ସମସ୍ତ ମେଡିକାଲ କଲେଜ ଓ ହସ୍ପିଟାଲରେ ଖୋଲାଯିବ ଟେଷ୍ଟିଂ ଲ୍ୟାବ: ମନ୍ତ୍ରୀ

ଭୁବନେଶ୍ୱର: ଦିନକୁ ଦିନ ବ୍ୟାପୁଥିବା ମହାମାରୀ କରୋନାକୁ ରୋକିବା ପାଇଁ ରାଜ୍ୟ ସରକାର ଅଂଟା ଭିଡିଛନ୍ତି । କରୋନା ସନ୍ଦିଗ୍ଧଙ୍କ କିପରି ଅଧିକରୁ ଅଧିକ ନନୂମା ପରୀକ୍ଷା କରାଯାଇ ପାରିବ ସେ ଉପରେ ଗୁରୁତ୍ୱ ଦିଆଯାଇଛି । ଏଥିପାଇଁ ରାଜ୍ୟର ସମସ୍ତ ମେଡିକାଲ କଲେଜ ଓ ହସ୍ପିଟାଲରେ ଟେଷ୍ଟିଂ ଲ୍ୟାବ ଖୋଲାଯିବାକୁ ଚେଷ୍ଟା ଚାଲିଛି । ଏନେଇ ଆଜି ବସିଥିବା କ୍ଷମତା ସମ୍ପର୍ଣ୍ଣ ଉଚ୍ଚ ମନ୍ତ୍ରୀ ସ୍ତରୀୟ ବୈଠକ ଶେଷ ହେବା ପରେ କହିଛନ୍ତି ମନ୍ତ୍ରୀ ପ୍ରତାପ ଜେନା ।
ସେ କହିଛନ୍ତି, ଆଜିଥ୍ରୋମାଇସିନ ଓ ରାପିଡ ଟେଷ୍ଟ ପାଇଁ ଟେଷ୍ଟିଂ କିଟ କିଣିବାକୁ କମିଟି ସୁପାରିଶ କରିଛି । ଟେଷ୍ଟିଂ ଲ୍ୟାବ୍ ପାଇଁ ଅଧିକ ଅସ୍ଥାୟୀ କର୍ମଚାରୀ ନିୟୋଜିତ କରିବା ଉପରେ ମଧ୍ୟ ଗୁରୁତ୍ୱ ଦିଆଯାଇଥିବା ନେଇ ସୂଚନା ଦେଇଛନ୍ତି ମନ୍ତ୍ରୀ। ଟ୍ରେନିଂ ଓ କାପାସିଟି ବିଲ୍ଡିଂକୁ ଗୁରୁତ୍ୱ ଦେବା ସହ କୋଭିଡ-୧୯କୁ କିଭଳି ମୁକାବିଲା କରିହେବ, ତାହାକୁ ଗୁରୁତ୍ୱ ଦେଉଛନ୍ତି ରାଜ୍ୟସରକାର । ଏହା ସହ ଅଧିକ ମ୍ୟାନ ପାୱାର ଉପରେ ମଧ୍ୟ ଗୁରୁତ୍ୱ ପ୍ରଦାନ କରାଯାଉଛି ।
ଗୋଷ୍ଠୀ ସ୍ତରରେ କରୋନା ମୁକାବିଲା ପାଇଁ ଅଧିକ ମ୍ୟାନ ପାୱାର କିପରି ନିୟୋଜିତ ହୋଇପାରିବେ ସେନେଇ ବୈଠକରେ ଆଲୋଚନା ହୋଇଥିବା ନେଇ ମନ୍ତ୍ରୀଙ୍କ ସୂଚନା । ଅଙ୍ଗନବାଡି ଅଶା କର୍ମୀ, ଏଏନଏମ ଓ ଡାକ୍ତର ମାନଙ୍କୁ ଅଧିକ ସଂଖ୍ୟାରେ ତାଲିମ ପାଇଁ ଗୁରୁତ୍ୱ ଦିଆଯାଇଛି । ବର୍ତ୍ତମାନ ସୁଦ୍ଧା ଏକ ଲକ୍ଷ ୫୩ ହଜାର ଜଣଙ୍କୁ ତାଲିମ ଦିଆଯାଇ ସାରିଥିବା ବେଳେ ଆଗକୁ ଆଉ ଅଧିକ ତାଲିମ ଦିଆଯିବା ଉପରେ ବ୍ୟବସ୍ଥା କରାଯାଉଛି ବୋଲି ମନ୍ତ୍ରୀ କହିଛନ୍ତି ।