କବିତା : ହୃଦୟ ବି କିଛି ଏମିତି

ମଞ୍ଜୁଲତା ସାହୁ

ଯାହାକୁ ଏ ମନ ଯେତିକି ଚାହୁଁଛି
ସେ ସେତେ ଦୂରେଇ ଯାଏ,
ଦିଏ ସେ ଯାହାକୁ ଅସରନ୍ତି ସୁଖ
ସେ ସେତେ କନ୍ଦାଉ ଥାଏ ।

ମନେ ନୁହଁ ଯିଏ ମନରେ ରହଇ
ସେ ସହଜେ ଭୁଲି ଯାଏ,
ହୃଦୟ ଭିତରେ ରହିଥାଏ ଯିଏ
ସେ ତ ହୃଦ ଭାଙ୍ଗିଦିଏ ।

ଖୋଜିବାର ଆଶା ରଖି ଯାହା ଠାରେ
ନିଜକୁ ହଜାଉ ଥାଏ,
ଖୋଜିବା ବାହାନା କରି ସେ ଭିଡ଼ରେ
ଜାଣି ନିଜେ ହଜିଯାଏ ।

ଆପଣା ଡୋରୀରେ”ଆମେ” ର ବନ୍ଧନେ
ଯାହାକୁ ସେ ରଖିଥାଏ,
ସେ ଡୋରୀ ଛିଣ୍ଡାଇ ଚିରକାଳ ସେହୁ
‘ମୁଁ’ ହୋଇ ରହିଯାଏ ।

ବୁଝି ହୁଏ ନାହିଁ ହୃଦୟ କୁ ଥରେ
ସେ ଯେ କ’ଣ ଚାହୁଁଥାଏ,
ଏତେ ଭାବ ପୁଣି ଯୋଡେ ସେ ଯା ସାଥେ
ସେ ସମ୍ପର୍କ ଭାଙ୍ଗିଦିଏ ।

କାମାକ୍ଷାନଗର