ମୁମ୍ବାଇ: ଆଜିକାଲି ଅଭିନେତା ଧର୍ମେନ୍ଦ୍ର ବହୁତ ଖୁସି ଅଛନ୍ତି। କାରଣ ଧର୍ମେନ୍ଦ୍ରଙ୍କ ଘରେ ବାଜିବ ଶାହାନାଇ। ଧର୍ମେନ୍ଦ୍ରଙ୍କ ନାତି କରଣ ଦେଓଲ ବର ହେବାକୁ ଯାଉଛନ୍ତି। ଖବର ଅନୁଯାୟୀ, ସନ୍ନି ଦେଓଲଙ୍କ ପୁଅ କରଣ ଦେଓଲ ଜୁନ୍ ୧୮ ତାରିଖରେ ଦିଶା ଆଚାର୍ଯ୍ୟଙ୍କୁ ବିବାହ କରିବାକୁ ଯାଉଛନ୍ତି। ବିବାହ ପ୍ରସ୍ତୁତି ଆରମ୍ଭ ହୋଇଯାଇଛି। ତେବେ ଇତି ମଧ୍ୟରେ ଧର୍ମେନ୍ଦ୍ର କେବଳ ନାତି କରଣଙ୍କ ବିବାହରେ ଯୋଗଦେବେ ବୋଲି ଖବର ରହିଛି। ସେ ବିବାହ ପୂର୍ବର ଉତ୍ସବରେ ଅଂଶଗ୍ରହଣ କରିବେ ନାହିଁ।
ଏକ ରିପୋର୍ଟ ଅନୁଯାୟୀ ଧର୍ମେନ୍ଦ୍ର କହିଛନ୍ତି, ‘ପିଲାମାନେ ନିଜ ବାହାଘରରେ ମଜା କରନ୍ତୁ। ମୁଁ ଯଦି ସେମାନଙ୍କ ପ୍ରିୱେଡିଂ କାର୍ଯ୍ୟକ୍ରମରେ ରହିବି ତେବେ ପିଲାମାନେ ଦ୍ୱିଧା କରିବେ। ମୁଁ ଚାହେଁ ନାହିଁ ଯେ ସେମାନେ କୌଣସି ମଜାକୁ ମିସ୍ କରନ୍ତୁ। ମୁଁ ସେମାନଙ୍କ ବାହାଘର ଦିନ ଯୋଗଦେବି।’ କରଣ ଏବଂ ଧର୍ମେନ୍ଦ୍ର ଘନିଷ୍ଠ ସମ୍ପର୍କରେ ବନ୍ଧିତ ଏବଂ ସେମାନେ ସମସ୍ତ କଥା ପରସ୍ପରକୁ ସେୟାର କରନ୍ତି। ଯେତେବେଳେ କରଣ ତାଙ୍କର ବଲିଉଡରେ ଡେବ୍ୟୁ କରିଥିଲେ ସେତେବେଳେ ଧର୍ମେନ୍ଦ୍ର ହିଁ ଫିଲ୍ମର ନାମ ‘ପଲ୍ ପଲ୍ ଦିଲ୍ କେ ପାସ୍’ ରଖିବାକୁ ପରାମର୍ଶ ଦେଇଥିଲେ। କରଣ ଅନେକ ସମୟରେ ସୋସିଆଲ ମିଡିଆରେ ତାଙ୍କ ଜେଜେ ଧର୍ମେନ୍ଦ୍ରଙ୍କ ସହ ଫଟୋ ସେୟାର କରନ୍ତି।
ଅନ୍ୟପକ୍ଷରେ ପୁଅ କରଣଙ୍କ ବିବାହକୁ ନେଇ ସନ୍ନି ଦେଓଲ ମଧ୍ୟ ବହୁତ ଉତ୍ସାହିତ ଅଛନ୍ତି। ଆଗାମୀ ଚଳଚ୍ଚିତ୍ର ଗଦ୍ଦର-୨ ର ପ୍ରମୋସନ ସମୟରେ ସନ୍ନି ଦେଓଲ ଫିଲ୍ମର ସହ-ଅଭିନେତାଙ୍କ ସହ ଏହି ବିବାହ କଥା ସେୟାର କରିଥିଲେ। ସନ୍ନି ଦେଓଲ କହିଥିଲେ- ‘ବହୁତ ଦିନ ପରେ ଆମ ଘରେ ବିବାହ କାର୍ଯ୍ୟକ୍ରମ ହେବାକୁ ଯାଉଛି। ମୁଁ ଏହି ସମୟରେ ବହୁତ ଖୁସି। ‘ କରଣଙ୍କ ବିବାହରେ ଏକ ବଡ଼ ସମାରୋହ ହେବାକୁ ଯାଉଛି। ଅତିଥି ତାଲିକା ମଧ୍ୟ ବହୁତ ଲମ୍ବା ଅଟେ। ଖବର ଅନୁଯାୟୀ, ଏହି ତାଲିକାରେ ବଚ୍ଚନ ପରିବାର, ଜ୍ୟାକି ଶ୍ରଫ, ଅନିଲ କପୁର, ଅମୃତା ସିଂ, ପୁନମ ଢିଲ୍ଲନଙ୍କ ଭଳି ସେଲିବ୍ରିଟିମାନେ ଅଂଶଗ୍ରହଣ କରିବେ।
Comments are closed.