କାମାକ୍ଷନଗର: ଢେଙ୍କାନାଳ ଜିଲ୍ଲା କାମାକ୍ଷାନଗରରେ କୋଟି କୋଟି ଟଙ୍କା ବ୍ୟୟରେ ନିର୍ମିତ ଆରଡ଼ବ୍ଲ୍ୟୁଏସଏସ କ୍ୱାଟର୍ସ ଓ ସେକ୍ସନ ଅଫିସ ଅସାମାଜିକ ଯୁବକଙ୍କ ଆଡ୍ଡାସ୍ଥଳୀ ପାଲଟିଛି । ଏବେ ଏହା ଅନୈତିକ କାର୍ଯ୍ୟ ଓ ଅପରାଧିକ କାର୍ଯ୍ୟ ପାଇଁ ବେଶ ଉପଯୋଗୀ ହୋଇଛି । ଏଠାରେ ଯେଉଁଆଡ଼େ ଦେଖିଲେ ମଦ ବୋତଲ, ସିଗାରେଟ, କଣ୍ଡୋମ ପଡ଼ିଥିବା ଦେଖିବାକୁ ମିଳିଛି । ୨ ବର୍ଷ ତଳେ ଏହି କ୍ୱାଟର୍ସଗୁଡିକ ନିର୍ମାଣ ହୋଇଥିଲେ ମଧ୍ୟ ଆରଡ଼ବ୍ଲ୍ୟୁଏସଏସର ସହକାରୀ ନିର୍ବାହୀ ଯନ୍ତ୍ରୀଙ୍କ ଅବହେଳା ଓ ଦାୟିତ୍ୱହୀନତା ଯୋଗୁଁ ତାହା ଏବେ ଅସାମାଜିକ ଯୁବକଙ୍କ ଆଡ୍ଡାସ୍ଥଳୀ ପାଲଟିଛି । ଏମିତି କି କବାଟ, ଝରକା ,ଗ୍ରୀଲ୍ ଏବଂ ଗୃହରେ ଲାଗିଥିବା ସମସ୍ତ ଉପକରଣ ତାଡ଼ି ନେଇଛନ୍ତି ଦୁର୍ବୃତ୍ତ । ହେଲେ ଏଥିପ୍ରତି ସରକାରୀ ବିଭାଗୀୟ ବାବୁଙ୍କର ଦୃଷ୍ଟି ପଡ଼ୁନାହିଁ । ଅଞ୍ଚଳରେ ହେଉଥିବା କ୍ରାଇମର ହବ୍ ପାଲଟିଛି ଏହି ନୂଆଁ କ୍ୱାଟର୍ସ । ଗୋଟିଏ କ୍ୱାଟର୍ସ ସମ୍ପୂର୍ଣ୍ଣ ହୋଇଥିବା ବେଳେ ଅନ୍ୟ ସେକ୍ସନ ଗୃହଟି ଅସମ୍ପୂର୍ଣ୍ଣ ଅବସ୍ଥାରେ ଦୀର୍ଘ ଦିନ ହେବ ପଡି ରହିଛି । ଏପରିକି ଏହି କ୍ୱାଟର୍ସ ସାମ୍ନା ରାସ୍ତାରେ ଯିବାକୁ ଲୋକେ ଭୟ କରୁଥିବା ସ୍ଥାନୀୟ ସରପଞ୍ଚ ସତ୍ୟଜିତ୍ ରାଉତ ପ୍ରକାଶ କରିଛନ୍ତି । ଏ ନେଇ କାମାକ୍ଷାନଗର ଉପଜିଲ୍ଲାପାଳ ଜ୍ୟୋତିଶଙ୍କର ସାହୁଙ୍କୁ ପଚାରିବାରୁ, ଖୁବଶୀଘ୍ର ଏଥିପ୍ରତି ପଦକ୍ଷେପ ନିଆଯିବ ବୋଲି ପ୍ରକାଶ କରିଛନ୍ତି ।
Comments are closed.