କଟକ: ଭାରତୀୟ କ୍ରିକେଟ୍ ଦଳର ପୂର୍ବତନ ପ୍ରଶିକ୍ଷକ ରବି ଶାସ୍ତ୍ରୀ ଓଡ଼ିଶାରେ ଏକ କ୍ରିକେଟ୍ କୋଚିଂ ସେଣ୍ଟର ପ୍ରତିଷ୍ଠା କରିବାକୁ ଯାଉଛନ୍ତି। ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ମହତ୍ତ୍ୱାକାଂକ୍ଷୀ କୋଚିଂ ସେଣ୍ଟର ଦେଶର ପୂର୍ବାଞ୍ଚଳର ସର୍ବବୃହତ ଘରୋଇ କ୍ରିକେଟ୍ କୋଚିଂ ସୁବିଧା ଦେବ।
ପ୍ରସ୍ତାବିତ କ୍ରିକେଟ କୋଚିଂ ସେଣ୍ଟର କଟକ ଜିଲ୍ଲା ଆଠଗଡ଼ ଅଞ୍ଚଳର ଏମଜିଏମ ସ୍କୁଲ୍ ଅଫ୍ ସ୍ପୋର୍ଟସରେ ପ୍ରତିଷ୍ଠା ହେବ। ନିଜେ ରବି ଶାସ୍ତ୍ରୀ ଏହି ଚୁକ୍ତିରେ ସ୍ୱାକ୍ଷର କରିବେ। ମିଳିଥିବା ସୂଚନା ଅନୁଯାୟୀ ଚଳିତ ବର୍ଷ ଏପ୍ରିଲ ପହିଲାରୁ ଏହି କୋଚିଂ କେନ୍ଦ୍ର କାର୍ଯ୍ୟକ୍ଷମ ହେବ ବୋଲି ଏମଜିଏମ୍ ସ୍କୁଲ ଅଫ୍ ସ୍ପୋର୍ଟସର ନିର୍ଦେଶକ ପଙ୍କଜ ଲୋଚନ ମହାନ୍ତି ସୂଚନା ଦେଇଛନ୍ତି।
ସୂଚନାଯୋଗ୍ୟ, ଏମଜିଏମ୍ ସ୍କୁଲ୍ ଅଫ୍ ସ୍ପୋର୍ଟସରେ ଏକ ଅତ୍ୟାଧୁନିକ ଷ୍ଟାଡିୟମ୍ ରହିଛି। ଯାହାକୁ ପୂର୍ବତନ କ୍ରିକେଟର ସୁରେଶ ରାଇନା ଗତ ବର୍ଷ ଫେବ୍ରୁଆରିରେ ଉଦଘାଟନ କରିଥିଲେ। ଏହାର ବ୍ୟାପକ ସୁବିଧା ସହିତ ଆଶାୟୀ କ୍ରିକେଟରମାନଙ୍କୁ ସୁଲଭ ମୂଲ୍ୟରେ ଉନ୍ନତମାନର ପ୍ରଶିକ୍ଷଣ ପ୍ରଦାନ କରିବାକୁ ଏହି ବିଦ୍ୟାଳୟ ଲକ୍ଷ୍ୟ ରଖିଛି।
ରବି ଶାସ୍ତ୍ରୀଙ୍କ ଏହି ରଣନୈତିକ ପଦକ୍ଷେପ କ୍ରିକେଟ୍ ପ୍ରତିଭାଙ୍କୁ ପ୍ରୋତ୍ସାହିତ କରିବା ଏବଂ ଏହି ଅଞ୍ଚଳରେ କ୍ରୀଡ଼ାକୁ ପ୍ରୋତ୍ସାହିତ କରିବା ପାଇଁ ତାଙ୍କର ପ୍ରତିବଦ୍ଧତାକୁ ଦର୍ଶାଉଛି। ଏହି କେନ୍ଦ୍ରର ଶୁଭାରମ୍ଭକୁ କ୍ରିକେଟ ପ୍ରେମୀ ଉତ୍ସାହର ସହ ଅପେକ୍ଷା କରିଥିବା ବେଳେ ଏହା ଓଡ଼ିଶାର ଉଦୀୟମାନ କ୍ରିକେଟରଙ୍କ ପାଇଁ ଗେମ୍ ଚେଞ୍ଜର ହେବ ବୋଲି ଆଶା କରାଯାଉଛି।