ଟୋକିଓ ଅଲିମ୍ପିକ୍ସ: ବକ୍ସିଂରେ ଭାରତୀୟ ବକ୍ସରଙ୍କଠାରୁ ରହିଛି ପଦକ ଆଶା

ଟୋକିଓ: ଆଉ ୨୨ ଦିନ ପରେ ଟୋକିଓରେ କ୍ରୀଡା ଜଗତର ମହାକୁମ୍ଭ ଭାବେ ବିବେଚିତ ଅଲିମ୍ପିକ୍ସ ଆରମ୍ଭ ହେବ । ବିଜେନ୍ଦର ସିଂ ଏବଂ ମେରୀ କମଙ୍କ ସଫଳତା ପରେ ବକ୍ସିଂରେ ଭାରତୀୟ ବକ୍ସରଙ୍କ ପଦକ ଆଶା ଉଜ୍ଜୀବୀତ ହୋଇଛି । ୧୪ ଥର ଅଲିମ୍ପିକ୍ସରେ ସାମିଲ ହୋଇଥିବା ଭାରତୀୟ ବକ୍ସର ୨ଥର ପଦକ ଜିତିପାରିଛନ୍ତି । ୨୦୦୮ ଅଲିମ୍ପିକ୍ସରେ ବିଜେନ୍ଦର ସିଂ ୭୫ କିଗ୍ରା ବିଭାଗରେ ବ୍ରୋଞ୍ଜ ଏବଂ ମେରୀକମ ୨୦୧୨ରେ ୫୧ କିଗ୍ରାରେ ବ୍ରୋଞ୍ଜ ପଦକ ଜିତିଥିଲେ । ଏଥର ୧୪ ଜଣ ବକ୍ସର ଭାରତ ପକ୍ଷରୁ ପ୍ରତିନିଧିତ୍ୱ କରୁଛନ୍ତି । ସେମାନେ ହେଲେ ଅମିତ ପନ୍ଧାଲ (୫୨ କିଗ୍ରା), ମନୀଷ କୌଶିକ (୬୩କିଗ୍ରା), ବିକାଶ କ୍ରିଷ୍ଣା (୬୯କିଗ୍ରା), ଆଶୀଷ କୁମାର (୭୫ କିଗ୍ରା), ସତୀଶ କୁମାର (୯୧+ କିଗ୍ରା) । ମହିଳା ବିଭାଗରେ ଏମସି ମେରୀ କମ୍ (୫୧ କିଗ୍ରା), ସିମ୍ରନଜିତ କୌର (୬୦କିଗ୍ରା), ଲଭଲିନ ବୋରଗାହନ (୬୯ କିଗ୍ରା), ପୂଜା ରାନୀ (୭୫ କିଗ୍ରା) ଅଂଶ ଗ୍ରହଣ କରୁଛନ୍ତି । ୨୦୧୨ରେ ଭାରତ ପକ୍ଷରୁ ସର୍ବାଧିକ ୮ଜଣ ବକ୍ସର ଅଂଶ ଗ୍ରହଣ କରିଥିଲେ । ଏଥର ଏହି ରେକର୍ଡ ଭାଙ୍ଗିବ । ବକ୍ସିଂରେ ଆମେରିକା ଓଭରାଲ ୫୦ ସ୍ୱର୍ଣ୍ଣ ସହ ୧୧୪ ପଦକ ଜିତି ଶୀର୍ଷରେ ରହିଥିବା ବେଳେ କ୍ୟୁବା ୩୭ ସ୍ୱର୍ଣ୍ଣ ସହ ୭୩ ଏବଂ ବ୍ରିଟେନ ୧୮ ସ୍ୱର୍ଣ୍ଣ ସହ ୫୬ ପଦକ ଜିତି ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛନ୍ତି ।