାନୀୟ ପୋଲିସ୍ କିମ୍ବା ସମ୍ବନ୍ଧିତ ଏଜେନ୍ସି ଏକ ଲିଖିତ ଅଭିଯୋଗ ପଠାନ୍ତି। ଏହାପରେ ପୋଲିସ୍ ଏଫଆଇଆର୍ ରୁଜୁ କରେ ଏବଂ ମାମଲାର ତଦନ୍ତ ହୁଏ।
କଂଗ୍ରେସକୁ ଘେରିଲା ବିଜେପି
ବିଜେପି ସିଆରପିଏଫର ଚିଠିକୁ ନେଇ ରାହୁଲ ଗାନ୍ଧୀ ଏବଂ କଂଗ୍ରେସ ଉପରେ ଆକ୍ରମଣ କରିଛି। ବିଜେପି ସିଧାସଳଖ ପ୍ରଶ୍ନ ଉଠାଇଛି ଯେ ରାହୁଲ ତାଙ୍କ ବିଦେଶ ଯାତ୍ରା ସମୟରେ କ’ଣ ଲୁଚାଇବାକୁ ଚେଷ୍ଟାକରନ୍ତି? କେବଳ ଏତିକି ନୁହେଁ, କେନ୍ଦ୍ରମନ୍ତ୍ରୀ ଗିରିରାଜ ସିଂହ ମଧ୍ୟ ତଦନ୍ତ ଦାବି କରିଛନ୍ତି। ଗିରିରାଜ ସିଂହ କହିଛନ୍ତି, “ରାହୁଲ ଗାନ୍ଧୀଙ୍କୁ ସୁରକ୍ଷା ଦିଆଯାଇଛି, କିନ୍ତୁ ସେ ସୁରକ୍ଷା ପ୍ରୋଟୋକଲ ପାଳନ କରନ୍ତି ନାହିଁ। ସେ ୯ ମାସରେ ୬ ଥର ବିଦେଶ ଯାଇଥିଲେ, ଏହାର ତଦନ୍ତ ହେବା ଉଚିତ। ଯଦି ସେ ବ୍ୟକ୍ତିଗତ ସମ୍ପର୍କ ପାଇଁ ଯାଆନ୍ତି, ତେବେ ତାହା ପ୍ରକାଶ କରନ୍ତୁ। ନଚେତ୍, ସେ କେଉଁଠିକୁ ଯାଆନ୍ତି ଏବଂ କ’ଣ କରନ୍ତି ତାହା ଜାଣିବା ପାଇଁ ସରକାର ଏକ ତଦନ୍ତ କମିଟି ଗଠନ କରିବା ଉଚିତ।” ବୋଲି ମନ୍ତ୍ରୀ ଦାବି କରିଛନ୍ତି ।
ସେପଟେ କଂଗ୍ରେସ ରାହୁଲ ଗାନ୍ଧୀଙ୍କ ବିରୁଦ୍ଧରେ ବିଦେଶରେ ସୁରକ୍ଷା ପ୍ରକ୍ରିୟା ଉଲ୍ଲଂଘନ ଅଭିଯୋଗକୁ ସରକାରଙ୍କ ଦ୍ବାରା ଦିଆଯାଉଥିବା ଏକ ଧମକ ବୋଲି କହିଛନ୍ତି । ଏନେଇ କଂଗ୍ରେସ ନେତା ପବନ ଖେରା କହିଛନ୍ତି, “ଏହି ତଥାକଥିତ ଚିଠିର ବିଷୟବସ୍ତୁ ଗଣମାଧ୍ୟମ ମାଧ୍ୟମରେ ପ୍ରକାଶିତ ହେବା ସମୟ ଏବଂ ଉପାୟ ବହୁତ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇଥାଏ – କାହିଁକି ଏହି ନିର୍ଦ୍ଦିଷ୍ଟ ସମୟକୁ ସରକାର ବାଛିଥିଲେ। ଆମେ ଜାଣୁ ଯେ ସରକାର ‘ଭୋଟ୍ ଚୋରି’ ଅଭିଯାନ ବିଷୟରେ ବହୁତ ଚିନ୍ତିତ। ଆମେ ଏହା ମଧ୍ୟ ଜାଣୁ ଯେ ପ୍ରଧାନମନ୍ତ୍ରୀ ଗାନ୍ଧୀ ଯେଉଁ ହାଇଡ୍ରୋଜେନ୍ ବୋମା ବିଷୟରେ କହିଛନ୍ତି ତାହା ବିଷୟରେ ବହୁତ ଚିନ୍ତିତ…ଆପଣ ଚିନ୍ତିତ ହେବା ଉଚିତ, ଆପଣଙ୍କର ଚିନ୍ତିତ ହେବାର ସମସ୍ତ କାରଣ ଅଛି କିନ୍ତୁ ଏହି ପ୍ରସଙ୍ଗକୁ ରାଜନୀତିକରଣ କରନ୍ତୁ ନାହିଁ। ଆପଣ ଏହି ଚିଠିର ବିଷୟବସ୍ତୁକୁ ସର୍ବସାଧାରଣରେ ଲିକ୍ କରିବା ଉଚିତ୍ ନଥିଲା, ତାହା ପୁଣି ରାହୁଲ ଗାନ୍ଧୀଙ୍କ ସୁରକ୍ଷା ଭଳି ଏକ ସମ୍ବେଦନଶୀଳ ବିଷୟ….ଏଥିସହିତ ସେ ବିଜେପିର ପ୍ରତିକ୍ରିୟାକୁ ଆହୁରି ସମାଲୋଚନା କରି କହିଛନ୍ତି, “ଏହା କ’ଣ ଏକ ଧମକ? ସେମାନେ ରାହୁଲ ଗାନ୍ଧୀଙ୍କୁ ଧମକ ଦେବାକୁ ଚେଷ୍ଟା କରୁଛନ୍ତି କି ବୋଲି ସେ ପ୍ରଶ୍ନ କରିଛନ୍ତି । ବିଜେପିର ଏହି ନିର୍ଦ୍ଦିଷ୍ଟ ମନ୍ତବ୍ୟ, ଏହା ଏକ ରାଜନୈତିକ ଦଳ ଏବଂ ବର୍ତ୍ତମାନ ସରକାର କହୁନଥିବା ଏହି ଘୃଣ୍ୟ ମନ୍ତବ୍ୟ ଦେଉଛନ୍ତି।
Comments are closed.