କୁନି ଭାଇକୁ ଚାପି ଧରି ଭଉଣୀ କହୁଛି ‘ ଏ ଭଗ୍ନସ୍ତୁପ ମୋ ଉପରେ ଖସିପଡୁ, କିନ୍ତୁ ମୋ ଭାଇର କିଛି ନ ହେଉ

ନୂଆଦିଲ୍ଲୀ:ଭୟଙ୍କର ଭୂକମ୍ପ ପରେ ତୁର୍କୀ ଏବଂ ସିରିଆରେ  ଭୟଙ୍କର ପରିସ୍ଥିତି । ଯୁଆଡେ ଚାହିଁବ ସିଆଡେ ଧ୍ୱଂସର ତାଣ୍ଡବ । ଘରଠାରୁ ଗଛପତ୍ର ମାଟିରେ ଶୋଇ ଯାଇଛି । ଭଗ୍ନସ୍ତୁପ ଭିତରୁ ଶୁଭୁଛି କ୍ଷୀଣ କରୁଣ ଚିତ୍କାର  । ଉଦ୍ଧାର କାର୍ଯ୍ୟ ପାଇଁ ଯେମିତି କମ ପଡି ଯାଇଛି ହାତ । ଇତିମଧ୍ୟରେ ମୃତ୍ୟୁ ସଂଖ୍ୟା ୮ ହଜାର ଟପିଲାଣି । ଆହୁରି ବଢିବାର ସମ୍ଭାବନା ରହିଛି । ହେଲେ ବିଧ୍ୱସ୍ତ ତୁର୍କୀ ଏବଂ ସିରିଆରୁ ଯେଉଁ ହୃଦୟ ବିଦାରକ ଦୃଶ୍ୟ ସବୁ ସାମ୍ନାକୁ ଆସୁଛି ତାକୁ ଦେଖିଲେ କାହାରି ଆଖିରେ ଲୁହ ରହିବନି ।

ତୁର୍କୀ ଏବଂ ସିରିଆରେ ଯେମିତି ମୃତ୍ୟୁ ତାଣ୍ଡବ ରଚୁଛି । ପୋଛି ନେଉଛି ଜୀବନ । ତଥାପି ସେଠି ମଣିଷ ଏ ମୃତ୍ୟୁ ଦାନସ ସହ ଲଢୁଛନ୍ତି । ମାନବତାର ଅସ୍ତ୍ର ଧରି । ଶ୍ରଦ୍ଧା, ଭଲପାଇବାର ମୂଲ୍ୟ ଦେଇ ମରଣ ମୁହଁରୁ ଟାଣି ଆଣୁଛନ୍ତି ଜୀବନକୁ ।

ଏକ ଭାଇରାଲ ଭିଡିଓରେ ଦେଖିବାକୁ ମିଳିଛି ଭାଇଭଉଣୀଙ୍କ ସଂଘର୍ଷକୁ । ୭ ବର୍ଷର ଝିଅଟିଏ । ଧ୍ୱଂସ ସ୍ତୁପ ତଳେ ଚାପି ହୋଇ ରହିଛି । ପାଖରେ ତାର ଛୋଟ ଭାଇ । ତାକୁ କୋଳରେ ଚାପି ଧରିଛି । ତାର ସମ୍ପୂର୍ଣ୍ଣ ଶରୀରକୁ ନିଜ ଶରୀର ତଳେ ଲୁଚାଇ ରଖିଛି । ଝୁଲି ରହିଥିବା ଭଗ୍ନାବଶେଷ ତା ଉପରେ ପଛେ ଖସିପଡୁ, କିନ୍ତୁ ତା କୁନି ଭାଇର କିଛି ନ ହେଉ । ସେତିକି ନୁହେଁ, ତାର ଦୁର୍ବଳ ହାତରେ କୁନି ଭାଇର ମୁଣ୍ଡକୁ ଆଉଁଷି ଦେଉଛି ଆଉ କ୍ଷୀଣ ସ୍ୱରରେ ଉଦ୍ଧାର କରିବାକୁ ନେହୁରା ହେଉଛି ।  ଏ ଦୃଶ୍ୟ ଦେଖିଲେ କାହା ଆଖିରେ ବା ଲୁହ ରହିବ ? ଛୋଟ ଛୋଟ ପିଲାଙ୍କର ଏକ ଭଲପାଇବା, ପ୍ରେମ ଦେଖି ମୃତ୍ୟୁ ବି ବାଟ ଛାଡି ଦେଉ ଏତିକି କାମକା ।

ଆଉ ଏକ ହୃଦୟଥରା ଦୃଶ୍ୟର ଫଟୋ ମଧ୍ୟ ସୋସିଆଲ ମିଡିଆରେ ଦେଖିବାକୁ ମିଳିଛି ଯାହା ୟୁଜର୍ସଙ୍କୁ ଭାବୁକ କରି ଦେଇଛି । ଧ୍ୱଂସ ସ୍ତୁପ ତଳେ ଚାପି ହୋଇ ଯାଇଛି ଝିଅ । ବାପା ଝିଅକୁ ଉଦ୍ଧାର କରିବାକୁ ହାତ ବଢାଇଛି । ଝିଅର ହାତକୁ ବି ଧରିଛି । ହେଲେ ଆଖି ବୁଜି ଦେଉଛି ଝିଅଟି ।

ତୁର୍କୀ ଏବଂ ସିରିଆରେ ଦୁଃସ୍ଥିତିକୁ ବଖାଣୁଛି ଏମିତି କିଛି ଦୃଶ୍ୟ  । ସାରା ବିଶ୍ୱରୁ ଛୁଟିଛି ସହାୟତାର ସୁଅ । ଏ ଦୁର୍ଦ୍ଦିନରେ ଭଗବାନ ତୁର୍କୀ, ସିରିଆବାସୀଙ୍କୁ ସହିବାର ଶକ୍ତି ଦିଅନ୍ତୁ, ସାହାସ ଦିଅନ୍ତୁ ।

While under the rubble of her collapsed home this beautiful 7yr old Syrian girl has her hand over her little brothers head to protect him.
Brave soul
They both made it out ok. pic.twitter.com/GrffWBGd1C

— Vlogging Northwestern Syria (@timtams83) February 7, 2023