ରାଜ୍ୟଗୋଷ୍ଠୀ କ୍ରୀଡା: ପାରା ପାୱାର ଲିଫ୍ଟିଂରେ ଇତିହାସ ରଚିଲେ ସୁଧୀର

ବର୍ମିଂହାମ: ଚଳିତ ରାଜ୍ୟଗୋଷ୍ଠୀ କ୍ରୀଡାରେ ଭାରତୀୟ ଆଥଲେଟଙ୍କ ପ୍ରଦର୍ଶନ ପ୍ରଶଂସନୀୟ ରହିଛି । ଶୁକ୍ରବାର ଭାରତର ସୁଧୀର ପାରା ପାୱାର ଲିଫ୍ଟିଂରେ ସ୍ୱର୍ଣ୍ଣପଦକ ଜିତିଛନ୍ତି । ସେ ପ୍ରଥମ ଉଦ୍ୟମରେ ୨୦୮ କେଜି ଓ ଦ୍ୱିତୀୟ ଉଦ୍ୟମରେ ୨୧୨ କେଜି ଭାର ଉଠାଇ ୧୩୪.୫ ପଂଏଟ ହାସଲ କରି ନୂତନ ରାଜ୍ୟଗୋଷ୍ଠୀ କ୍ରୀଡା ରେକର୍ଡ କରିଥିଲେ । ଇକେଚୁକୱ କ୍ରିଷ୍ଟିଆନ ଓବିଚୁକଓ୍‌ବ ୧୩୩.୬ ପଂଏଟ ସହ ରୌପ୍ୟ ଏବଂ ମିକି ୟୁଲେ ୧୩୦.୯ ପଂଏଟ ସହ ବ୍ରୋଞ୍ଜ ପଦକ ହାସଲ କରିଥିଲେ । ଚଳିତ ରାଜ୍ୟଗୋଷ୍ଠୀ କ୍ରୀଡାରେ ୨୭ ବର୍ଷୀୟ ସୁଧୀର ପାରା ସ୍ପୋର୍ଟ୍ସରେ ଭାରତ ପାଇଁ ପଦକ ଦ୍ୱାର ଖୋଲିଛନ୍ତି । ସୂଚନାଯୋଗ୍ୟ, ପୋଲିଓରେ ଆକ୍ରାନ୍ତ ହେବା ଯୋଗୁ ସୁଧୀର ୨ ଗୋଡ ଅକାମୀ ହୋଇ ଯାଇଛି । ବିଭିନ୍ନ ମହଲରୁ ସୁଧୀରଙ୍କ ପ୍ରତି ପ୍ରଶଂସାର ସୁଅ ଛୁଟିବାରେ ଲାଗିଛି ।