ଲକ୍ଷ୍ନୌ: ସାଲାଡ ଦେବାରୁ ବିଳମ୍ବ ହେତୁ ରାଗିଯାଇ ଜଣେ ବ୍ୟକ୍ତି ତାଙ୍କ ପତ୍ନୀଙ୍କୁ ହତ୍ୟା କରିଥିବା ଅଭିଯୋଗ ହୋଇଛି।ଏହା ପରେ ଅଭିଯୁକ୍ତ ଜଣକ ଫେରାର୍ ହୋଇଯାଇଥିବା ସୂଚନା ମିଳିଛି।
ସୋମବାର ଶାମଲିର ଗୋଗୱାନ ଜାଲଲପୁରରେ ଏହି ଘଟଣା ଘଟିଛି। ରିପୋର୍ଟ ଅନୁଯାୟୀ, ଅଭିଯୁକ୍ତ ମୁରଲୀ (୪୫) ଙ୍କ ପତ୍ନୀ ସୁଦେଶଙ୍କୁ ହତ୍ୟା କରିଥିବା ଅଭିଯୋଗରେ ପୋଲିସ ଏକ ହତ୍ୟା ମାମଲା ରୁଜୁ କରିଛି।
ପୋଲିସ କହିଛି ଯେ ମୁରଲୀ ନିୟମିତ ରାତ୍ରୀ ଭୋଜନ ସହିତ ସାଲାଡ ଖାଇବାକୁ ମାଗିଥିଲା। ପତ୍ନୀ ଅନ୍ୟ କାମରେ ବ୍ୟସ୍ତ ଥିବାରୁ ତାଙ୍କୁ ସାଲାଡ ଦେବାରେ ବିଳମ୍ବ ହୋଇଥିଲା, ଯାହା ଫଳରେ ଉଭୟଙ୍କ ମଧ୍ୟରେ ଭୀଷଣ ପାଟିତୁଣ୍ଡ ହୋଇଥିଲା।
ଯୁକ୍ତିତର୍କ ବଢିବା ସହିତ ମୁରଲୀ ତାଙ୍କ ପତ୍ନୀଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରି ତାଙ୍କୁ ହତ୍ୟା କରିଥିଲେ। ଏହାସହିତ ତାଙ୍କର ୨୦ ବର୍ଷର ପୁଅକୁ ମଧ୍ୟ ଆହତ କରିଥିଲେ।
ଏହା ପରେ ଅଭିଯୁକ୍ତ ଘଟଣାସ୍ଥଳରୁ ପଳାଇ ଯାଇଥିଲେ। ଇତି ମଧ୍ୟରେ ପଡୋଶୀମାନେ ଚିତ୍କାର ଶୁଣି ଘରକୁ ଯାଇ ରକ୍ତ ଜୁଡୁବୁଡୁ ଅବସ୍ଥାରେ ମହିଳାଙ୍କୁ ଦେଖିବାକୁ ପାଇଥିଲେ।
ସେମାନେ ସୁଦେଶ ଏବଂ ତାଙ୍କ ପୁଅଙ୍କୁ ଚିକିତ୍ସା ପାଇଁ ଡାକ୍ତରଖାନା ନେଇଥିଲେ, ସେଠାରେ ଡାକ୍ତର ମହିଳା ଜଣକ ମୃତ ଘୋଷଣା କରିଥିଲେ। ପୁଅର ଅବସ୍ଥା ଗୁରୁତର ରହିଥିବା ଜଣାପଡ଼ିଛି। ପୋଲିସ ମୁରଲୀଙ୍କୁ ଖୋଜିବା ଆରମ୍ଭ କରିଛି।