କଲମ୍ବୋରେ ପହଲଗାମ ଆତଙ୍କବାଦୀ ..! ଏହି ଆଲର୍ଟ ସୂଚନା ପରେ ବିମାନରେ ତଲାସୀ

କଲମ୍ବୋ: ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ସୁରକ୍ଷା ଏଜେନ୍ସିଗୁଡ଼ିକ ଅଧିକ ସଜାଗ ଅଛନ୍ତି ।  ସନ୍ଦିଗ୍ଧ ଆତଙ୍କବାଦୀଙ୍କୁ ଧରିବା ପାଇଁ ଯଥାସମ୍ଭବ ପ୍ରୟାସ କରୁଛନ୍ତି। ତେବେ ଭାରତରୁ ମିଳିଥିବା ସୂଚନା ପରେ ଆଜି କଲମ୍ବୋ ବିମାନବନ୍ଦରରେ ଏକ ବଡ଼ ଧରଣର ତଲାସୀ କରାଯାଇଥିଲା। ଭାରତରୁ ମିଳିଥିବା ଆଲର୍ଟ ସୂଚନା ପରେ ଏହି ତଦନ୍ତ କରାଯାଇଛି। ଚେନ୍ନାଇରୁ କଲମ୍ବୋ ବିମାନବନ୍ଦରରେ ପହଞ୍ଚିବାପରେ ବିମାନର ତଲାସୀ କରାଯାଇଥିଲା । ରିପୋର୍ଟ ଅନୁସାରେ, ଶ୍ରୀଲଙ୍କା ଏୟାରଲାଇନ୍ସର ବିମାନଟି  ଆଜି  ବନ୍ଦରାନାଇକେ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଥିଲା,  ସୁରକ୍ଷା ବାହିନୀ ବିମାନକୁ ଘେରି ରହିଥିଲେ। ଏହାପରେ ବିମାନ ଏବଂ ଏଥିରେ ଥିବା ଲୋକଙ୍କ ଯାଞ୍ଚ କରାଯାଇଥିଲା।

ଖବରମୁତାକ, ଶ୍ରୀଲଙ୍କାକୁ ଭାରତରୁ ଏକ ସତର୍କ ସୂଚନା ମିଳିଥିଲା ​​ଯେ, ପହଲଗାମ ଆତଙ୍କବାଦୀ ଆକ୍ରମଣ ସହିତ ଜଡିତ ସମ୍ଭାବ୍ୟ ସନ୍ଦିଗ୍ଧ ବ୍ୟକ୍ତିମାନେ ଏହି ବିମାନରେ ଥାଇପାରନ୍ତି।

ଜଣେ ପୋଲିସ ମିଡିଆ ମୁଖପାତ୍ରଙ୍କ ସୂଚନା ଅନୁସାରେ, ଭାରତରୁ ଏକ ଆଲର୍ଟ ସୂଚନା ମିଳିଥିଲା, ଯାହା ପରେ ଶ୍ରୀଲଙ୍କା ସୁରକ୍ଷା ବାହିନୀ ବିମାନ ପହଞ୍ଚିବା ପରେ ତାହାର ତଲାସୀ କରିଥିଲେ। ଶ୍ରୀଲଙ୍କା ଏୟାରଲାଇନ୍ସ କହିଛି ଯେ, ବିମାନ 4R-ALS ଦ୍ୱାରା ପରିଚାଳିତ UL 122 ବିମାନଟି ସକାଳ ୧୧:୫୯ ରେ କଲମ୍ବୋରେ ଅବତରଣ କରିଥିଲା। ଏହାପରେ ସ୍ଥାନୀୟ କର୍ତ୍ତୃପକ୍ଷଙ୍କ ସହ ସମନ୍ୱୟ ରଖି ଏକ ବ୍ୟାପକ ଯାଞ୍ଚ କରାଯାଇଥିଲା। କିନ୍ତୁ ସେମାନେ କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ପାଇନଥିଲେ । ସୁରକ୍ଷା ପ୍ରକ୍ରିୟା ଯୋଗୁଁ ସିଙ୍ଗାପୁରକୁ ପରବର୍ତ୍ତୀ ଉଡ଼ାଣ UL 308 ବିଳମ୍ବିତ ହୋଇଥିବା ଉଲ୍ଲେଖ କରିଛନ୍ତି।

ଶ୍ରୀଲଙ୍କା ଏୟାରଲାଇନ୍ସର ବିବୃତ୍ତିରେ କୁହାଯାଇଛି ଯେ,ବିମାନର ସମ୍ପୂର୍ଣ୍ଣ ଯାଞ୍ଚ ପରେ, ଏହାକୁ ପରବର୍ତ୍ତୀ ଗସ୍ତ ପାଇଁ ଅନୁମତି ଦିଆଯାଇଥିଲା। ଶ୍ରୀଲଙ୍କା ଏୟାରଲାଇନ୍ସ ସମସ୍ତ ଯାତ୍ରୀ ଏବଂ କ୍ରୁଙ୍କ ସୁରକ୍ଷାକୁ ପ୍ରାଥମିକତା ଦିଏ ଏବଂ ସର୍ବୋଚ୍ଚ ସୁରକ୍ଷା ମାନଦଣ୍ଡ ବଜାୟ ରଖିବାକୁ ପ୍ରତିବଦ୍ଧ ।

ସୂଚନାଥାଉକି,୨୨ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ପାକିସ୍ତାନୀ ଆତଙ୍କବାଦୀଙ୍କ ଦ୍ୱାରା ଜଣେ ନେପାଳୀ ପର୍ଯ୍ୟଟକଙ୍କ ସମେତ ୨୬ ଜଣ ପର୍ଯ୍ୟଟକଙ୍କୁ ହତ୍ୟା କରାଯାଇଥିଲା। ଆକ୍ରମଣର ତଦନ୍ତ ଦାୟିତ୍ୱ ଆତଙ୍କବାଦ ବିରୋଧୀ ଏଜେନ୍ସି ଜାତୀୟ ତଦନ୍ତ ସଂସ୍ଥା (NIA)କୁ ଦିଆଯାଇଛି।