ଭୁବନେଶ୍ୱର: ବିଧାନସଭାର ବାଚସ୍ପତି ପଦ ପାଇଁ ବିଜେପିର ସୁରମା ପାଢ଼ୀ ବୁଧବାର ନାମାଙ୍କନ ପତ୍ର ଦାଖଲ କରିଛନ୍ତି। ଆଜି ଅନ୍ୟ କୌଣସି ରାଜନୈତିକ ଦଳରୁ ନାମାଙ୍କନ ପତ୍ର ଦାଖଲ ହୋଇନଥିବାରୁ ସୁରମା ପାଢ଼ୀ ସପ୍ତଦଶ ବିଧାନସଭାର ବାଚସ୍ପତି ହେବା ପ୍ରାୟ ନିଶ୍ଚିତ।
ତେବେ ଉପ ବାଚସ୍ପତି କିଏ ହେବେ ଏବେ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା। ସେହିପରି ସରକାରୀ ମୁଖ୍ୟ ସଚେତକ ଓ ଉପମୁଖ୍ୟ ସଚେତକ କିଏ ହେବେ ତାକୁ ନେଇ ଏବେ ବି ସସପେନ୍ସ ଜାରି ରହିଛି। ଉପବାଚସ୍ପତି ଓ ଉପମୁଖ୍ୟ ସଚେତକ ପଦ ପାଇଁ କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ ଓ ରେମୁଣା ବିଧାୟକ ଗୋବିନ୍ଦ ଚନ୍ଦ୍ର ଦାସଙ୍କ ନାମ ଚର୍ଚ୍ଚାରେ ରହିଛି। ବଡ଼ସାହି ବିଧାୟକ ସନାତନ ବିଜୁଳି ସରକାରୀ ମୁଖ୍ୟ ସଚେତକ ପଦ ପାଇଁ ସବୁଠୁ ଆଗରେ ଅଛନ୍ତି। ଯଦିଓ ଓଡ଼ିଶା ମୁଖ୍ୟମନ୍ତ୍ରୀ ମୋହନ ମାଝୀଙ୍କ ମନ୍ତ୍ରିମଣ୍ଡଳରେ ୧୬ ଜଣ ମନ୍ତ୍ରୀ ଅଛନ୍ତି, ତଥାପି ଆଉ ୬ ଜଣ ମନ୍ତ୍ରୀ ପଦ ଖାଲି ପଡ଼ିଛି।
ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, ଗୃହ ପରିଚାଳନା ପାଇଁ ନିୟମ ଓ ପ୍ରକ୍ରିୟା ଅନୁଯାୟୀ ମଧ୍ୟାହ୍ନ ପୂର୍ବରୁ ନାମାଙ୍କନ ପ୍ରକ୍ରିୟା ହେବା କଥା ଏବଂ ବିଜେପିର ସୁରମା ପାଢ଼ୀ ନାମାଙ୍କନ ପତ୍ର ଦାଖଲ କରିଛନ୍ତି। ନିର୍ଦ୍ଦିଷ୍ଟ ସମୟ ମଧ୍ୟରେ କୌଣସି ରାଜନୈତିକ ଦଳରୁ ଅନ୍ୟ କୌଣସି ନାମାଙ୍କନ ମିଳିନାହିଁ।
ବିଜେଡି ବିଧାୟକ ଗଣେଶ୍ୱର ବେହେରା କହିଛନ୍ତି, ସୁରମା ପାଢ଼ୀ ଏବେ ବିନା ପ୍ରତିଦ୍ୱନ୍ଦ୍ୱିତାରେ ବାଚସ୍ପତି ନିର୍ବାଚିତ ହୋଇଛନ୍ତି। ସମୟ ବିତିଯାଇଥିଲେ ମଧ୍ୟ ନାମାଙ୍କନ ନେଇ ବିଜେଡି କୌଣସି ନିଷ୍ପତ୍ତି ନେଇନାହିଁ। ଆଶା କରୁଛି ସେ ନିରପେକ୍ଷ ଢଙ୍ଗରେ ଗୃହ ପରିଚାଳନା କରିବେ।
ଓଡ଼ିଶା ମୁଖ୍ୟମନ୍ତ୍ରୀ ମୋହନ ମାଝୀ ବାଚସ୍ପତି ପଦ ପାଇଁ ପାଢ଼ୀଙ୍କ ନାମ ପ୍ରସ୍ତାବ ଦେଇଥିଲେ। ଓଡ଼ିଶାର ବିଜେଡି-ବିଜେପି ମେଣ୍ଟ ସରକାରରେ ମନ୍ତ୍ରୀ ଭାବେ ସୁରମା ପାଢ଼ୀଙ୍କ ବ୍ୟାପକ ଅଭିଜ୍ଞତା ରହିଛି। ପୂର୍ବରୁ ବିଜେପି ଜଣେ ଆଦିବାସୀ ନେତା ମୋହନ ମାଝୀଙ୍କୁ ମୁଖ୍ୟମନ୍ତ୍ରୀ ଭାବେ ମନୋନୀତ କରିଥିବା ବେଳେ ଏବେ ଦଳ ମହିଳା ନେତ୍ରୀଙ୍କୁ ଗୁରୁତ୍ୱପୂର୍ଣ୍ଣ ପଦବୀ ଦେଇ ପ୍ରାଥମିକତା ଦେଇଛି। ଦଳ ପ୍ରଭାତୀ ପରିଡ଼ାଙ୍କୁ ଉପମୁଖ୍ୟମନ୍ତ୍ରୀ ଭାବେ ନିଯୁକ୍ତ କରିଥିବା ବେଳେ ଏବେ ସୁରମା ପାଢ଼ୀଙ୍କୁ ବାଚସ୍ପତି ପଦ ପାଇଁ ପ୍ରାର୍ଥୀ କରାଯାଇଛି।
ଅତୀତ ତୁଳନାରେ ବିରୋଧୀ ଦଳ ସଦସ୍ୟଙ୍କ ସଂଖ୍ୟା ଅଧିକ ଥିବାରୁ ଓଡ଼ିଶା ବିଧାନସଭାରେ କାର୍ଯ୍ୟ ପରିଚାଳନା କରିବା ସୁରମା ପାଢ଼ୀଙ୍କ ପାଇଁ ଅଗ୍ନିପରୀକ୍ଷା ହେବ। ଗୁରୁତ୍ୱପୂର୍ଣ୍ଣ ପଦବୀପାଇଁ ମହିଳା ପ୍ରାର୍ଥୀଙ୍କୁ ପଦୋନ୍ନତି ଦେବା ପାଇଁ ଏକ ନୂଆ ବାର୍ତ୍ତା ପଠାଯାଉଛି।
ଉପମୁଖ୍ୟମନ୍ତ୍ରୀ ପରେ ବିଜେପି ସୁରମା ପାଢ଼ୀଙ୍କୁ ବାଚସ୍ପତି ପଦ ପାଇଁ ମନୋନୀତ କରିଥିଲା। ବିଜେଡି ଆକାରରେ ଦୃଢ଼ ବିରୋଧୀ ଦଳ ରହିଥିବା ବେଳେ କଂଗ୍ରେସର ଶକ୍ତି ମଧ୍ୟ ବୃଦ୍ଧି ପାଉଥିବାରୁ ବାଚସ୍ପତିଙ୍କ ଭୂମିକା ଗୁରୁତ୍ୱପୂର୍ଣ୍ଣ ହେବାକୁ ଯାଉଛି।
Comments are closed.