ମୁମ୍ବାଇ: ମୋଦିଙ୍କୁ ଟାର୍ଗେଟ କଲେ ଶିବସେନା ରାଜ୍ୟସଭା ସାଂସଦ ସଞ୍ଜୟ ରାଉତ। କହିଲେ ମୋଦି ଗୋଟିଏ ନୁହେଁ ଦୁଇଟି ଆସନରୁ ଛିଡ଼ା ହେବେ, ଜିତିବେ ମଧ୍ଯ। କିନ୍ତୁ ଦଳ ଜିତିବ ନାହିଁ। ବିଜେପିକୁ ଟାର୍ଗେଟ କରି ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇଟି ଆସନରୁ ପ୍ରତିଦ୍ୱନ୍ଦ୍ୱିତା କରିବେ ଏବଂ ଜିତିବେ, କିନ୍ତୁ ତାଙ୍କ ଭାରତୀୟ ଜନତା ପାର୍ଟି ଏବଂ ଏନଡିଏ ମିଳିତ ମଞ୍ଚ ୨୦୦ ଟି ସିଟ୍ ମଧ୍ୟ ପାର ହୋଇ ପାରିବ ନାହିଁ। ଚଳିତ ବର୍ଷ ପାଇଁ ବିଜେପି ୪୦୦ ଆସନର ରଣନୀତି ପ୍ରସ୍ତୁତ କରୁଛି।
ମୁମ୍ବାଇରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସଞ୍ଜୟ ରାଉତ କହିଛନ୍ତି ଯେ ବିରୋଧୀଦଳର ନେତାମାନଙ୍କୁ ଭୟଭୀତ କରିବା ପାଇଁ ଏଜେନ୍ସିର ଆତଙ୍କବାଦ ବ୍ୟବହାର କରାଯାଉଛି।
ପ୍ରଧାନମନ୍ତ୍ରୀ ମୋଦୀଙ୍କ ବିଷୟରେ ସଞ୍ଜୟ ରାଉତ ଆହୁରି ମଧ୍ଯ ଟାର୍ଗେଟ କରି କହିଛନ୍ତି ଯେ, ହେମନ୍ତ ସୋରେନ, ଲାଲୁ ଯାଦବ, ଆମ ଦଳର ରବିନ୍ଦ୍ର ବାୟକର, ପୂର୍ବତନ ମେୟର କିଶୋରୀ ପେଡନେକର କିମ୍ବା ମୋ ଭାଇ ସନ୍ଦୀପ ରାଉତ ହେଉ, ସମସ୍ତେ ଭୟଭୀତ କରାଯାଉଛି। ଆମେ କୌଣସି ଏଜେନ୍ସିକୁ ଭୟ କରୁନାହୁଁ କି କରିବୁ ନାହିଁ।
ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବିରୋଧରେ ଇଡିଙ୍କ କାର୍ଯ୍ୟାନୁଷ୍ଠାନ ଉପରେ ସଞ୍ଜୟ ରାଉତ କହିଛନ୍ତି, “ମୁଁ ହେମନ୍ତ ସୋରେନଙ୍କୁ ବହୁତ ଭଲଭାବେ ଜାଣିଛି। ସେ ପଳାୟନ କରିବାକୁ କେହି ନୁହଁନ୍ତି। ସେ ଲଢିବେ। ୨୦୨୪ ରେ ସେମାନଙ୍କର (ବିଜେପି) ପରାଜୟ ପରେ ଆମର ଯେତେବେଳେ ସମୟ ଆସିବ, ସେତେବେଳେ ଆମେ ବି ଦେଖିବୁ। ”
କିଛି ଦିନ ପୂର୍ବରୁ କଂଗ୍ରେସ ଜାତୀୟ ସଭାପତି ମଲ୍ଲିକାର୍ଜୁନ ଖାର୍ଗେ କହିଥିଲେ ଯେ ଆସନ୍ତା ଲୋକସଭା ନିର୍ବାଚନ ପରେ ପ୍ରଧାନମନ୍ତ୍ରୀ ମୋଦୀ ଏକଛତ୍ରବାଦୀ ଶାସନ ଘୋଷଣା କରିବେ। ଖଡଗେଙ୍କ ଏହି ମନ୍ତବ୍ୟ ଉପରେ ସଞ୍ଜୟ ରାଉତ ମଧ୍ୟ ନିଜର ସମର୍ଥନ ଜାହିର କରିଛନ୍ତି।