ରାଜଗିରରେ ଆୟୋଜିତ ହେବ ଏସିଆ କପ୍ ୨୦୨୫; ୨୯ଅଗଷ୍ଟରୁ ଟୁର୍ଣ୍ଣାମେଣ୍ଟ ଆରମ୍ଭ

ନୂଆଦିଲ୍ଲୀ: ପୁଣି ବିହାରକୁ ଫେରିଲା ହକି । ବିହାରର ରାଜଗିର ସହରରେ ହକି ଏସିଆ କପ୍ ୨୦୨୫ ଆୟୋଜିତ ହେବ । ସୋମବାର ହକି ଇଣ୍ଡିଆ ଏବଂ ବିହାର ରାଜ୍ୟ କ୍ରୀଡ଼ା ପ୍ରାଧିକରଣ ମଧ୍ୟରେ ଏ ସମ୍ପର୍କରେ ଏକ ଏମଓୟୁ ସ୍ୱାକ୍ଷରିତ ହୋଇଛି। ଏହି ଟୁର୍ଣ୍ଣାମେଣ୍ଟ ୨୯ ଅଗଷ୍ଟରୁ ୭ ସେପ୍ଟେମ୍ବର ପର୍ଯ୍ୟନ୍ତ ରାଜଗିର ହକି ଷ୍ଟାଡିୟମରେ ଖେଳାଯିବ ।

ନଭେମ୍ବର ୨୦୨୪ରେ ଆୟୋଜିତ ମହିଳା ଏସିଆନ୍ ଚାମ୍ପିଅନ୍ସ ଟ୍ରଫି ପରେ ରାଜଗିର ଦ୍ବାରା ଆୟୋଜିତ ଏହା ଦ୍ୱିତୀୟ ଆନ୍ତର୍ଜାତୀୟ କ୍ରୀଡା ଇଭେଣ୍ଟ ହେବ।  ସୂଚନାଥାଉକି, ଏହି ମହିଳା ଏସିଆନ୍ ଚାମ୍ପିଅନ୍ସ ଟ୍ରଫିରେ ଭାରତ ବିଜୟ ହାସଲ କରିଥିଲା ।

Mark your calendars
The Hero Asia Cup 2025 is coming to Rajgir Bihar.
From 29th August to 7th September.

Get ready for an electrifying showdown of Asia’s finest! #HockeyIndia #IndiaKaGame
.
.
.@CMO_Odisha @Media_SAI @sports_odisha @IndiaSports pic.twitter.com/tCRBILqkSb

— Hockey India (@TheHockeyIndia) March 31, 2025

ଏହି ମହାଦେଶୀୟ ଟୁର୍ଣ୍ଣାମେଣ୍ଟର ଦ୍ୱାଦଶ ସଂସ୍କରଣରେ ଭାରତ, ପାକିସ୍ତାନ, ଜାପାନ, କୋରିଆ, ଚୀନ୍ ଏବଂ ମାଲେସିଆ ସମେତ ଆଠଟି ଦଳ ଅଂଶଗ୍ରହଣ କରିବେ। ବାକି ଦୁଇଟି ଦଳ ଯୋଗ୍ୟତା ଅର୍ଜନ ଟୁର୍ଣ୍ଣାମେଣ୍ଟ AHF କପ୍ ମାଧ୍ୟମରେ ସେମାନଙ୍କର ସ୍ଥାନ ସୁରକ୍ଷିତ କରିବେ।

ପୁରୁଷ ଏସିଆ କପ୍ ଇତିହାସରେ ଦକ୍ଷିଣ କୋରିଆ ପାଞ୍ଚଟି ଟାଇଟଲ (୧୯୯୪, ୧୯୯୯, ୨୦୦୯, ୨୦୧୩ ଏବଂ ୨୦୨୨) ସହିତ ସବୁଠାରୁ ସଫଳ ଦଳ ହୋଇଛି । ଏହା ପରେ ଭାରତ (୨୦୦୩, ୨୦୦୭ ଏବଂ ୨୦୧୭) ଏବଂ ପାକିସ୍ତାନ (୧୯୮୨, ୧୯୮୫ ଏବଂ ୧୯୮୯) ପ୍ରତ୍ୟେକେ ତିନି ତିନି ଥର ଟୁର୍ଣ୍ଣାମେଣ୍ଟ ଜିତିଛନ୍ତି।

ଏହି ହିରୋ ଏସିଆ କପ୍ ବେଶ୍ ଗୁରୁତ୍ୱପୂର୍ଣ୍ଣ ଟୁର୍ଣ୍ଣାମେଣ୍ଟ ହେବ; କାରଣ ବେଲଜିୟମ ଏବଂ ନେଦରଲ୍ୟାଣ୍ଡ ଦ୍ୱାରା ଆୟୋଜିତ ହେବାକୁ ଥିବା ୨୦୨୬ FIH ପୁରୁଷ ହକି ବିଶ୍ୱକପ୍ ପାଇଁ ଏହା ଏକ ଯୋଗ୍ୟତା ଇଭେଣ୍ଟ । ଏହି ଟୁର୍ଣ୍ଣାମେଣ୍ଟର ବିଜେତା ଦଳ ବିଶ୍ୱକପ ପାଇଁ ସିଧାସଳଖ ଯୋଗ୍ୟତା ଅର୍ଜନ କରିବେ ।

ତେବେ ହକି ଇଣ୍ଡିଆର ସଭାପତି ଡକ୍ଟର ଦିଲ୍ଲୀପ ତିର୍କୀ କହିଛନ୍ତି ଯେ, ରାଜଗିରରେ ୨୦୨୫ ହିରୋ ଏସିଆ କପ୍ ଆୟୋଜନ କରିବା ଭାରତୀୟ ହକି ପାଇଁ ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଷ୍ଟାଡିୟମଟି ଅନ୍ତର୍ଜାତୀୟ ମାନର, ଏବଂ ମୁଁ ନିଶ୍ଚିତ ଯେ ଏହା ଖେଳାଳି ଏବଂ ଦର୍ଶକଙ୍କ ପାଇଁ ଏକ ରୋମାଞ୍ଚକର ପରିବେଶ ପ୍ରଦାନ କରିବ। ୨୦୨୬ ବିଶ୍ୱକପ୍ ପାଇଁ ଏସିଆ କପ୍ ଏକ ଯୋଗ୍ୟତା ଅର୍ଜନ ଟୁର୍ଣ୍ଣାମେଣ୍ଟ ହୋଇଥିବାରୁ ଆମକୁ ରୋମାଞ୍ଚକର ଏବଂ ଦକ୍ଷତା ପରିପୂର୍ଣ୍ଣ ମ୍ୟାଚ୍ ଦେଖିବାକୁ ମିଳିବ ।