ମୁମ୍ବାଇ: ୨ ଭାଗରେ ରିଲିଜ ହେବ ନୀତିଶ ତିୱାରୀଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ରାମାୟଣ’ l ଚଳଚ୍ଚିତ୍ରର ଘୋଷଣା ପରଠାରୁ ପ୍ରଶଂସକମାନେ ଏହାର ରିଲିଜ୍ ତାରିଖକୁ ଉତ୍ସାହର ସହ ଅପେକ୍ଷା କରିଛନ୍ତି। ଶେଷରେ, ରଣବୀର କପୁର-ୟଶ-ସାଇ ପଲ୍ଲବିଙ୍କ ଅଭିନୀତ ‘ରାମାୟଣ’ର ରିଲିଜ୍ ତାରିଖ ଘୋଷଣା କରାଯାଇଛି l ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି ଫିଲ୍ମର ନିର୍ମାତା ନମିତ ମଲହୋତ୍ରା ଚଳଚ୍ଚିତ୍ରର ରିଲିଜ ତାରିଖ ଘୋଷଣା କରିଛନ୍ତି l ତେବେ ଦୁଇଟି ଭାଗରେ ଚଳଚ୍ଚିତ୍ର ରିଲିଜ ହେବ ବୋଲି ସୂଚନା ଦେଇଛନ୍ତି ନମିତ l ଯାହା ଦେଖି ପ୍ରଶଂସକଙ୍କ ମଧ୍ୟରେ ଉତ୍ସାହ ଆହୁରି ବଢି ଯାଇଛି l
ସୋସିଆଲ ମିଡିଆରେ ଏକ ପୋଷ୍ଟର ସେୟାର କରି ନମିତ ମଲହୋତ୍ରା ଲେଖିଛନ୍ତି, “ଏକ ଦଶନ୍ଧିରୁ ଅଧିକ ସମଧରି ମୁଁ ଏହି ମହାକାବ୍ୟକୁ ବଡ ପରଦାରେ ଆଣିବାକୁ ଚେଷ୍ଟା କରୁଥିଲି l ଦୀର୍ଘ 5000 ବର୍ଷରୁ ଅଧିକ ସମୟ ଧରି କୋଟି କୋଟି ଲୋକଙ୍କ ହୃଦୟରେ ରହିଛି ଏହି ମହାକାବ୍ୟ l ମୋର ଇଛା ଏବେ ପୁରା ହେବାକୁ ଯାଉଛି ଯେଉଁଥି ପାଇଁ ମୁଁ ବହୁତ ଖୁସି l ମୋ ସହ ଆମର ପୁରା ଟିମ ଗୋଟିଏ ଉଦ୍ଦେଶ୍ୟ ନେଇ କଠିନ ପରିଶ୍ରମ କରୁଛନ୍ତି l ଖୁବଶୀଘ୍ର ଏହି ମହାକାବ୍ୟ ବଡ ପରଦାରେ ଆସିବ l ଆମର ଉଦ୍ଦେଶ୍ୟ ହେଉଛି “ରାମାୟଣ” ର ସବୁଠାରୁ ସତ୍ୟ, ପବିତ୍ର ଏବଂ ଅଦ୍ଭୁତ ରୂପକୁ ବିଶ୍ୱବାସୀଙ୍କ ନିକଟରେ ପହଞ୍ଚାଇବା l ଏହି ମହାକାବ୍ୟ ଆମର ଇତିହାସ, ଆମର ସତ୍ୟତା ଏବଂ ଆମ ସଂସ୍କୃତିକୁ ପ୍ରତିଫଳିତ କରିଥାଏ l ତେବେ 2026 ଦୀପାବଳିରେ ରାମାୟଣର ପ୍ରଥମ ଭାଗ ରିଲିଜ ହେବ l ସେହିପରି 2027 ଦୀପାବଳିରେ ଏହାର ଦ୍ଵିତୀୟ ଭାଗ ରିଲିଜ ହେବ ବୋଲି କହିଛନ୍ତି ଫିଲ୍ମ ନିର୍ମାତା l
ତେବେ ସେୟାର ହୋଇଥିବା ପୋଷ୍ଟରେ ଫିଲ୍ମର କଳାକାରଙ୍କୁ ନେଇ କୌଣସି ସୂଚନା ମିଳିନାହିଁ l ପୋଷ୍ଟରରେ କେବଳ ରିଲିଜ୍ ବର୍ଷ ଏବଂ ଫିଲ୍ମର ନିର୍ଦ୍ଦେଶକ – ନୀତେଶ ତିୱାରୀଙ୍କ ନାମ ଉଲ୍ଲେଖ କରାଯାଇଛି। ତେବେ ଏହାପୂର୍ବରୁ, ରାମାୟଣର ସେଟରୁ ଅନେକ ଚିତ୍ର ସୋସିଆଲ ମିଡିଆରେ ଦେଖିବାକୁ ମିଳିଥିଲା l ଯେଉଁଥିରେ ରଣବୀର କପୁର ଏବଂ ସାଇ ପଲ୍ଲବିଙ୍କୁ ରାମ ଏବଂ ସୀତା ଚରିତ୍ରରେ ଦେଖିବାକୁ ମିଳେ। ସେପଟେ କେଜିଏଫ ଷ୍ଟାର ୟସ ରାମାୟଣରେ ରାବଣର ଚରିତ୍ରରେ ଅଭିନୟ କରୁଥିବା କଥା ନିଜେ କହିଥିଲେ l ସେହିପରି ଅନ୍ୟ ଏକ ଭାଇରଲ ଫୋଟୋରେ ଅରୁଣ ଗୋଭିଲ ଏବଂ ଲାରା ଦତ୍ତା ରାଜକୀୟ ପୋଷାକ ପିନ୍ଧିଥିବାର ନଜର ଆସିଥିଲେ। ଯେଉଁଥିରୁ ସେମାନେ ରାଜା ଦଶରଥ ଏବଂ ରାଣୀ କୈକେଇ ଭୂମିକାରେ ଅଭିନୟ କରୁଥିବା ଜଣାପଡିଥିଲା l