ଶୋଇବା ଘରୁ ୭ ଫୁଟ୍‌ର ଅଜଗର ଉଦ୍ଧାର

କୋରାପୁଟ: କୋରାପୁଟ ଜିଲ୍ଲା ବୈପାରିଗୁଡ଼ା ବ୍ଲକ ଅନ୍ତର୍ଗତ ବୋଦାପୁଟ ପଞ୍ଚାୟତ ମାଦି ଗ୍ରାମର ସମାରି ସୀସା ନାମକ ଜଣେ ବୃଦ୍ଧାଙ୍କ ଶୋଇବା ଘରୁ ୭ ଫୁଟ୍‌ର ଅଜଗର ସାପ ଉଦ୍ଧାର କରାଯାଇଛି । ରବିବାର ରାତିରେ ସମାରି ଏକୁଟିଆ ନିଜ ଶୋଇବା ଘରେ ଶୋଇଥିଲେ । ବିଳମ୍ବିତ ରାତିରେ ତାଙ୍କ ମୁଣ୍ଡ ପାଖରେ କିଛି ଶବ୍ଦ ହେଉଥିବା ଶୁଣିବାକୁ ପାଇଥିଲେ । ସଙ୍ଗେ ସଙ୍ଗେ ଉଠିପଡ଼ି ଲାଇଟ୍ ଲଗାଇଥିଲେ । ସେ ଶୋଇଥିବା ଶେଯ ପାଖରେ ଏକ ଅଜଗର ସାପ ଦେଖି ଡ଼ରି ଯାଇଥିଲେ । ପରେ ଘରେ ସାପ ପଶିଥିବା ନେଇ ତାଙ୍କ ପୁତୁରା ଚନ୍ଦ୍ରଙ୍କୁ ଜଣାଇଥିଲେ । ଚନ୍ଦ୍ର ତୁରନ୍ତ ଆସି ଶୋଇବା ଘରୁ ଅଜଗର ସାପକୁ ଉଦ୍ଧାର କରିଥିଲେ । ଆଜି ସକାଳେ ଉଦ୍ଧାର କରିଥିବା ସାପକୁ ବୈପାରିଗୁଡା ବନ କର୍ମଚାରୀକୁ ହସ୍ତାନ୍ତର କରିଥିଲେ । ବୈପାରିଗୁଡା ବନାଞ୍ଚଳ ଅଧିକାରୀ ସନ୍ଦୀପ ପାଣିଗ୍ରାହୀଙ୍କ ନିର୍ଦ୍ଦେଶକ୍ରମେ ଅଜଗର ସାପଟିକୁ କୋଟା ଛକ ନିକଟସ୍ଥ ମଧୁବନରେ ଛଡ଼ାଯାଇଛି ।