ନୂଆଦିଲ୍ଲୀ: ମସ୍କୋରେ ରୁଷିଆର ଶୀର୍ଷ ସାମରିକ ଗୁଇନ୍ଦା ଅଧିକାରୀ ଲେଫ୍ଟନାଣ୍ଟ ଜେନେରାଲ ଭ୍ଲାଦିମିର ଆଲେକ୍ସେଭଙ୍କୁ ଗୁଳି କରିବା ଘଟଣାରେ ସନ୍ଦିଗ୍ଧ ବ୍ୟକ୍ତିକୁ ଗିରଫ କରାଯାଇଛି। ରୁଷିଆର ଫେଡେରାଲ ସିକ୍ୟୁରିଟି ସର୍ଭିସ (FSB) କହିଛି ଯେ ସନ୍ଦିଗ୍ଧ ବ୍ୟକ୍ତିଙ୍କୁ ହେପାଜତରେ ରଖାଯାଇଛି। ରୁଷିଆ ତଦନ୍ତକାରୀ ସଂସ୍ଥାଗୁଡ଼ିକ ଅନୁଯାୟୀ, ଶୁକ୍ରବାର ମସ୍କୋର ଉତ୍ତର-ପଶ୍ଚିମ ଭାଗରେ ଥିବା ଏକ ଆପାର୍ଟମେଣ୍ଟ କୋଠା ବାହାରେ ରୁଷିଆ ସାମରିକ ଗୁଇନ୍ଦା ସଂସ୍ଥା GRUର ଉପମୁଖ୍ୟ ଲେଫ୍ଟନାଣ୍ଟ ଜେନେରାଲ ଭ୍ଲାଦିମିର ଆଲେକ୍ସେଭଙ୍କ ଉପରକୁ ଗୁଳି ଚାଳନା କରାଯାଇଥିଲା। ଆକ୍ରମଣରେ ୬୪ ବର୍ଷୀୟ ଆଲେକ୍ସେଭ ଗୁରୁତର ଆହତ ହୋଇଥିଲେ ଏବଂ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା।
FSB କହିଛି ଯେ ଆକ୍ରମଣର ମୁଖ୍ୟ ସନ୍ଦିଗ୍ଧ ବ୍ୟକ୍ତି ହେଉଛନ୍ତି ଲୁବୋମିର କୋର୍ବା, ଜଣେ ରୁଷ ନାଗରିକ। ତାଙ୍କୁ ଦୁବାଇରେ ଗିରଫ କରାଯାଇଥିଲା ଏବଂ ପରେ ରୁଷକୁ ପଠାଇ ଦିଆଯାଇଥିଲା। ଏଫଏସବି କହିଛି ଯେ ଆକ୍ରମଣରେ ଅନ୍ୟ ଦୁଇଜଣ ବ୍ୟକ୍ତି ସାମିଲ ଥିଲେ। ସେମାନଙ୍କ ମଧ୍ୟରୁ ଜଣଙ୍କୁ ମସ୍କୋରେ ଗିରଫ କରାଯାଇଛି, ଯେତେବେଳେ ଅନ୍ୟ ଅଭିଯୁକ୍ତ ୟୁକ୍ରେନକୁ ପଳାଇ ଯାଇଛି ।
ରୁଷର ବୈଦେଶିକ ମନ୍ତ୍ରୀ ସେରଗେଇ ଲାଭରୋଭ ଅଭିଯୋଗ କରିଛନ୍ତି ଯେ ହତ୍ୟା ଉଦ୍ୟମ ପଛରେ ୟୁକ୍ରେନର ହାତ ଅଛି। ସେ ଏହା ମଧ୍ୟ କହିଛନ୍ତି ଯେ ଦୁଇ ଦେଶ ମଧ୍ୟରେ ଚାଲିଥିବା ଶାନ୍ତି ଆଲୋଚନାକୁ ବାଧା ଦେବା ପାଇଁ ଏହା କରାଯାଇଥିଲା। ଏପଟେ ୟୁକ୍ରେନ୍ କହିଛି ଯେ ଗୁଳିକାଣ୍ଡ ସହିତ କୌଣସି ସମ୍ପର୍କ ନାହିଁ।
ଏହି ଘଟଣା ଏପରି ସମୟରେ ଘଟିଛି ଯେତେବେଳେ ମାତ୍ର ଗୋଟିଏ ଦିନ ପୂର୍ବରୁ ସଂଯୁକ୍ତ ଆରବ ଏମିରେଟ୍ସର ଆବୁଧାବି ସହରରେ ରୁଷ, ୟୁକ୍ରେନ ଏବଂ ଆମେରିକାର ପ୍ରତିନିଧିମାନଙ୍କ ମଧ୍ୟରେ ଦୁଇ ଦିନିଆ ଶାନ୍ତି ଆଲୋଚନା ଅନୁଷ୍ଠିତ ହୋଇଥିଲା।
Comments are closed.